Nupela Program Bilong Kibung
1 As tok bilong nupela program bilong kibung sekit bilong 1995, em “Was Gut, Sanap Strong, Kamap Strong.” Ol i kisim dispela tok long 1 Korin 16:13. Aposel Pol i mekim dispela tok bilong strongim ol Kristen long taim bilong em.
2 Bilong kirapim program, bai yumi harim ol tok i kamapim klia olsem yumi mas wok oltaim long skelim yumi yet long ol samting bilong spirit. Bilong holimpas stretpela pasin nau long “taim bilong las de,” yumi mas skelim dispela askim: Yumi save pas gut wantaim Jehova na oganaisesen bilong em long graun, o olsem wanem? (2 Ti 3:1) Ol tok bai kirapim tingting bilong yumi olsem, God i save tingim tru ol bikpela wok yumi mekim. I mas i gat man bilong skulim yumi long ol samting yumi ken mekim na bai yumi bihainim moa yet ol pasin Kristen na holimpas stretpela pasin.
3 Na ol tok bai stori gut olsem, yumi mas wok strong long kamapim ol disaipel na kamap strong moa long ol samting bilong spirit na kisim sampela wok insait long kongrigesen. Ol tok na ol soim samting bai stori long ol samting ol brata sista wan wan na ol famili i ken mekim bilong kisim kaikai bilong spirit long olgeta taim.
4 Long Sarere, ol man inapim pinis mak bilong baptais ol i ken baptais. Long Sande, gutpela sapos yumi olgeta i harim pablik-tok, nem bilong en “Yu Stap Olsem Wanem Long Ai Bilong God?”
5 Bilong pinisim program, bai yumi harim ol tok i strongim yumi long holimpas strongpela bilip, na oltaim yumi mas stap wanbel wantaim ol narapela na laikim tru ol. Kibung sekit em i wanpela gutpela samting tru Jehova i putim bilong ‘kirapim yumi long laikim ol arapela na mekim ol gutpela pasin long ol.’ (Hi 10:24, 25) Stretim rot bambai yu inap kam long kibung long tupela de na harim olgeta tok.
6 As tok bilong bikpela de kibung bilong 1995 em “Wok Long Autim Tok i Tru.” Olgeta tok bilong kibung bai stori long Jisas i stap gutpela piksa bilong yumi ken bihainim, na olsem wanem long olgeta taim em i helpim ol narapela long save long tok i tru. Ol tok bilong kibung bai stori gut olsem, yumi ol disaipel bilong Krais i gat wok long bihainim pasin bilong em long autim tok i tru.—1 Ko 11:1.
7 Ol tok bai stori long wok bilong kongrigesen long helpim ol narapela long save long tok i tru. Na ol tok bai stori gut tu long olsem wanem yumi ken mekim gutpela wok long ol magasin na buk samting bilong yumi.
8 Wanpela brata, em Sosaiti i salim i kam, bai mekim bikpela tok bilong kibung, nem bilong en “Ol Samting Wok Bilong Autim Tok i Tru i Mekim.” (Jo 8:32) Dispela bikpela de kibung bai helpim yumi long pilim moa yet tok i tru na helpim yumi olgeta long ‘sanap strong long tok tru.’—2 Pi 1:12; 1 Ko 15:58.
This article is unique to PNG.