Pas i Kam Long Brens

Yes Ol Pablisa Bilong Kingdom:

“God i bin mekim kaikai i kamap.” (1 Ko. 3:⁠6) Yumi bin amamas tru long lukim planti man i kam long Memorial bilong dispela yia. Inap 17,843 manmeri olgeta i bin stap long dispela bikpela bung long Epril 16. Long Papua Niugini, dispela em bikpela lain tru i bung, winim olgeta yia bipo.

Na tu, Jehova i bin blesim ol wok yumi bin mekim long spesel De Magasin long Me 31, 2003. Planti kongrigesen i kamapim olsem ol gutpela samting i bin kamap, na ol pablisa i insait long dispela wok ol i bin kisim bikpela amamas. Wanpela kongrigesen i kamapim olsem klostu olgeta pablisa i bin insait long dispela wok na ol i bin tilim moa long 1,000 magasin long dispela spesel de. Wanpela brata i kirapim dispela wok long moning yet na em i go lukim ol man i amamas long harim tok long setelmen em i stap long en, na bihain, long san, em i wok wantaim ol narapela narapela grup long tilim ol magasin. Em i tilim 140 magasin long dispela spesel De Magasin.

Mipela i amamas long tok olsem ol i wokim pinis wanpela nupela Haus Kingdom long Kokopo, na klostu nau bai ol i pinisim wanpela nupela haus misineri tu long dispela hap. Haus Kingdom i stap klostu long bikrot i go long taun long Kokopo. Mipela i kamapim pinis wanpela nupela tim bilong sanapim ol Haus Kingdom, na ol brata i redi long wokim ol Haus Kingdom long Kimbe, Misima, Tabubil, na Badili.

Inap planti yia pinis mipela i bin toktok long surikim brens-ofis i go bikpela na bai sampela dipatmen long Betel i gat bikpela spes moa, moa yet em Dipatmen Bilong Tanim Tok. Gutpela samting i kamap pinis. Klostu bai plen bilong haus-brens i pinis na mipela i kisim tok orait pinis long ol pepa samting mipela i bin salim i go long ol lain bilong gavman. Mipela i stretim tok pinis wantaim wanpela ensinia i mekim wok long hia, na mipela i gat tingting long dispela wok bai kirap bihain liklik long sampela mun.

Yumi kirapim sevis yia bilong 2004, na mipela i wanbel long beten wantaim yupela olsem Jehova bai wok yet long “mekim kaikai i kamap.”

Ol brata bilong yupela,

P.N.G. Brens-Ofis

This article is unique to PNG.