Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Jun 28, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Me 3 i go inap long Jun 28, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Taim yumi mekim tok long pletfom, wanem ol samting inap mekim na pasin bilong yumi long kamapim tok i kain olsem yumi ritim wanpela buk tasol? [1, be p. 179 par. 4] Tok i stap long ol buk i narapela kain long ol tok yumi bai kolim taim yumi toktok, olsem na sapos yumi kolim stret tok i stap insait long wanpela buk o yumi ritim tasol ol tok i stap long autlain, tok bilong yumi bai i no olsem yumi toktok wantaim man. Na tu, sapos yumi kolim ol longpela sentens i hatwok long kisim gut dispela bai mekim na tok bilong yumi i no olsem yumi toktok wantaim man. Yumi inap mekim tok long pasin olsem yumi toktok wantaim man, sapos yumi kamapim ol tingting long tok bilong yumi yet.
2. Bilong mekim krai bilong nek bilong yumi i kamap gutpela moa, bilong wanem dispela i no makim olsem yumi pulim gut win na larim ol masol i stap slek liklik na em tasol? [2, be p. 181 par. 2] Bilong kamapim nek i gutpela long harim, pasin bilong yumi yet tu i insait long dispela. Taim yumi tingim tru ol arapela, nek bilong yumi bai kamapim klia dispela.
3. Taim yumi autim tok i tru bilong Baibel long ol man, yumi ken mekim wanem ol samting na bai yumi inap ‘kisim pasin bilong olgeta kain man’? (1 Ko. 9:20-23) [5, be p. 186 par. 2-4] Wok long skelim man. Long dispela rot yumi inap luksave long sampela samting em ol inap helpim yumi long soim olsem yumi tingim ol man i harim tok. Ating yumi inap luksave long wok mani bilong man. Na ating i gat ol bilas o sampela tok i makim lotu bilong em. Na tu, taim yumi kamapim ol tok bilong Baibel i stret long ol man long teritori bilong yumi, dispela bai soim olsem yumi tingim tingting bilong ol na i stap bilong ol.
4. Bilong putim gut yau taim yumi autim tok, yumi mas mekim wanem? [6, be p. 186, 187] (1) Kirapim ol man long kamapim tingting bilong ol na kamapim wanpela askim na larim ol i bekim. (2) Putim yau tru tru long tok bilong ol. (3) Tok amamas long tingting ol i kamapim. (4) Long gutpela pasin kamapim ol askim i stret na bai yumi inap save gut long tingting bilong man. (5) Yumi mas redi gut na bai tok yumi laik mekim i stap gut long tingting bilong yumi, na dispela bai mekim na yumi inap i stap isi na putim gut yau long tok ol arapela i mekim.
5. Bilong wanem em i bikpela samting long soim rispek long ol man yumi bungim taim yumi autim tok? [9, be p. 190] “God i bin mekim yumi olgeta manmeri i kamap olsem em yet.” (Jems 3:9) Krais i bin dai bilong helpim olgeta wan wan man na i stret olgeta man i ken harim gutnius bambai ol i ken bihainim na God i ken kisim bek ol.
TOK NAMBA 1
6. Ol man i laik skulim ol arapela long tok bilong God ol i laik winim wanem mak? Wanem samting bai helpim yumi long winim dispela mak? (Mt. 5:16; Jo. 7:16-18) [1, be p. 56 par. 3–p. 57 par. 2] Bikpela samting long wok tisa bilong yumi em yumi laik givim biknem long Jehova. Yumi no laik mekim wanpela samting i pasim yumi long givim biknem long Jehova. Olsem na taim yumi tingting long tok yumi bai mekim o bai yumi mekim olsem wanem, em i gutpela long askim yumi yet olsem, ‘Dispela tok bai kirapim ol long laikim Jehova moa yet, o em bai pulim tingting bilong ol man i kam long mi?’
