Ol Toksave

◼ Ol samting bilong tilim long Novemba: Buk Yu Inap i Stap Oltaim Long Paradais Long Graun long K2.00. Disemba: Wanpela bilong dispela tupela buk: Nambawan Man Tru i Winim Olgeta Narapela Man, na Baibel Stori Buk Bilong Mi; sapos i stret yu ken tilim Baibel New World Translation. Janueri: Wanpela bilong ol liklik buk em ol i daunim pe bilong en sapos i gat sampela i stap yet long kongrigesen, o buk Yu Inap i Stap Oltaim Long Paradais Long Graun. Februeri: Wanpela bilong ol buk em ol i daunim pe bilong en sapos i gat sampela i stap long kongrigesen, o buk Stap Oltaim. Mas: Buk Save i Bringim Man Long Laip Oltaim.

◼ Long nau rot i op bilong planti manmeri i ken raun long ol narapela kantri. Olsem na planti brata sista i save stretim rot bilong i go raun long ol narapela kantri. Planti taim ol i save askim ol brens-ofis bilong Sosaiti long helpim ol long kisim save long sampela samting. Ol brens-ofis i amamas long givim atres na telefon namba bilong Haus Kingdom na taim bilong ol miting, na dispela i ken helpim ol brata sista long bung wantaim kongrigesen long dispela hap. Na tu, ol i ken helpim ol brata long save olsem wanem ol inap i go lukim brens-ofis. Tasol sampela samting moa i save kamap. Planti brata sista i save askim brens-ofis long helpim ol long kisim save long ol samting bilong helpim ol long raun, na ples slip, na ol samting ol turis i save go lukim, na ol kain samting olsem. Brens-ofis i no gat ol samting bilong mekim dispela kain wok, na tu, ol i no gat taim bilong mekim olsem. Mipela i laik kirapim ol brata sista long askim ol lain i gat wok long helpim ol turis samting bambai ol i ken helpim ol.

◼ Ol kongrigesen i ken kirap nau long putim oda bilong kisim yiabuk bilong 1999 wantaim oda bilong litresa bilong Novemba. Yupela inap kisim tu ol yiabuk long ol narapela tok ples. Olsem: Tok Finlan, Frans, Indonisia, Japan, Jemani, Korea na Spen. Inap long mipela i salim ol yiabuk i kam, mipela bai raitim long pepa Invoice bilong kongrigesen olsem “Mipela bai salim bihain.” Ol yiabuk i gat lo bilong baim kwik. Ol painia oltaim na painia salim i bin kirap mekim wok paslain long Julai 1, 1998, ol i ken kisim nating wanpela. Sapos yupela i givim nating ol yiabuk long ol painia, orait long Pepa Bilong Salim Mani na Singaut Long Kredit, yupela i mas raitim hamas buk ol painia i bin kisim nating.

◼ Pe bilong Buk Baibel skin bilong en i blakpela na i gat sipa, em K30.00 long ol pablisa na ol painia.