Nupela Program Bilong Ol Kibung Bilong 1999
1 Nem bilong kibung sekit kirap long Februeri, em “Bihainim Ol Lo Bilong God na Stap Laip.” (Snd 4:4) Dispela kibung bai kamapim klia bilong wanem pasin bilong bihainim ol lo bilong God i no save givim hevi long yumi. Na tu, em bai kamapim klia olsem wanem pasin bilong mekim laik bilong God inap givim nupela strong long yumi na kisim amamas tru, na tu, yumi inap wetim ol gutpela samting i kamap long bihain.—Mt 11:28-30; Jo 13:17.
2 Wanpela tok i gat 3-pela hap bai stori long ol samting yumi ken mekim bilong kamapim olsem yumi laikim God na ol brata bilong yumi. (Jo 13:34, 35; 1 Jo 5:3) Na program bai kamapim tu ol gutpela tok bilong Song 19 na 119 bilong helpim yumi.
3 Wasman distrik bai mekim pablik-tok, nem bilong en “Pret Long God na Bihainim Ol Lo Bilong Em.” (Sav 12:13) Laspela tok bilong wasman sekit bai soim yumi, olsem wanem ol yangpela i ken stap amamas long nau na bilong wanem ol i ken tingting long kisim laip oltaim long bihain. Wasman distrik bai mekim laspela tok na em bai kamapim klia olsem, taim yumi bihainim lo bilong Baibel long laikim tru ol narapela dispela bai helpim yumi long planti rot.—Je 2:8.
4 Nem bilong bikpela de kibung bilong yumi em “Yumi Mas Tenkyu Long Kaikai Yumi Kisim Long Tebol Bilong Jehova.” (Ais 65:14; 1 Ko 10:21) Dispela bai strongim yumi long putim pasin bilong lotuim Jehova i mas stap olsem nambawan bikpela samting long laip bilong yumi. (Sng 27:4) Nem bilong tok bilong wasman sekit em “Skelim Gut Ol Tingting i Stap Long Bel,” na dispela tok bai helpim yumi long skelim pasin bilong yumi long go long ol miting. Wanpela brata em brens bai salim, em bai helpim yumi long save olsem wanem yumi ken “Kisim Kaikai Long Tebol Bilong Jehova na Stap Strong Long Ol Samting Bilong Spirit.” Na long kibung bai i gat sampela tok bilong helpim ol yangpela long oganaisesen bilong Jehova long sanap strong yet long mekim wok bilong Jehova. Nem bilong laspela tok brata bilong brens bai mekim em “Kisim Strong Long Ol Samting Bilong Spirit na Bai Yu No Pret Long Autim tok,” na dispela tok bai kamapim olsem wanem ol samting yumi save kisim long rot bilong kongrigesen em i save inapim yumi long autim tok bilong Kingdom na yumi no pret. Yumi olgeta i laik bai ol tok bilong dispela program i helpim yumi, a?
5 Ol pablisa i bihainim tok bilong Krais na ol i laik kisim baptais long wanpela bilong dispela tupela kibung, ol i ken toktok wantaim wasman siaman, na em bai stretim ol samting.—Mt 28:19, 20.
6 Tru tumas, planti gutpela kaikai bilong spirit bai kamap long dispela tupela kibung, em samting yumi olgeta i no laik lus long en!
This article unique to PNG.