Yu Inap Helpim Narapela?
1 Jehova i Helpim na Ples Hait bilong yumi. Yumi save taim yumi gat hevi yumi ken beten long em na em bai helpim yumi. (Sng 18:2; 46:1) Yumi ken bihainim gutpela pasin sori bilong em olsem: Taim yumi lukim man i gat hevi o sot long sampela samting, yumi ken tokim em, bai yumi helpim em.
2 Wanem samting i kirapim man long mekim bikpela wok bilong helpim narapela? Em pasin sori, a? Na Tok Bilong God i kirapim yumi long mekim olsem. (Ro 15:1) Pol i tok, ‘Yumi no ken lukautim ol samting bilong yumi tasol. Nogat. Yumi mas helpim ol narapela long i stap gut.’—Fl 2:4.
3 Yumi olgeta inap kisim amamas long mekim olsem. (Ap 20:35) Pol i tok, yangpela Timoti i stap gutpela piksa, long wanem, “oltaim em i save tingting long painim rot bilong helpim” ol brata bilong em. (Fl 2:20) Gutpela tru i gat planti yangpela insait long ol kongrigesen long nau na ol i save bihainim wankain pasin olsem Timoti. Tasol maski yumi yangpela o lapun, i gat sampela samting yumi ken mekim bilong helpim narapela i gat hevi.
4 Yu ting yumi inap mekim sampela samting moa bilong helpim ol man i gat hevi? Ating wanpela brata o sista i bin slip long haus sik na wan wan Witnes tasol i bin go lukim em; o ating wanpela brata o sista i sik na i no inap lukautim em yet, tasol no gat wanpela Witnes i bin kam helpim em long mekim wok long haus samting. Jisas i tingim ol man i mekim wok bilong Jehova ol i olsem wanpela famili i tingim na lukautim gut ol narapela narapela. (Mk 3:33-35) Long tok piksa bilong sipsip na meme, Jisas i helpim yumi long save, ol man i stap long han sut bilong King, ol i stap olsem, long wanem, ol i bin helpim ol brata bilong King.—Mt 25:40.
5 Yumi Ken Mekim Wanem? Sapos man i gat hevi, yumi ken mekim wanem bilong helpim em? Yumi yet inap kirap na helpim em? Yumi ken strongim bel bilong lapun ating em i no gat gutpela pren bilong helpim em. Na ating i gat sampela yangpela yumi ken helpim ol. Ating wanpela famili i gat planti pikinini ol i kam nupela long Haus Kingdom, tasol pablisa i stadi wantaim ol em i no stap. Sapos yu helpim papamama long lukautim ol dispela pikinini, ating bai ol i pilim tru dispela samting.
6 Taim yumi wok long laikim moa yet tok i tru na oganaisesen bilong Jehova, yumi wok tu long pilim tru ol gutpela pasin bilong ol narapela long kongrigesen na yumi tingim gut ol. Pol i kirapim yumi long mekim moa yet dispela samting. (2 Ko 6:11-13) Jisas i tok, sapos yumi mekim pasin sori long narapela, dispela em i nambawan rot bilong yumi ken kamapim klia yumi disaipel tru bilong em.—Jo 13:35.
7 Olsem na taim yumi lukim narapela i gat hevi, pasin bilong laikim tru ol brata na kongrigesen i mas kirapim yumi na bai yumi yet i kirap na helpim ol long kain kain rot. (Ga 6:9, 10) Pasin bilong tingim gut ol narapela bai helpim yumi long stap wanbel na laikim tru ol. (1 Ko 10:24) Long dispela rot bai yumi inapim wok yumi mas mekim bilong helpim kongrigesen.