Askim

◼ Sapos long ples wok Kristen i gat wok long karim gan, stik, spia, o wanpela samting bilong pait long ol man, i orait long em i kisim kain wok olsem o nogat?

¹ Pasin bilong pait na bagarapim man i go bikpela na planti bos bilong wok ol i laik bai ol wokman bilong ol i mas karim gan samting. Ating ol sekyuriti bilong was long ol haus beng na ol narapela bisnis samting, na ol polis, ol i mas karim gan samting bambai ol i ken holim yet dispela wok bilong skin.

² Tasol planti Witnes Bilong Jehova i tingim tok bilong Aisaia 2:4 na ol i save abrusim ol kain wok mani olsem. Maski dispela wok i bilong lukautim ol man (o ol haus samting bilong ol), man i bihainim Jisas i mas wok oltaim long i stap wanbel wantaim ol man. (Ro 12:​17, 18) Kristen i mas tingim dispela samting: ‘Sapos wanpela samting i kamap na mi sut long gan o paitim man long wanpela samting, em inap bagarapim laip bilong dispela man. Na sapos mi mekim olsem, long ai bilong Jehova bai mi gat bikpela asua long blut bilong dispela man. Mi redi long karim hevi bilong dispela samting o olsem wanem?’​—⁠Sng 51⁠:⁠14.

³ Kristen i mas painim wanpela wok i no gat dispela pasin bilong karim gan samting. Sampela Witnes i save toktok wantaim bos long dispela samting na bos i senisim wok bilong ol na ol i no gat wok long holim gan samting. Tasol sapos bos i no inap senisim wok bilong em, orait, Kristen i mas painim narapela wok.

⁴ Tasol sapos man nogut i laik bagarapim Kristen, orait, Kristen i ken mekim sampela samting bilong sakim dispela man na bai Kristen i gat rot long ranawe. Tasol i no gat wanpela taim na i orait long Kristen i ken holim gan samting bilong lukautim skin bilong em, na em i no ken kirap long kros pait na wok long bagarapim man, maski dispela man em i raskol.

⁵ Sapos long ples wok brata i gat wok long karim gan, spia, banara, o stik samting, ol elda i ken givim 6-pela mun long em bilong senisim dispela wok bilong em. Sapos em i no mekim, i olsem em i no bihainim stretpela pasin. Bai em i no inap holim wanpela wok insait long kongrigesen. Na em i no inap kamap elda o wokman o painia. (1 Ti 3⁠:2; Ta 1⁠:​5, 6)​—⁠Lukim w84 2/1 p. 20-22; w73-E 2/15 p. 127, 128.

This is a repeat of article in km 4/95 “Askim,” unique to PNG. Also repeated in km 10/01.