Em i Gutpela Tru Long Go Oltaim Long Ol Miting!
1 Inap planti yia, ol gavman long Isten Yurop i tambuim planti brata sista bilong yumi long mekim ol miting. Tingim bikpela amamas ol i kisim taim ol gavman i rausim tambu na ol i stap fri long bung wantaim!
2 Wanpela wasman sekit i go lukim wanpela bilong ol dispela kongrigesen, na em i tok olsem: “Long Tunde apinun, long namba wan de bilong mi long go lukim dispela kongrigesen, masin bilong hatim haus em i bagarap. Long ausait, ples i kol nogut tru, na insait, rum i kol inap 5 digri Selsias. Ol brata sista i sindaun, ol i pasim ol saket, laplap bilong karamapim het, han-glav, hat, na strongpela su. I no gat wanpela inap opim Baibel na lukim ol tok, long wanem, i hatwok long opim ol pes. Mi pasim saket na mi sanap long pletfom, mi kol nogut tru, na taim mi toktok mi inap lukim smok i kamap long maus bilong mi. Tasol wanpela samting mi tingim tru em olsem, i no gat wanpela bilong ol i toktok planti. Olgeta brata sista i tok, em i gutpela tru long ol inap kam bung olsem long dispela miting!” Ol dispela brata sista i no bin tingting liklik long lusim dispela miting!
3 Yumi Gat Wankain Tingting? Yu save amamas long bung wantaim long ol miting bilong kongrigesen long olgeta wik na i no gat wanpela samting bilong pasim yumi? O yu ting taim yumi stap gutpela na i no gat hevi, ol miting i no bikpela samting? Sampela taim i hatwok long go oltaim long ol miting, na ating sampela taim i gat gutpela as na yumi no go long ol miting. Tasol no ken lusim tingting, i gat sampela long kongrigesen ol i lapun, ol i gat bikpela sik, sampela hap bilong skin bilong ol i bagarap, ol i gat planti wok bilong mekim, na ol i gat ol narapela bikpela wok, tasol ol i tingim ol miting i bikpela samting na long klostu olgeta taim ol i save go long ol miting. Ol i stap olsem gutpela piksa yumi ken bihainim!—Skelim wantaim Luk 2:37.
4 Yumi mas helpim lotu i tru na go long olgeta miting Kristen bilong yumi na dispela i mas kamap olsem pasin bilong yumi. Yumi mas mekim olsem, maski em liklik Buk-Stadi o wanpela bikpela kibung. Bilong wanem yumi mas ting em i bikpela samting long go oltaim long ol dispela bung? Long wanem, God yet i tok yumi mas bung wantaim. Tasol i gat sampela narapela bikpela as na yumi mas mekim olsem. Yumi olgeta i mas kisim ol tok bilong skulim yumi i kam long God, na tu, spirit holi i mas helpim yumi, em samting yumi inap kisim long ol miting. (Mt 18:20) Taim yumi bung wantaim ol brata sista bilong yumi, narapela i save strongim narapela.—Hi 10:24, 25.
5 Long taim bodi bilong Jisas i kamap narakain, Pita i tok, “Tisa, yumi stap hia, em i gutpela.” (Lu 9:33) Yumi mas i gat wankain tingting long olgeta miting Kristen bilong yumi. Tru tumas, em i gutpela tru long go oltaim long ol miting!