Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Epril 26, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Mas 1 i go inap long Epril 26, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Taim yumi givim tok, bilong wanem em i gutpela moa long yusim wanpela autlain, wanpela manuskrip nogat? [1, be p. 166 par. 3 na blok namba 2] Taim yumi mekim wok long autlain dispela i mekim na em i isi moa long mekim tok olsem yu toktok wantaim narapela na long kamapim olsem yu pilim tru long bel. Sapos yu tingim odiens, na yu senisim tok bilong kamapim tok i stret long ol, ol bai pilim olsem yu tingim ol.
2. Taim yumi redim ol samting bilong autim tok, olsem wanem yumi ken bungim gut ol tingting yumi laik kamapim na bai i stap olsem autlain long tingting? [2, be p. 167 par. 3] Yu ken tingim wanpela samting planti man long komiuniti i save tingting long en. Tingim samting yu laik stori long en, na kamapim wanpela o tupela skripsa. Redi long kamapim strong olsem long rot bilong Kingdom Bilong Jehova long han bilong Jisas Krais, em bai helpim ol man. Kirapim man i harim tok long bihainim dispela tok yutupela i bin mekim.
3. Mekim wok long Aposel 13:16-41 na Aposel 17:2, 3, na stori long olsem wanem Pol i ‘tok klia gut tru olsem, “Jisas em dispela man God i makim bilong kisim bek ol manmeri bilong en.” ’ (Ap. 9:22) [4, be p. 170 par. 2] Pastaim, Pol i kamapim tok ol i wanbel long en, olsem, ol Juda i tok ol i bilip long Ol Skripsa Hibru na ol i bilipim tok ol dispela skripsa i mekim long Mesaia. Orait bihain, em i kisim ol hap tok bilong ol dispela skripsa i stori long i stap na wok bilong Mesaia na em i stori long olsem wanem ol dispela samting i bin painim Jisas. Bihain Pol i helpim ol long luksave olsem Jisas em i Mesaia o Krais.
4. Wanem sampela gutpela samting i kamap taim yu mekim tok long pasin bilong kamapim tok i stap long tingting? [7, be p. 175 par. 2-5] (1) Tok bilong yu bai i gat laip na bai yu mekim tok long pasin ol man i laik long harim na ol bai amamas. (2) Bai yu inap long lukluk gut long pes bilong ol man. (3) Ol man i harim tok bai pilim olsem yu save gut long ol tok yu laik mekim na yu bilipim tru dispela tok. (4) Bai yu gat rot long senisim liklik tok bilong yu. (5) Dispela bai kirapim tingting bilong yu yet, na helpim yu long stap isi, na yu bai kamapim sampela tingting moa o bai yu kolim gen sampela tok bilong kamapim strong tok yu mekim.
5. Wanem sampela hevi inap kamap long pasin bilong kamapim tok i stap long tingting? Wanem samting bai helpim yumi long abrusim ol dispela hevi? [8, be p. 175 par. 6–p. 176 par. 3] Yumi inap long winim hevi bilong kalapim minit bilong tok taim yumi bihainim gut minit bilong olgeta wan wan hap bilong tok. Yumi inap abrusim pasin bilong bilip tumas long save bilong yumi yet taim yumi daunim yumi yet na tingim olsem yumi stap insait long wanpela program bilong skulim ol man em Jehova yet i Nambawan Tisa bilong en. Long rot bilong redi gut na larim spirit bilong Jehova i helpim yumi, bai yumi inap daunim hevi bilong pret na ting olsem yumi bai lusim tingting long ol tok. (Ais. 30:20; Ro. 12:6-8)
TOK NAMBA 1
6. Olsem Stat 32:24-32 i kamapim, taim Jekop i gat 97 krismas em i mekim wanem bilong kisim blesing long Jehova? Dispela i skulim yumi long wanem samting? [3, w02 8/1 p. 29-31] Jekop i putim laik bilong Jehova i nambawan na em i tingim ol gutpela samting bilong spirit. Em i beten strong askim God long blesim em, na em i kirap bihainim pasin i stret long laik bilong God. Dispela stori i skulim yumi olsem maski hamas krismas bilong yumi o hamas yia yumi mekim wok bilong Jehova, sapos yumi bihainim pasin bilong Jekop long wok strong, dispela inap helpim yumi. Yumi no ken les long wok strong long givim bel olgeta long mekim wok bilong Jehova.
7. Wanem insait bilong dispela tok, “pasin bilong tingting gut”? Olsem wanem dispela pasin inap helpim yumi na bai yumi no pundaun na bel hevi tumas taim wanpela Kristen i mekim wanpela pasin i no stret Kristen i mekim? (Snd. 1:4) [5, w02 8/15 p. 21-22] Tok Hibru ol i tanim olsem “pasin bilong tingting gut,” ol i kisim long wanpela tok i makim pasin bilong “tingim gut na skelim ol samting.” Olsem na pasin bilong tingting gut i makim olsem man i mas skelim gut olsem pasin em i mekim bai kamapim wanem ol samting na dispela bai helpim em long skelim gut pastaim ol samting em i laik mekim. Yumi save, “olgeta manmeri i save mekim sin,” olsem na yumi no ken kirap nogut sapos wanpela brata Kristen i mekim samting i kirapim yumi long kros o i bagarapim bel bilong yumi. Taim yumi save long dispela samting, yumi inap redi na tingting long rot bilong karim dispela hevi. Dispela bai helpim yumi na bai yumi no hariap long kros taim wanpela i bagarapim bel bilong yumi. (1 Kin. 8:46)
8. Olsem wanem ol brata i save mekim pablik tok inap mekim Baibel i stap olsem as bilong tok bilong ol? [6, be p. 52 par. 6–p. 53 par. 5] Em i no ken kamapim tasol ol tok, nogat, em i mas soim olsem wanem tok bilong Baibel i strongim dispela tok em i mekim. Ol skripsa em i makim bilong stori long en em i ken skelim gut, kamapim insait bilong en, mekim tok piksa, na helpim odiens long bihainim tok bilong ol skripsa. Ol brata i mekim pablik tok i mas wok strong long helpim odiens long klia gut long tok bilong Baibel na luksave long wanem samting ol i mas mekim na bai i stret wantaim laik bilong Jehova.
