Sampela Pasin Bilong Kirapim Tok na Bai Man Bilong Haus i Putim Gut Yau
1 Wanem hap bilong ol tok yu mekim long man bilong haus, em bikpela hap? Em kirap bilong tok, a? Ol tok yu mekim bilong kirapim tok i mas kirapim tingting bilong man, sapos nogat, ating bai em i no laik harim.
2 Taim yu redim ol tok bilong mekim pastaim, yu mas tingim wanem ol samting? Yu mas tingim gut pasin bilong ol man yu autim tok long ol, na wanem ol tok inap helpim ol tru. Wanem pasin bilong ol man long teritori bilong yu? Taim yu kamap long haus bilong ol, i gat sampela tok yu mas mekim bilong gude gut long ol, o yu mas kirap kwik na tokim man, i gat wanem as na yu kam lukim em? Olsem wanem? I gat planti yangpela marit long teritori bilong yu? Ol i tingting planti long wanem ol samting? Ol man i stap long hap bilong yu ol i save tingim ol hevi i kamap long ol narapela hap o nogat?
Ating yu inap kirapim ol long harim tok sapos yu tok olsem:
◼ “Moning tru. Nem bilong mi __________ . Taim mi harim stori olsem ol man i hangre na ol i dai long pait, mi pilim hevi nogut tru. Yu tu yu hevi long ol dispela samting?” O bilong kirapim tok, yu ken kamapim askim olsem: “Yu ting wanem samting bai stretim ol hevi bilong dispela graun?” “Olsem wanem sapos i gat wanpela gutpela king i bosim yumi olsem Aisaia 9:6, 7 i tok?” Kaunim dispela skripsa na stori long en.
3 Long sampela teritori, ating ol man i tingim sindaun bilong ol na famili bilong ol i bikpela samting, na ol i no tingim tumas ol samting i kamap long ol narapela hap bilong graun, olsem ol man i tok long kamapim gutaim.
Ating yu inap kirapim tingting bilong ol, sapos yu tok olsem:
◼ “Tenpela yia bihain long nau, yu ting yu wantaim famili bilong yu bai gat wanem kain sindaun? Tok bilong Baibel inap strongim bel bilong yumi, long wanem, Baibel i tok profet long wanpela king em bai bosim ol manmeri long stretpela pasin. Gutpela sapos yumi lukim tok bilong Aisaia 9:6, 7 em i stori long dispela king.”
4 Olsem wanem? Long hap yu stap long en i gat planti raskol na ol man i tingting planti long ol samting ol i ken mekim bilong lukautim ol yet? Sapos olsem, ating sampela bai putim gut yau sapos yu kirapim tok olsem i stap long buk Reasoning, pes 10 (Crime/Safety).
Yu ken mekim tok olsem:
◼ “Moning. Mipela i toktok wantaim ol man long ol samting yumi ken mekim bambai pasin raskol i no ken bagarapim yumi. Pasin raskol i kamap bikpela long hap bilong yumi na dispela i save bagarapim sindaun bilong yumi, a?” Nau kamapim askim olsem: “Yu ting wanem samting bai stretim ol dispela hevi?” o “Yu ting i gat wanpela man long graun em inap pinisim ol dispela kain hevi?” Ating kain askim olsem bai kirapim man bilong haus long mekim liklik tok. Orait nau yu ken kaunim Aisaia 9:6, 7.
5 Yumi olgeta na ol skulmanki tu i ken mekim kain tok olsem long man bilong haus na kolim wanpela skripsa tasol; i no hatwok tumas. Taim yu tilim ol magasin, yu ken kamapim ol dispela tok. Long dispela rot bai yumi inap save ol man i laikim tru tok bilong Baibel o nogat. Mipela i ting olsem, taim ol pablisa i wok long tilim ol magasin o sabskripsen samting long mun Epril na Me, ol bai amamas long mekim wok long ol dispela tok.
6 Taim yu kirap long toktok wantaim man, sapos ol tok yu mekim i kirapim tingting bilong em na pes bilong yu i lait, ating dispela bai kirapim man bilong haus long putim gut yau.
This article is unique to PNG.