Riviu Bilong Skul Tiokratik Bilong Autim Tok
Riviu bilong ol tok i bin kamap insait long Skul, kirap long Me 7 i go long Ogas 20, 2001. Long narapela hap pepa, traim raitim planti bekim insait long taim bilong mekim Riviu.
[Harim: Long taim bilong mekim Riviu long Skul, yu ken lukim Baibel tasol bilong helpim yu long bekim ol askim. Long pinis bilong ol askim i gat mak bilong ol buk samting, na taim yu kisim dispela pepa i go long haus paslain long taim bilong mekim Riviu, yu ken lukim ol dispela buk samting bilong helpim yu long raitim stret ol bekim bilong Riviu long Skul. Sampela taim ol i no putim namba bilong pes na paragraf bilong Wastaua.]
Makim ol dispela tok I Stret o I No Stret:
1. Dispela beten long Nehemia 2:4 em beten Nehemia i mekim taim em i bel hevi, na em i no bin tingting long mekim dispela beten. [1, Baibel ritim bilong wik; lukim w86-E 2/15 p. 25 par. 8.] I No Stret. Nehemia i tingim dispela bagarap bai painim Jerusalem na em i bin beten planti long “san na long nait” inap sampela taim (1:4, 6); taim i gat rot Nehemia i beten gen, olsem na em i mekim gen ol samting em i mekim pinis planti taim.
2. Dispela tok “kongrigesen” ol i kisim long tok Grik ek·kle·siʹa na ol i tanim, em i makim wanpela lain i save bung wantaim na i stap wanbel, na i makim tu olsem narapela i helpim narapela. [2, w99 5/15 p. 25 par. 4] I Stret.
3. Ol wokboi bilong Jehova i save abrusim ol pasin tumbuna long tingim ol man i dai pinis, em ol pasin i pait long tok bilong Baibel, tasol ol i no save sakim olgeta pasin ol man i save mekim taim man i dai. (Jo. 19:40) [7, rs p. 87 par. 4] I Stret.
4. Long taim bilong Jop, no gat narapela man i bin stap gut long Jehova—Jop wanpela tasol. (Jop 1:8) [6, Baibel ritim bilong wik; lukim w92 8/1 p. 31 par. 3-4.] I No Stret. Tru ating i no gat narapela man i winim Jop long i stap gut long God, tasol Elihu, em man i bin stretim Jop, em i litimapim trupela God na God i orait long em olsem stretpela man; na ating i gat sampela moa ol i bin stap gut long God.
5. Sol, o Pol, i bin wokim ol haus sel bilong lukautim em yet long ol samting bilong skin na dispela i makim olsem em i kamap long wanpela famili i no gat planti samting. (Ap. 18:2, 3) [7, w99 5/15 p. 30 par. 2–p. 31 par. 1] I No Stret. Pol em i wanpela man bilong Rom, na em i bin raitim gut ol buk long tok Grik, na Gamaliel, em wanpela tisa i gat nem, i bin skulim em. (Ap. 22:3, 27)
6. Maski Devit i bin mekim bikpela sin, Jehova i tok olsem “em i bin strong long bihainim olgeta lo bilong mi.” Em i tok olsem, long wanem, Devit i tanim bel na em i gat ol gutpela pasin. (1 Kin. 14:8) [9, w99 6/15 p. 11 par. 4] I Stret.
7. Sapos samting yumi tok promis long mekim em i no brukim ol lo bilong Baibel, orait yumi mas wok strong long truim tok promis bilong yumi, maski bihain yumi luksave olsem em i hatwok long mekim. (Sng. 15:4) [13, Baibel ritim bilong wik; lukim w89-E 9/15 p. 28 par. 5.] I Stret.
8. Song 22:1 i makim olsem hevi i painim Devit na inap liklik taim tasol em i lusim bilip. [14, Baibel ritim bilong wik; lukim w86-E 8/15 p. 20 par. 19.] I No Stret. Ol samting Devit i mekim long taim bikpela hevi i painim em, dispela i no makim olsem em i lusim bilip, nogat, long wanem, bihain long dispela tok em i beten long God i kisim em bek. (Sng. 22:16-19)
9. Wanpela Kristen inap “pundaun,” olsem tingting planti, o bel hevi, o bisnis i no wok gut na mani bilong em i lus, tasol long rot bilong helpim em i kisim long spirit holi bilong God na ol gutpela man i save lotuim God, dispela Kristen i no inap “bagarap” olgeta. (Sng. 37:23, 24) [16, Baibel ritim bilong wik; lukim w86-E 11/1 p. 30 par. 14.] I Stret.
