Autim Tok Long Ol Teritori i Stap Longwe Long Julai i Go Inap Septemba
1 Jisas i bin tok olsem ol bai autim gutnius “i go inap long olgeta hap bilong graun.” Long Papua Niugini, i gat ol bikpela hap teritori em ol i no stap aninit long wanpela kongrigesen, na sampela kongrigesen i save autim tok wan wan taim tasol long ol teritori bilong ol i stap longwe. Olsem na long mun Julai, Ogas, na Septemba, mipela i laik kirapim olgeta kongrigesen na grup long wok strong long autim tok long ol teritori em ol i no save autim tok planti taim long en.
2 Bai Yumi Go We? Long ol yia i go pinis, Sosaiti i bin makim ol longwe teritori ol kongrigesen i ken wok long en long olgeta wan wan yia. Long olgeta yia, olgeta kongrigesen i mas autim tok long ol dispela teritori em Sosaiti i bin makim bilong ol long bipo. Sapos wanpela kongrigesen i lukautim wanpela grup o sampela pablisa i stap longwe, orait kongrigesen i mas autim tok long teritori i stap namel long kongrigesen na dispela grup o pablisa. Sapos wanpela kongrigesen i no klia gut ol i mas autim tok long wanem teritori, orait ol i mas rait long brens-ofis bilong kisim sampela helpim.
3 Ating sampela kongrigesen i save autim tok planti taim long ol teritori bilong ol i stap longwe. Sapos olsem, orait ol elda i ken toksave long wasman sekit na ating em bai tokim ol long helpim wanpela kongrigesen i stap klostu. O em i ken tokim ol long wok long narapela teritori em i no stap aninit long wanpela kongrigesen.
4 Mi Ken Redi Olsem Wanem? Bilong autim gut tok long ol teritori i stap longwe, yumi mas stretim gut ol samting. Wanem ol buk samting yu mas kisim? Sapos yu gat sampela olpela magasin, yu inap tilim ol dispela. Na tu, em i gutpela taim tru long tilim buk Stap Oltaim long pe i daun. I gutpela tu long tilim buk Save na buklet Yumi Mas Mekim Wanem? Lain elda bai makim ol de bilong autim tok long longwe teritori na ol i mas toksave long kongrigesen sampela wik paslain. Ating yupela i mas kisim sampela moa PMV samting. Wasman bilong wok autim tok bai lukautim dispela wok bilong stretim ol samting na em i mas toksave long ol pablisa long hamas pe bilong baim PMV samting.
5 Taim bilong ren i save senis senis long dispela kantri, olsem na ating sampela kongrigesen i no inap pinisim teritori insait long 3-pela mun. Sapos olsem, orait ol elda bai stretim sampela rot bilong autim tok long ol dispela teritori long ol mun bihain. Yumi ken amamas yet long gutpela wok yumi gat bilong autim tok long dispela ‘taim bilong God i mekim gut long ol manmeri,’ i go inap long ol longwe hap bilong teritori bilong yumi.—Ais 61:2.
This article is unique to PNG.