Yu Save Givim Kontribiusen?

Jehova i givim ol samting bambai yumi gat ol samting bilong spirit yumi mas kisim. Planti bilong ol dispela samting Jehova i givim em ol buk, Baibel, ol volium bilong Wastaua na Kirap!, ol video, na ol kaset. Ol i lusim bikpela mani tru bilong wokim ol dispela samting. Ol i save yusim ol kontribiusen yumi save givim bilong inapim pe bilong ol dispela samting. Taim yumi kisim ol litresa bilong yumi yet, yumi no ken ting ol narapela bai givim kontribiusen bilong inapim pe bilong ol samting yumi kisim. (Fl. 2:⁠4) Olgeta pablisa i mas tingim olsem em i wok bilong em yet long givim kontribiusen. Planti pablisa i save skelim pe ol kampani inap makim long kain buk olsem sapos ol i wokim, na ol i tingim dispela na givim kontribiusen. Olsem: Dispela Baibel ol i penim gol long arere bilong en (deluxe), pe bilong en inap olsem K40.00 o antap liklik; ol kain buk olsem Insight on the Scriptures, na Index, pe bilong ol inap olsem K40.00 o antap liklik; kalenda i gat ol piksa i gat kala em K5.00 samting, ol musik CD em inap olsem K30.00; ol kaset i gat singsing samting em inap olsem K7.00; na ol video ol i save salim long K30.00 o antap liklik. Sapos yumi no givim kontribiusen inap long karamapim pe bilong ol dispela buk samting, dispela inap mekim na oganaisesen bilong yumi i no inap wokim moa ol samting bilong helpim wok autim tok long olgeta hap. Olsem na yumi olgeta i mas skelim gut pe bilong ol buk samting taim yumi putim oda bilong kisim.​—⁠Lu. 14:28.

This article is unique to PNG.