Mekim Gutpela Wok Long Mani Bilong Yumi
1 Taim yumi dediket long Jehova, i olsem yumi tok, olgeta samting bilong yumi i bilong em. Olsem na yumi mas mekim wanem wok long olgeta samting yumi holim? Brata C. T. Russell i bin toktok long wok Kristen insait long kongrigesen na em i tok: “Olgeta wan wan i mas ting, Bikpela yet i givim wok long em olsem bosboi bilong bosim taim na strong na mani samting bilong em, na em i mas wok long painim rot bilong mekim wok long ol dispela samting inap tru long skel bilong em, na dispela bai litimapim nem bilong Bikman bilong em.”
2 Ating sampela ol i pilim olsem ol i stap rabis liklik na ol i surik long givim mani. Tasol yumi mas save olsem mani bilong helpim wok autim tok em i kam long ol kontribusen yumi olgeta i givim. Sampela inap long givim bikpela mani, na sampela inap long givim liklik mani. Sapos yu inap givim liklik tasol, yu no ken sem na ting em i liklik tumas, nogat. Jehova i no ting olsem, na Jisas i kamapim klia dispela samting taim em i kamapim tok i makim olsem Jehova i amamas long liklik mani em wanpela rabismeri i bin putim.—Lukim Luk 21:2-4.
3 Dispela rabismeri i no ting olsem mani em i givim em i liklik tumas, nogat. Na em i no skelim em yet wantaim ol narapela. Em i givim ol samting em inap givim. Long dispela rot em i kamapim klia olsem em i wanpela gutpela “bosboi.” Liklik kontribusen em i givim i no lus nating. Nogat tru. Em i bihainim pasin Jehova i bin putim long dispela taim, na Jehova i tingim tru dispela samting em i mekim.
4 Olsem wanem long yumi yet? Yumi wan wan i bin putim mak bilong givim samting? Pol i tokim ol brata long makim taim bilong givim samting, na bihainim dispela oltaim. Em i tok: “Long olgeta Sande yupela olgeta wan wan i mas tilim mani yupela i bin kisim long dispela wik, na putim hap i stap long ol haus bilong yupela yet.” (1 Ko 16:1, 2) Yumi wantaim ol pikinini bilong yumi i ken bihainim dispela pasin bilong givim mani.
5 Long wanpela taim yu ting i stret long mekim, toktok wantaim Baibel-stadi bilong yu long ol samting bilong kontribusen. Yu ken tok olsem ol Witnes Bilong Jehova ol i amamas long lusim bikpela hap taim na mani bilong ol long mekim ol Baibel-stadi i no gat pe. Tasol bilong helpim wok bilong oganaisesen bilong ol, olsem baim ol samting bilong Haus Kingdom, yumi mas givim mani.
6 Stori wantaim Baibel-stadi bilong yu long ol tok i stap long 2 Korin 9:7 na Luk 21:1-4, na stori olsem pasin bilong laikim tru narapela i kirapim yumi long givim samting. Pasin Kristen bilong givim samting em i gutpela wok tru bilong mekim na long dispela rot yumi inap kamapim bel bilong yumi olsem yumi laikim tru Jehova na ol brata bilong yumi. Ol Baibel-stadi i wok long kamap strong ol bai amamas long kisim save long ol dispela samting.
7 Ol elda i mas stretim rot na bai i gat ol bokis kontribusen i stap long Haus Kingdom long wanpela ples ol brata inap mekim wok long en, na ol bokis i mas i gat rait i makim klia wok bilong ol.—Lukim “Askim.”
8 Planti kongrigesen i bin pasim tok long salim sampela mani bilong kongrigesen i go long Sosaiti long olgeta mun bilong helpim wok bilong autim tok. Em gutpela pasin ol i mekim na Sosaiti i pilim tru. Nau long dispela taim, klostu olgeta mani bilong helpim wok hia long Papua Niugini em i kam long ol brata bilong yumi long ol narapela kantri; sampela ol i gat planti mani na sampela nogat. Sapos yumi tingting na beten long dispela samting, na skelim gut pastaim hamas yumi inap givim, ating bai yumi inap givim hap mani moa bambai yumi ken mekim ol wok em samting bilong yumi yet i mas mekim.—Ga 6:5.
9 Maski yumi gat planti mani o nogat, yumi inap givim sampela samting na Jehova i ken amamas long en. Em i bin givim planti gutpela samting long yumi, na maski wanem wanem samting yumi mekim bilong tenkyu long em, dispela i liklik samting tasol sapos yumi skelim wantaim ol planti samting Jehova i bin givim long yumi. Olsem na i stret yumi mas givim bel long mekim olgeta samting yumi inap mekim bilong tenkyu long em! “Bai mi mekim ofa bilong tenkyu long yu, na bai mi prea long yu.”—Sng 116:17.
This article is unique to PNG.