9. Taim yu redim wanpela autlain yu laik kamapim gut ol bikpela tok bilong Baibel autlain i kolim. Bilong mekim olsem yu mas mekim wanem? [7, be p. 54 par. 2-4] Brata i mekim pablik tok i mas makim hamas minit em bai lusim long stori long ol hap tok i stap aninit long wanpela bikpela tok. Em i mas skelim wanem hap tok bai kamapim klia Tok Bilong God, na wanem hap tok bai strongim ol man long laikim Jehova na ol samting em i mekim bilong helpim yumi, na wanem hap tok bai helpim em long kamapim as tingting bilong tok, na wanem hap tok bai helpim tru odiens.
10. Bilong wanem Jehova i givim mana long ol Israel long olgeta wik na mun long ples drai nating? Dispela i skulim yumi long wanem samting? (Lo 8:16) [8, w02 9/1 p. 30 par. 3–p. 31 par. 1] Tru sampela i les pinis long kaikai mana, tasol Jehova i givim dispela kaikai long ol bilong traim ol na skulim ol long kisim pasin daun na bilip long em. (Lo 8:3) Olsem tasol ol samting olsem ol senis i kamap long pasin bilong oganaisesen long mekim wok na ol tok i tru bilong Baibel em lain “wokboi i gat gutpela tingting” i save kamapim inap traim pasin daun bilong yumi. (Mt. 24:45-47)
BAIBEL RITIM BILONG WIK
11. Olsem Stat 37:12-17 i kamapim, wanem samting i wankain long Josep na Jisas? [1, w87-E 5/1 p. 12 par. 12] Maski ol brata bilong em i bel nogut long em, Josep i go bilong helpim ol. (Stt. 37:5-11) Olsem tasol, Jisas i amamas long mekim wok Jehova i givim em hia long graun, maski dispela i makim olsem em i mas karim bikpela pen.
12. Olsem yumi lukim long Stat 42:25-35, olsem wanem pasin sori Josep i soim i wankain long pasin sori em Jisas i kamapim? [2, w87-E 5/1 p. 18 par. 10; p. 19 par. 17] Bihain long em i kisim save olsem ol brata bilong em i tanim bel tru, Josep i mekim pasin marimari long ol na em i pulimapim wit long bek bilong ol, givim mani bilong ol i go bek long ol, na givim kaikai long ol bilong helpim ol long rot. Olsem tasol, Jisas i mekim pasin marimari na em i givim ol samting bilong spirit long ol “arapela sipsip” i tanim bel long nau. (Jo. 10:16)
13. Olsem wanem ol samting em lain wokboi i givim long nau i wankain long kaikai em Josep i bin givim? (Stt. 47:21-25) Aninit long Jisas, em dispela Man i Winim Josep, lain wokboi long nau i save mekim ol samting i stret wantaim tok bilong Baibel na ol i save skelim kaikai bilong spirit i go long ol Witnes Bilong Jehova i dediket pinis na ol man i laik harim tok. Na tu, lain wokboi i kamapim ol kongrigesen na ol i givim ol dispela kongrigesen ol buk na nius bilong Baibel na bai ol i ken yusim long teritori bilong ol. [4, w87-E 5/1 p. 15 par. 3-4]
14. Taim Jehova i tok, “Mi bai kamap wanem wanem kain mi laikim,” Jehova i laik kamapim wanem samting long nem bilong em? (Kis. 3:14, 15, NW ) Jehova i kamapim klia olsem nem bilong em i bikpela samting. Dispela tok i makim olsem Jehova inap kamap wanem wanem kain bambai em i ken kamapim ol laik bilong em. Em bai kamapim long ples klia olsem em i Man Bilong Truim Ol Tok Promis bilong em, na em bai mekim long wanpela rot ol tumbuna bilong lain Israel i no bin save long en. (Kis. 6:2, 3) [5, w95 3/1 p. 10 par. 6]
15. I gat wanem tupela samting nogut long pasin bilong toktok planti em Kisim Bek 16:2, 3 i kolim? [8, w93 3/15 p. 20-21] Namba wan samting i olsem: Taim wanpela man i toktok planti, dispela pasin i save kalap long ol narapela tu. Namba tu samting i olsem: Taim man i toktok planti, em i save bilasim tok. Ol Israel i mekim olsem. Ol i tok, i gutpela sapos ol i bin i stap long Isip, long wanem, ol inap kaikai bret na abus inap long laik bilong ol yet. Ol i tok, Moses i bringim ol i kam long ples drai nating bambai ol i ken i dai long hangre.