10. Stat sapta 1 i tok olsem God i wokim olgeta samting long graun insait long 6-pela de i gat 24 aua 24 aua long en. [16, rs p. 102 par. 2] I No Stret. Baibel i no tok ol dispela de i gat 24 aua 24 aua long en; planti taim Baibel i kolim dispela tok “de” bilong makim bikpela hap taim. (2 Pi. 3:8)
Bekim ol dispela askim:
11. Olsem wanem Esra na ol wokman bilong en i helpim ol manmeri long save gut long Lo? (Neh. 8:8) [2, Baibel ritim bilong wik; lukim w86-E 2/15 p. 26 par. 4.] Esra na ol wokman bilong em i kolim klia na kamapim gut ol tok, na tu ol i kamapim klia ol tok bilong Lo na kamapim as tingting bilong en, bambai ol man inap kisim gut ol tok.
12. Wanem samting i mekim na yumi save “amamas long Bikpela”? (Neh. 8:10) [2, Baibel ritim bilong wik; lukim w86-E 2/15 p. 26 par. 9.] Ol tok i stap klostu i kamapim olsem yumi “amamas long Bikpela” taim yumi kisim gut insait bilong ol tok bilong God, na yumi bihainim dispela tok na daun long ol man Jehova i makim bilong stiaim yumi na harim tok bilong ol.
13. “Sampela lain manmeri i bihainim laik bilong ol yet na i go i stap long Jerusalem,” bilong wanem ol i kisim blesing? (Neh. 11:2) [3, Baibel ritim bilong wik; lukim w86-E 2/15 p. 26 par. 12.] Ol i mas tromoi sampela mani na kisim sampela hatwok bilong lusim ples bilong ol na go sindaun long Jerusalem; na ating bagarap inap painim ol lain i stap long dispela biktaun; dispela samting ol i mekim i olsem gutpela ofa tru na God i bin blesim ol.
14. Bilong wanem Esta i no hariap long tokim king long tingting bilong em? (Est. 5:6-8) [5, Baibel ritim bilong wik; lukim w86-E 3/15 p. 24 par. 18.] I no olsem em i no gat strongpela bel, nogat, long wanem, em i bin kam lukim king maski indai inap painim em, tasol ating em i laik mekim gut bel bilong king pastaim na bai king i orait long em; na tu, yumi save God i stiaim ol dispela samting, long wanem, insait long dispela hap taim i gat sampela samting i bin kamap. (Kain tok olsem em inap)
15. Buk Jop i bekim wanem tupela bikpela askim? [6, bsi01 p. 15 par. 1] Buk i bekim ol dispela askim: Bilong wanem ol man i no gat asua ol i kisim pen na hevi? Bilong wanem God i larim pasin nogut i stap long graun?
16. Bilong wanem tok bilong Elifas i bagarapim bel bilong Jop na i no strongim em? (Jop 21:34; 22:2, 3) [9, Baibel ritim bilong wik; lukim w95 2/15 p. 27 par. 5-6.] Ol tok em i kamapim em tingting bilong em yet na i no kam long God; ol tok em i kamapim em i no tru, na ol tingting kranki i as bilong en.
17. Ol Sam em wanem samting? [12, bsi01 p. 19 par. 2] Ol Sam em ol singsing bilong lotu o ol sotpela stori ol i mekim wok long en bilong litimapim nem bilong God na lotuim em.
18. Olsem i stap long Song 2:1, ol lain manmeri i save “tok nating” long wanem samting? [12, Baibel ritim bilong wik; lukim w86-E 8/15 p. 20 par. 5.] Kirap long 1914 ol lain bilong graun i wok long toktok long (o tingting long) olsem wanem ol i ken holim yet strong na namba bilong ol long bosim ol man, na ol i no laik daun long Jisas Krais olsem King Jehova i bin makim.
19. Wok Filip i mekim bilong autim tok long ol Samaria na man Itiopia, em inap skulim yumi olsem wanem long pasin bilong laikim olgeta man na i no sampela lain tasol? (Ap. 8:6-13, 26-39) [15, w99 7/15 p. 25 par. 2] Yumi no ken ting olsem ol man bilong wanpela lain, o skin, o ol man i gat namba samting, ol i no inap harim gutnius, nogat; yumi mas autim tok bilong Kingdom long “olgeta kain man.” (1 Ko. 9:19-23)
20. Jop i tok piksa long wanem samting bilong kamapim bilip bilong em olsem God bai kirapim em bek long matmat, em Jop i tingim olsem ples bilong hait na malolo long ol hevi bilong em? (Jop 14:7, 13-15) [7, Baibel ritim bilong wik; lukim w00 5/15 p. 27 par. 7–p. 28 par. 1.] Jop i tok piksa long wanpela diwai (ating em diwai oliv) olsem ol bai katim o em bai drai, long wanem, ating bikpela san i bin stap inap longtaim na em i drai, na bihainim em bai kru na kamap gen.
