Haus Kingdom​—⁠Yu Ting Olsem Wanem Long En na Mekim Wanem Long En?

¹ Haus Kingdom em i namba wan bikpela samting long hap bilong yumi. Yu ting Haus Kingdom em i bikpela samting? Yu save lukautim gut?

² Bilong wanem em i namba wan bikpela samting long hap bilong yumi? Long wanem, em i haus lotu bilong yumi. Taim lain bilong Jehova i bung bilong lotuim Jehova, em i stap wantaim ol long rot bilong spirit holi bilong em. Krais Jisas i tok, sapos tupela o tripela disaipel bilong em i bung wantaim bilong lotuim Jehova, bai em i stap wantaim ol. Taim yumi bung bilong lotu, Jehova, na Jisas i stap wantaim yumi, em wanpela bikpela samting tru, a?

³ Haus Kingdom yet i no gat maus bilong litimapim nem bilong Jehova, olsem na yumi mas wokim wanpela sain na raitim tok long en olsem: “Haus Kingdom Bilong Ol Witnes Bilong Jehova.” Kingdom em i nambawan bikpela tok bilong Baibel. Taim ol man i lukim dispela rait, dispela i litimapim nem bilong Jehova. Wanem lain i save autim tok bilong Kingdom long olgeta hap bilong graun? Em ol Witnes Bilong Jehova tasol.

⁴ Tru tumas, Haus Kingdom em i namba wan bikpela samting long hap bilong yumi. Ating yumi olgeta i gat dispela kain tingting. Tasol olsem wanem long ol samting yumi mekim long Haus Kingdom?

⁵ Yumi no ken lusim tingting olsem olgeta samting bilong kongrigesen em i samting bilong Kingdom, olsem na yumi mas lukautim gut. Taim wanpela man i wokabaut long rot o raun long ka na em i lukim Haus Kingdom, em i save ting olsem wanem?

⁶ Ating namba wan samting em i lukim em dispela sain i tok olsem: “Haus Kingdom Bilong Ol Witnes Bilong Jehova.” Olsem wanem? Yupela raitim gut dispela nem na i stret olsem yumi tok hia long raitim, na sain i klinpela? Ating yupela mas penim gen o nogat? Sapos i gat banis bilong Haus Kingdom, dispela banis em i stret long dispela hap kongrigesen i stap long en? Olsem wanem long dua bilong dispela banis? Sapos yupela planim ol liklik diwai samting olsem banis, yupela save katim na stretim gut?

⁷ Orait olsem wanem long ol gras samting arere long Haus Kingdom? Yupela katim gut na i luk nais? Yupela save larim ol dok na pik i kam insait long banis bilong Haus Kingdom? Sapos dok na pik i kam insait, bai ol i bagarapim na ples bai smel nogut na bai i gat planti lang na yupela inap kisim sik long dispela. Ol toilet i stap insait long Haus Kingdom o long ausait? Maski toilet i stap we, tasol em i mas i stap klin na i no gat smel nogut, em bikpela samting. Long olgeta taim i gat pepa bilong toilet i stap? Olsem wanem long ples bilong wasim han? I gat sampela sop i stap na laplap o pepa bilong klinim han? Yupela save klinim gut dispela hap? Paslain long miting na bihain long miting, lukim gut ol toilet na klinim sapos em i doti. Planti taim ol brata sista i lusim tingting long mekim dispela samting, na ol toilet na ples bilong wasim han i doti na i smel nogut.

⁸ Bilong lukautim ol dispela samting nau yumi stori long en, yumi mas tromoi liklik hap mani tasol. Tasol yumi mas tingim na lukautim gut, long wanem, olgeta samting bilong kongrigesen i bilong helpim wok bilong Kingdom. Tru tumas, yumi mas lusim taim na strong bilong yumi bilong lukautim ol dispela samting bilong Kingdom.

⁹ Ol elda na wokman bilong kongrigesen ol i mekim wok bilong helpim yumi bambai yumi inap mekim wok bilong Kingdom. Taim ol dispela brata i kam askim yumi long helpim wok bilong klinim Haus Kingdom, yumi mas givim bel long helpim dispela wok. Long 1 Korin 16⁠:16 Pol i tok em i laik bai yumi “stap aninit long ol dispela kain man, na long olgeta man i save helpim [yumi] na mekim dispela kain wok.”

¹⁰ Yumi bin stori long ol samting long banis bilong Haus Kingdom. Sampela man i tok, namba wan samting man i lukim, dispela samting tasol bai em i tingim. Orait, olsem wanem long Haus Kingdom bilong yumi? Taim ol manmeri i lukim Haus Kingdom bilong yumi, bai ol i save yumi ting Haus Kingdom em i namba wan bikpela samting long dispela hap, na bai ol i save yumi laik litimapim nem bilong Jehova na oganaisesen bilong em?

This article is unique to PNG.