Mekim Gutpela Wok Long Tilim Ol Buk Samting Bilong Yumi
1 Bilong mekim gutpela wok taim yumi tilim ol nius samting, yumi mas save olsem man i gat laik tru long harim tok o nogat. Olsem wanem yu ken save man i gat laik tru long harim tok? Ating em i amamas long toktok wantaim yu. O em i putim gut yau long tok bilong yu, o em i bekim ol askim bilong yu, o em i kamapim tingting bilong em, dispela samting tu inap soim olsem em i laik harim tok. Taim man i toktok wantaim yu olsem wanpela pren, ating dispela i soim olsem em i gat gutpela pasin. Taim em i lukluk long Baibel taim yu ritim tok, dispela inap makim olsem em i daun long Tok Bilong God. Na taim man i kamapim sampela gutpela tok, dispela tu inap soim olsem em i laik kisim sampela save moa. Taim man i mekim ol kain samting olsem, ating bai em i ritim gut ol nius em i kisim. Yumi mas i gat pasin bilong skelim gut ol samting na bai yumi inap save olsem man i gat gutpela bel o em i laik kisim nating ol samting. Tingim, man inap kisim ol nius sapos em i gat laik tru long harim tok, na i no olsem em i gat mani inap long baim na nau yumi givim long em, nogat.
2 Taim yumi skelim pinis olsem man bilong haus i gat laik tru long harim tok bambai yumi ken givim nius long em, yumi ken tokim em olsem ol volantia i save mekim dispela wok long olgeta hap bilong helpim ol man long kisim save long rot i go long laip oltaim. Ol man i save givim kontribiusen long laik bilong ol yet bilong helpim dispela wok. Orait nau yu ken askim man sapos em i laik helpim wok bilong yumi long rot bilong givim liklik kontribiusen. Sapos man i laik givim, yumi tenkyu long dispela samting. Olgeta pablisa i mas karim wanpela envelop i gat rait i makim olsem em ol kontribiusen ol man i givim. Na long miting i kamap bihain, ol pablisa i mas putim dispela mani olgeta long bokis kontribiusen i bilong helpim wok bilong Sosaiti long olgeta hap. I no stret long pablisa o painia i mekim narapela wok long kontribiusen ol man i givim. Dispela kontribiusen ol man i givim em i no bilong bekim kontribiusen pablisa i bin givim taim em i kisim ol nius samting long Haus Kingdom. Dispela kontribiusen pablisa i bin givim long pastaim em bilong helpim wok long olgeta hap. Taim man i givim kontribiusen long yumi, em i bilip olsem yumi bai putim dispela mani bilong helpim wok bilong lain bilong Jehova long olgeta hap.
3 Ol man i laik givim kontribiusen bilong helpim wok bilong yumi ol inap mekim olsem, tasol sapos ol i laik harim tok na ol bai ritim nius, ol inap kisim ol nius samting maski ol i givim kontribiusen o nogat.
This article is unique to PNG.