Raitim wanem hap tok i stret bilong pinisim ol dispela tok:
21. Esta 8:17 i tok olsem ol manmeri i “joinim lain bilong ol” Juda, na olsem tasol long nau, “planti manmeri tru” bilong “ol arapela sipsip” i kam bung na wok wantaim lain remnan em God i bin makim ol. (KTH 7:9; Jo. 10:16; Sek. 8:23) [5, Baibel ritim bilong wik, lukim w86-E 3/15 p. 25 par. 14.]
22. Olsem Aposel 1:7 i makim, maski Jehova i save tingim tru taim, de bilong em long kotim ol manmeri bai kamap wantu tasol olsem stilman, long taim ol man i no tingim. (2 Pi. 3:10) [8, w99 6/1 p. 5 par. 1-2]
23. Long 2 Pita 3:7, 10, dispela tok “skai” na “graun” i olsem tok piksa; ol ves klostu i kamapim olsem “graun” i makim ol man i bin givim baksait long God, o ol man nogut bilong dispela graun. [11, rs p. 149 par. 2-4]
24. Yumi inap toktok gut wantaim sapos narapela i bilip long narapela na narapela i save gut long tingting bilong narapela. Ol dispela pasin i save kamap taim tupela marit i tingim marit bilong ol olsem samting bilong i stap inap long taim ol i dai, na ol i wok strong long helpim marit bilong ol long wok gut. [14, w99 7/15 p. 21 par. 3]
25. Pasin bilong ol gutpela wanlain i ken helpim yumi long kisim na bihainim stretpela pasin na pasin bilong tingim ol samting bilong spirit, na em i save helpim yumi long givim bel long mekim wok bilong Jehova. [16, w99 8/1 p. 24 par. 3]
Makim wanem tok i stret:
26. Mordekai i “sindaun long dua bilong king,” dispela i makim olsem em i (bodi-gad bilong king; wanpela ofisa bilong King Serksis; wet long bungim king). (Est. 2:19, 20) [4, Baibel ritim bilong wik; lukim w86-E 3/15 p. 24 par. 9.]
27. Olsem Jop 19:25-27 i tok, Jop i kamapim bilip bilong em olsem em bai “lukim God,” na dispela i makim olsem em bai (lukim God long rot bilong driman samting; kirap bek na kisim laip long heven; kisim stretpela save long pasin bilong Jehova). [8, Baibel ritim bilong wik; lukim w94 11/15 p. 19 par. 17.]
28. Ol man i save tingim pasin bilong Jop long (laikim ol narapela; mekim gutpela pasin; sanap strong na karim hevi). (Jems 5:11) [11, bsi01 p. 18 par. 41]
29. Ol i raitim Buk Song insait long bikpela hap taim, inap olsem (tri handet; faiv handet; wan tausen) yia. [12, bsi01 p. 20 par. 4]
30. (Devit; Asap; Esra) em laspela man i bin bungim ol song na mekim i kamap wanpela buk. [13, bsi01 p. 20 par. 6]
Putim wanem skripsa i stret long ol dispela tok:
Neh. 3:5; Sng. 12:2; 19:7; 2 Ti. 3:16, 17; Jems 5:14-16
31. Yumi mas i gat laik long taitim bun na mekim bikpela wok moa, na yumi no ken mekim pasin antap na surik long dispela wok na yumi ting pasin bilong mekim bikpela wok i daunim nem bilong yumi. [Neh. 3:5] [1, Baibel ritim bilong wik; lukim w86-E 2/15 p. 25 par. 12, 19.]
32. Kristen i bin mekim bikpela rong tru em i mas autim sin bilong em long ol elda. [Jems 5:14-16] [4, rs p. 36 par. 1]
33. Long bipo, God i bin kamapim toksave na tok profet na skulim ol lain bilong em long rot bilong driman, tasol long nau em i kamapim ol tok bilong em long kisim bek yumi long rot bilong Baibel. [2 Ti. 3: 16, 17] [8, rs p. 97 par. 4]
34. Sapos yumi laik stap pren bilong God, yumi mas mekim tok tru tasol na yumi no ken giaman na stap man bilong tupela maus. [Sng. 12:2] [13, Baibel ritim bilong wik; lukim w89-E 9/15 p. 26 par. 7.]
35. Taim yumi bihainim lo bilong Jehova, dispela i save givim nupela strong long yumi na helpim yumi. [Sng. 19:7] [14, Baibel ritim bilong wik; lukim w00 10/1 p. 13 par. 4.]