‘Yupela i No Ken Stap Wantaim Ol’
1 Jehova i gat stretpela pasin. Ol lo em i bin givim long lain bilong em long bipo na long nau i kamapim klia stretpela pasin bilong em. Jehova i nolaik tru long pasin i no stret na ol man i mekim pasin nogut. I no gat wanpela man nogut bai go insait long Kingdom bilong God. Ol man i save bihainim ol stretpela lo bilong Jehova, ol tasol inap kisim laip oltaim.—Lo 32:4; 1 Ko. 6:9, 10.
2 Taim wanpela Witnes Bilong Jehova long laik bilong em yet em i brukim ol stretpela lo bilong God na i no tanim bel, orait kongrigesen Kristen bai rausim em. (1 Ko. 5:11-13) Ol i mas mekim olsem bilong kongrigesen i ken stap klin na holi. Sapos ol i larim pasin nogut i stap insait long kongrigesen, ol narapela tu bai mekim na dispela bai bagarapim kongrigesen olgeta.
3 Orait ol brata sista i stap gut insait long kongrigesen, ol i mas mekim wanem kain pasin long ol rauspela man? Long rot bilong Tok bilong em, Jehova i soim yumi ol samting em i laik yumi mas mekim. Tingim ol dispela skripsa.
◼ 1 Korin 5:11: “Sapos wanpela man yupela i save kolim brata long Krais, em i mekim pasin pamuk o em i mangal long ol samting bilong ol arapela man o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.”
◼ 2 Jon 10, 11: “Sapos wanpela man . . . i no bringim dispela kain tok i kam, orait yupela i no ken givim gude long em, na yupela i no ken kisim em i go long haus bilong yupela. Man i gude long dispela kain man, em i helpim em long wok nogut bilong em.”
◼ 2 Korin 6:14, 15: “Olsem wanem, stretpela pasin na pasin bilong sakim lo tupela i ken wok bung wantaim? . . . Man i bilip long Krais na man i no bilip, tupela i ken holim wanpela kain tingting, a?”
4 Olgeta dispela skripsa i stret long ol man i bin mekim bikpela rong na i raus long kongrigesen Kristen. Maski ol elda i bin traim long helpim ol long senisim pasin bilong ol, ol i sakim ol stretpela lo bilong Jehova. Olsem na i no stret long ol Kristen i stap gut long God ol i tok gude, toktok wantaim, o bung wantaim ol kain man olsem.—Sng. 139:21, 22.
5 Tasol olsem wanem sapos rauspela man i wanblut bilong yu? Sapos em i poroman marit, o yangpela pikinini i stap yet aninit long lukaut bilong papamama, o brata o susa tru bilong yu na i stap wantaim famili long wanpela haus, orait yumi ken mekim ol samting bilong famili wantaim em, long wanem, taim man i raus em i stap yet olsem wanpela bilong famili bilong em. Tasol yumi bihainim narapela kain pasin sapos rauspela man o man i lusim oganaisesen em i wanblut, tasol em i no stap wantaim famili long wanpela haus. Ating yumi inap abrusim em olgeta na yumi no toktok liklik wantaim em. Sapos i gat sampela tok bilong famili em yumi mas stretim wantaim rauspela man, yumi mas toktok long ol dispela samting tasol, olsem i stret wantaim ol skripsa i stap antap.
6 Taim yumi bihainim ol dispela tok, Jehova i soim yumi pasin yumi mas mekim long ol man i bin lusim ol stretpela lo bilong em. Yumi laik bai ol i kisim stretpela tingting, tanim bel, na kam bek long klinpela kongrigesen Kristen. (Hi. 12:11) Taim man i raus long kongrigesen Kristen, dispela inap kirapim em long kisim stretpela tingting. Dispela i lukautim tu kongrigesen na pasin nogut bilong man i no ken bagarapim kongrigesen.—w77-E p. 348.
This article is unique to PNG.