7. Bilong wanem pasin bilong skelim olsem wanem tupela samting i narapela narapela kain i gutpela taim yumi skulim man? Olsem wanem Jisas i bin mekim wok long dispela pasin taim em i skulim ol man? [2, be p. 57 par. 3; p. 58 par. 2] Pasin bilong skelim olsem wanem tupela samting i narapela narapela kain i helpim ol arapela long luksave long olsem wanem tok i tru i narapela kain long ol arapela bilip. Jisas i bin stori long olsem wanem tingting bilong ol man long as bilong Lo Bilong Moses i no wankain long as tru bilong Lo, na em i kamapim olsem wanem pasin bilong givim bel tru long God i no wankain olsem ol pasin ol Farisi i mekim, na em i skelim pasin bilong ol man long strong tumas long bosim ol man wantaim pasin bilong ol man long givim ol yet bilong helpim ol arapela, na em i skelim pasin bilong ting yumi yet i stretpela man na pasin bilong tanim bel tru. (Mt. 5:21-48; 6:1-18; 20:25-28; 21:28-32)
8. Olsem wanem pasin bilong Jisas long putim tok i go daun long bel bilong ol man i narapela kain long pasin bilong ol Farisi? [3, be p. 59 par. 2-3] Pasin bilong laikim tru God i kirapim Jisas long lainim ol man long bihainim ol lo bilong God. (Mt. 15:8) Em i kirapim ol man long skelim as na ol i kirap mekim samting. (Mk. 2:8) Tasol ol Farisi ol i save abrusim ol bikpela samting na ol i save strong tru long bihainim olgeta liklik hap bilong Lo na ol lo ol yet i bin kamapim, ol i mekim olsem bambai ol man i ken lukim na litimapim nem bilong ol. (Lu. 11:42)
9. Olsem wanem yumi inap helpim ol man yumi skulim long bihainim samting ol i lainim, tasol yumi no tokim ol long ol samting ol i mas mekim? [4, be p. 60 par. 1-3] Taim yumi skulim sumatin long wanpela stiatok bilong Baibel, yumi ken kolim samting i save painim ol man long i stap bilong ol na askim sumatin sapos dispela samting i painim em, na olsem wanem dispela stiatok bilong Baibel yumi stadi pinis long en i ken helpim em. Taim yumi kamapim gut insait bilong ol skripsa na soim olsem wanem ol man i ken mekim gutpela wok long tok ol i harim olsem Pita i bin mekim long Pentikos, dispela bai kirapim ol man i gat gutpela bel i painim tok i tru long tingting long bihainim tok ol i harim. (Ap. 2:37)
10. Taim wanpela samting i painim man na em i askim yu olsem em i mas mekim wanem, yu mas bekim wanem kain tok long em? [8, be p. 69 par. 4-5] Yumi mas mekim gutpela tok long em. (Kl. 4:6) Ating yumi save pinis long samting yumi yet bai mekim, tasol yumi mas tingim olsem olgeta wan wan i mas karim hevi bilong ol samting ol yet bai mekim. (Ga. 6:5) Olsem na taim wanpela i askim yumi long samting yumi bai mekim taim wanpela samting i kamap, orait yumi mas kamapim ol stiatok bilong Baibel na ol samting i bin kamap em Baibel i stori long en o yumi ken soim em rot bilong painim save insait long ol buk bambai em yet inap painim ol dispela stiatok na stori, long dispela rot yumi helpim em long kisim pasin bilong “skelim wanem ol pasin i gutpela na wanem ol pasin i nogut.” (Hi. 5:14)
BAIBEL RITIM BILONG WIK
11. Bilong wanem Moses i mas bihainim gut “piksa” bilong “haus sel na olgeta samting i stap insait long en” na wokim? (Kis. 25:9) [1, w03 2/15 p. 29 par. 1, 2] Dispela piksa i stap olsem “tewel tasol bilong haus lotu tru i stap long heven,” em i olsem piksa bilong ol samting bilong spirit, olsem na olgeta hap bilong en i mas stret tru. (Hi. 8:5)
12. Taim ol i mekim pinis ofa em paia i kukim olgeta, klostu olgeta taim ol bai mekim ofa bilong tekewe sin o ofa bilong mekim i dai asua, dispela i makim wanem samting? (Wkp. 8:14, 18; 9:2, 3) [7, w00 8/15 p. 16 par 16, p. 19 par. 8] Dispela i makim olsem, bilong God i ken orait long presen bilong ol sinman, pastaim em i mas lusim sin bilong ol. Bilong God i ken orait long lotu bilong yumi, yumi mas kirap kwik na stretim ol rong yumi mekim long brukim ol lo bilong God. Yumi mas hariap na kisim ol samting God i putim bilong helpim yumi—“ol hetman bilong sios” na ofa “bilong tekewe sin bilong yumi,” em Jisas Krais. (Jems 5:14; 1 Jo. 2:1, 2)
13. Yumi inap lainim wanem samting long pasin bilong ol Israel long bilip strong na bihainim tok bilong Jehova olsem i stap long Kisim Bek 34:23, 24? Pasin bilong ol man Israel long i go long Jerusalem tripela taim long wanpela yia bilong lotu long Jehova em i wanpela samting i traim bilip bilong ol long tok promis bilong Jehova. Ol lain birua bilong ol i stap klostu long ol. Long tingting bilong ol man, em i isi long ol dispela birua bilong ol i kam kisim ol samting bilong ol taim olgeta man i stap long Jerusalem. Wankain tu long nau, bilong i go long ol miting na kibung yumi mas i gat strongpela bilip long tok promis bilong God olsem em bai givim yumi ol samting yumi mas i gat sapos yumi painim Kingdom pastaim. (Mt. 6:33) [4, w98 9/1 p. 20; w67-E p. 436]
14. Wanem wok bilong ofa bilong kamap wanbel wantaim God? (Wkp. 3:1) Dispela ofa i bilong kamapim tenkyu bilong ol olsem God i orait long ol na ol i stap bel isi wantaim em. Taim ol i ofaim pinis blut na gris long Jehova, ol pris na man i mekim ofa ol i save kisim hap bilong dispela ofa na kaikai. Man i mekim ofa, na ol pris, na God Jehova, i olsem ol i kaikai wantaim, bilong makim olsem bel isi i stap namel long ol. [6, w00 8/15 p. 15 par. 15]
15. Yumi inap lainim wanem samting long Kisim Bek 30:9 long olsem wanem yumi ken mekim stret wok bilong God long nau? [3 w00 11/15 p. 14] Dispela ves i soim olsem long taim bilong lain Israel long bipo, wok bilong God ol i mekim i mas stret wantaim ol lo bilong Jehova. Olsem tasol long nau tu, i gat sampela samting yumi mas mekim bambai Jehova i ken orait long wok bilong em yumi mekim. Em i no wok bilong yumi long makim wanem pasin i stret long lotuim God. Yumi mas kisim stretpela save bilong Baibel, na kisim gut tru as bilong en, na bihainim gutpela save na tingting i kam long God. (Kl. 1:9, 10)