Stretim Rot Bilong Kam Long Kibung Distrik
1 Sapos yumi go long wanpela bikpela kibung distrik olsem kibung bai kamap long mun Disemba na Janueri long Papua Niugini, dispela bai helpim yumi. Long ol kain kibung olsem, yumi na ol nupela tu i save pilim tru olsem oganaisesen bilong Jehova em i bikpela tru, na tu, yumi amamas long lukim ol nupela brata sista na ol brata sista em longtaim pinis yumi no bin lukim ol.
2 Tasol wanpela bikpela samting em yumi mas bungim mani bilong baim rot bilong i go long kibung. Na i hatwok liklik sapos famili bilong yumi i bikpela, olsem na sapos yu no mekim yet, nau yu mas kirap long bungim mani. Bilong mekim olsem, sampela i bin kisim wanpela pasbuk na putim mani long dispela pasbuk long olgeta fotnait, em mani bilong i go long kibung. Na sampela i save planim gaden o lukautim pik o kakaruk samting na maketim paslain long kibung, na long dispela rot ol i kisim mani bilong i go long kibung.
3 Na no ken lusim tingting olsem: Mani i mas inap long baim PMV o sip o balus samting, na long baim ples slip na kaikai samting long taim bilong kibung. Long dispela rot bai ‘yumi no ken putim hevi long ol brata.’—2 Te 3:7, 8, 12.
4 Kuskus bilong kongrigesen i mas stretim wok bilong helpim ol brata sista long kongrigesen i go long kibung na long kisim ples slip. Em i Kodineta Bilong Kibung long kongrigesen. Gutpela sapos em i askim ol pablisa wan wan, ol i stretim rot pinis long i go long kibung o ol i gat sampela hevi samting na em i ken helpim ol long en? Na sapos i gat ol brata sista long kongrigesen ol i laik go long kibung, orait em i ken stretim rot na bai ol i ken i go wantaim olsem wanpela grup, na long dispela rot ating ol inap katim pe bilong baim balus samting. Tasol sapos ol brata sista ol i no planti tumas bilong inapim mak bilong katim pe, orait, kodineta i ken askim ol narapela kongrigesen, na ating ol inap i go wantaim grup bilong ol.
5 Pas bilong kisim ples slip, plis yu no ken salim i go long brens-ofis. Komiti bilong kibung bai salim ol pepa bilong kisim rum slip i go long yupela, na bihain yupela i ken salim i go long atres long ples em kibung bai i kamap long en—no ken salim i go long brens-ofis.
6 Long dispela yia bai i gat 3-pela kibung distrik tasol, olsem na ol brata sista i stap long ol longwe hap o long ol ailan i stap longwe, ol i mas wok strong moa yet long kam long kibung. Tasol sapos yumi bilip strong na kam long kibung, maski yumi hatwok, orait, Jehova bai mekim gut long yumi. (2 Ko 9:6, 7; Je 4:8; Hi 10:38, 39) Gutpela samting yumi ken tingim bilong strongim yumi, em olsem: Sapos yumi wok strong moa yet bambai yumi inap i go long “God i Skulim Yumi” Kibung Distrik long pinis bilong dispela yia, orait, bai yumi kisim planti gutpela blesing.
This article is unique to PNG.