Mekim Stadi Long Buk Nambawan Man Tru i Winim Olgeta Narapela Man
1 Long wik i kirap long Mas 17, bai yumi kirap mekim stadi long buk Nambawan Man Tru i Winim Olgeta Narapela Man long ol Buk-Stadi Bilong Kongrigesen. Yumi amamas tru long stadi gen long i stap na wok bilong Krais Jisas! Dispela buk i narapela kain liklik long ol narapela buk yumi bin stadi long en, olsem na em hia sampela tok Sosaiti i bin kamapim bilong makim gutpela rot bilong mekim stadi long dispela buk taim yumi mekim stadi long en long pastaim.
2 Ol pes i no gat namba long en, olsem na long sedyul bilong Buk-Stadi i stap long Wok Kingdom, ol i putim lista bilong ol sapta yumi mas mekim wok long en, olsem tripela o fopela sapta long olgeta wik. Sapta 35, 111, na 116, i longpela liklik, olsem na ol i brukim long tupela hap. Wanpela brata i save gut long kaunim tok em i ken kaunim wanpela sapta olgeta (o long ol sapta olsem 35, 111, na 116, em i ken kaunim ol paragraf bilong wanpela het-tok). Bihain, brata i lukautim Buk-Stadi i ken kamapim ol askim i stap long pinis bilong sapta i stret long sapta o hap bilong sapta em brata i kaunim pinis. Ol bekim i stap nabaut long sapta. Gutpela sapos yupela i bekim sotpela tok i kamapim klia ol tok bilong dispela stadi.
3 Bihain, sapos i gat taim, kaunim olgeta skripsa i stap long pinis bilong sapta. Sapos sampela skripsa i longpela liklik, brukim na bai ol narapela narapela pablisa i ken kaunim, na bihain sampela i ken stori long ol dispela tok. Gutpela sapos brata i lukautim Buk-Stadi i redim gut sampela askim bilong kirapim tingting bilong ol brata sista na bai ol tok ol i bekim inap helpim ol narapela long save olsem wanem ol dispela skripsa i stret long ol tok bilong buk. Olgeta askim na bekim i mas helpim ol brata sista long tingim gut Krais Jisas na ol tok na wok samting em i bin mekim.
4 Buk Nambawan Man Tru i stori long Jisas na ol samting em i bin mekim—buk i stori long ol samting i bin kamap pastaim na i stori i go i go long ol samting i bin kamap bihain. Taim yu kaunim ol dispela stori, yu ken tingim gut na i olsem yu yet yu lukim ol dispela samting long tingting bilong yu, na dispela bai helpim yu na bai yu no lusim tingting long en. Olsem na yu mas lukim gut ol piksa i gat kala kala na mekim wok long mep i stap long kirap bilong buk.
5 Ol brata sista i mas redim gut ol tok bilong stadi bambai Buk-Stadi inap kamap gutpela. Brata i lukautim Buk-Stadi em tu i mas redim gut stadi long olgeta wik na bai em inap helpim ol brata sista long save gut long dispela nambawan man tru i winim olgeta narapela man, em Bikpela bilong yumi na Man bilong kisim bek yumi, em Krais Jisas.
This is a repeat of article in km 10/92 taken from km-E 9/92 “Studying The Greatest Man Who Ever Lived.”