Yumi Mas Bilip na Wokabaut
1 Planti milion manmeri i tingim mani kago i olsem namba wan samting long i stap bilong ol, na ol i mekim pasin longlong na bungim planti mani. (Mt 13:22) Na taim mani kago i pinis o ol man i stilim o i no helpim ol tumas, ol i kisim bikpela hevi. Baibel i kirapim yumi long bihainim gutpela rot na tingim ol gutpela samting bilong spirit. (Mt 6:19, 20) Bilong mekim olsem, yumi mas kisim pasin bilong ‘bilip na wokabaut.’—2 Ko 5:7.
2 Dispela tok Grik ol i tanim olsem “bilip” em inap makim olsem: bilip tru, strong long kirapim man long bilip tru. Pasin bilong bilip na wokabaut i olsem, taim yumi karim ol hevi, yumi bilip tru long God na bilip olsem em bai stiaim wokabaut bilong yumi, na em bai lukautim yumi long ol samting yumi mas kisim. Jisas i makim gutpela pasin yumi ken bihainim; em i bin tingim tasol ol bikpela samting. (Hi 12:2) Long nau tu, yumi gat wok long tingim long bel ol samting bilong spirit em yumi no inap lukim. (2 Ko 4:18) Olgeta taim yumi mas tingim i stap bilong yumi long nau; yumi no save long ol samting bai painim yumi, na yumi mas tingim olsem, Jehova tasol i givim laip long yumi na yumi stap.
3 Na yumi mas bilip strong olsem Jehova i stiaim oganaisesen bilong em long graun long rot bilong lain “wokboi i gat gutpela tingting.” (Mt 24:45-47) Yumi kamapim bilip bilong yumi taim yumi bihainim tok bilong ol brata i gat wok bilong lukautim yumi long kongrigesen. (Hi 13:17) Taim yumi daunim laik bilong yumi yet na wok gut wantaim oganaisesen, dispela i save kamapim olsem yumi bilip long Jehova. (1 Pi 5:6) Yumi mas givim bel olgeta long wok oganaisesen i givim long yumi. Dispela bai mekim na bai yumi pas gut wantaim ol brata long pasin sori na pasin wanbel.—1 Ko 1:10.
4 Rot Bilong Strongim Bilip: Yumi no bilip na em tasol. Nogat. Yumi mas wok strong long strongim bilip bilong yumi. Oltaim yumi mas stadi, beten, na go long ol miting. Dispela bai helpim yumi long strongim bilip bilong yumi, na long strong bilong Jehova yumi inap sakim ol traim. (Ef 6:16) Olsem wanem? Yu bin wokim gutpela sedyul bilong kaunim Baibel long olgeta de na bilong redim ol miting? Yu save tingim gut long bel ol tok yu bin lainim, na yu save go klostu long Jehova long rot bilong beten? Em pasin bilong yu long go long olgeta miting na insait long en sapos rot i op?—Hi 10:23-25.
5 Ol gutpela pasin yumi save mekim i soim olsem yumi gat strongpela bilip. (Je 2:26) Wanpela gutpela rot bilong kamapim bilip bilong yumi em long tokim ol narapela long ol samting yumi wetim i stap. Yu save painim rot bilong autim gutnius long ol man? Yu inap senisim sindaun bilong yu inap long yu ken mekim bikpela wok moa long autim tok? Yu save bihainim ol tok yumi save kisim bilong helpim yumi long mekim gut wok autim tok? Yu save putim mak yu yet i laik winim long ol samting bilong spirit na wok strong long winim?
6 Jisas i tokaut long yumi no ken tingting tumas long mekim ol wok bilong olgeta de na larim pasin bilong laikim tumas ol samting bilong skin i daunim yumi long ol samting bilong spirit. (Lu 21:34-36) Yumi mas lukaut gut long wokabaut bilong yumi bambai bilip bilong yumi i no ken bagarap olsem sip i bruk long rip. (Ef 5:15; 1 Ti 1:19) Bihain, yumi olgeta i laik tokaut olsem, yumi ‘bin ran strong long gutpela resis bilong laip, na kamap pinis long mak, na yumi bin holimpas bilip long God.’—2 Ti 4:7.