Helpim Wok Bilong Kingdom i Go Bikpela
1 “Em ol bikpela senis tru!” “Em i kamap hariap!” “Ol brata bilong yumi long Rasia i kisim bikpela blesing tru!”
2 Ol brata i bin mekim kain tok olsem taim ol bikpela kibung i bin kamap long hap bilong Rasia long 1991, long pinis bilong mun Ogas na kirap bilong mun Septemba. Ol dispela kibung i bin kamap gutpela, maski i gat sampela hevi inap pasim rot bilong en. Inap 74,252 manmeri i bin i go long ol dispela kibung na 7,820 i kisim baptais. Na inap 295,924 manmeri i bin bung long ol kibung i bin kamap long Isten Yurop.
3 Long taim bilong Jisas na long nau tu, tok bilong profet Aisaia i kamap tru, olsem: “Ol manmeri i bin i stap long bikpela tudak, tasol nau ol i lukim bikpela lait. . . . Yu bin mekim ol manmeri bilong yu i kamap bikpela lain, na yu mekim ol i amamas moa yet. Ol i amamas long ai bilong yu, olsem ol i save amamas long taim ol i kisim ol kaikai i mau long gaden.” Tru tumas, wok bilong Kingdom i go bikpela tru! Krais Jisas i mekim wok king! Na dispela tok profet i tok moa olsem: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”—Ais 9:2, 3, 7.
4 Lain Witnes long Isten Yurop i go bikpela tru, na bilong lukautim gut dispela lain, ol brata long Jemani i wok yet long wokim ol bikpela haus moa bilong wokim ol buk samting. Ol brata long dispela hap ol i amamas long helpim dispela wok em hap wok stret bilong kamapim truim bilong tok profet bilong Jisas, olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Mt 24:14.
5 Na long Amerika, wok bilong kingdom i go bikpela moa yet. Long Septemba 1991, taim ol i mekim bung bilong amamas long ol sumatin bilong Skul Gileat i winim skul, ol i bin tokaut olsem, klas bilong Skul Gileat i kirap long Epril 1992 bai i gat bikpela lain sumatin, winim bilong nau inap dabol—bai i gat 50 samting sumatin! Inap 3-pela yia ol i bin wok long sanapim ol haus skul samting ol i kolim Wastaua Edukesenal Senta (Watchtower Educational Center), i stap long Pateson, long provins Nu Yok, na bihain bai ol i putim Skul Gileat long dispela hap. Planti brata sista i save askim olsem: “Ol i wokim pinis ol haus long Pateson o olsem wanem?”
6 Ol Haus Long Pateson: Mipela amamas long tokaut olsem ol brata i wok hariap na inapim pinis sampela wok paslain long taim ol i makim bilong inapim. Ol i wokim pinis ol 7-pela haus i olsem haus pasindia i gat 150 rum slip olgeta, em ol i kolim Pateson In (Patterson Inn). Ol dispela haus i stap klostu long ol haus skul. Na ol i wokim pinis ol rot, na ples bilong putim ka, na ol i planim pinis ol diwai na plaua samting olsem ol gaden bilas. Taim ol i wokim pinis ol haus skul na ol brata bilong ol narapela hap ol i kam lukim ples, ol dispela brata i ken slip long dispela haus pasindia i stap klostu. Tasol long dispela taim nau, 300 samting brata bilong Betel, em ol i wok long sanapim ol haus, ol i slip long ol dispela haus ol i wokim pinis.
7 Inap 650 brata olgeta i mekim wok long dispela ples! Kirap long 1991, wanpela niusman (bilong nius The New York Times) i stori long dispela wok ol i mekim, olsem: ‘I gat planti haus olsem wanpela biktaun i stap antap long wanpela maunten klostu long Bikrot Namba 22, long hap not-is long distrik Putnam. Ol ensinia, na akitek, na kamda, na man bilong wokim paua, na plama, na ol narapela wokman, ol i wok strong long wokim ol dispela haus; olgeta ol i bilong misin na ol yet ol i laik kam wok inap sampela wik o yia, no gat pe. Ol i no kisim pe, tasol ol i kisim liklik wansiling long olgeta mun bilong baim sampela liklik samting ol i mas kisim.’
8 Ol dispela wokman i kisim ol gutpela samting bilong spirit. Olgeta man ol inap long Sosaiti i kisim ol long mekim dispela wok, ol i mas i stap man bilong tingim gut ol samting bilong spirit. (1 Ko 2:14, 15) Long olgeta moningtaim ol i bung na toktok long teks bilong de. Na tu, bilong helpim ol dispela wokman, ol i mekim Stadi Wastaua long olgeta Mande, long apinun. Ol i mekim bikpela wok long ples Pateson, na ol i mekim bikpela wok long narapela hap bilong provins Nu Yok tu, olsem long Bruklin.
[Ol Askim]
1-3. Long Ogas na Septemba, 1991, ol tok bilong Aisaia 9:2, 3, 7 i bin kamap tru olsem wanem?
4. Ol brata long Jemani i helpim wanem wok em hap wok bilong kamapim truim bilong Matyu 24:14?
5. Long Septemba 1991, long bung bilong amamas long ol sumatin bilong Skul Gileat i winim skul, ol i bin tokaut long wanem samting?
6. Ol haus ol i kolim Pateson In i wanem kain haus? Husat i slip long ol dispela haus long nau? Olsem wanem yumi wan wan inap i go i stap long dispela haus pasindia?
7. Wanpela niusman i stori olsem wanem long ol wok ol i mekim long Pateson?
8. Ol wokman i kisim wanem ol gutpela samting bilong spirit? Ol i mekim narapela bikpela wok long wanem hap?
This article has been taken partly from km-E 12/91 “Sharing in Kingdom Expansion.”