Pas i Kam Long Brens

Yes Ol Pablisa Bilong Kingdom:

Mipela i save yupela bai i gat laik long save long ol samting i wok long kamap nau long brens ofis long Amerika. Ol i surikim faktori bilong prinim ol buk samting long Wallkill i go bikpela. Ol i putim tupela nupela masin bilong prinim buk samting, em tupela wantaim inap prinim olsem 90,000 nius insait long wanpela aua. Na tu, ol i putim ol nupela masin bilong wokim ol buk i gat strongpela karamap, em ol dispela masin inap long prinim 120 buk insait long wanpela minit. Ol dispela senis i opim rot bilong ol long salim haus i stap long 360 Furman Street long Brooklyn. Nau ol brata i bisi tru long stretim haus i stap long 117 Adams Street bambai ol i ken putim ol dipatmen i bin stap long 360 Furman Street long dispela haus. Na tu, i gat sampela handet bratasista i stap long Brooklyn na Wallkill ol mas senisim hap ol i stap long en, long wanem, ol dipatmen bilong ol i senisim hap ol i stap long en.

Long teritori bilong brens bilong yumi, ol i wok long stretim ol samting bilong redi long surikim brens ofis, em dispela bai kamap long kirap bilong yia 2005. Pastaim ol bai wokim wanpela nupela haus i gat tupela plua na dipatmen bilong stretim haus Betel na dipatmen bilong salim ol buk samting bai stap long plua daunbilo na plua antap ol bai wokim wanpela nupela Haus Kingdom. Wanpela dipatmen (Regional Engineering Office) long brens ofis long Australia i wok wantaim brens bilong yumi long bungim na kisim ol samting bilong redi long wok bilong sanapim dispela haus na hamas mani ol i mas i gat bilong mekim dispela bikpela wok. Olgeta samting i mas redi paslain long ol i ken kisim tok orait long gavman na ol i ken kirapim wok bilong sanapim haus.

Taim bilong Memorial em i taim bilong givim bel long mekim wok. Ripot bilong Epril i soim olsem 362 i bin mekim wok painia haptaim. Ol ripot mipela kisim inap long nau i soim olsem 18,383 i bin kam long Memorial, dispela namba i winim las yia.

Mipela i wanbel wantaim yupela long “wok strong long mekim wok bilong Bikpela” taim yumi kirapim sevis yia bilong 2005.—1 Ko. 15:58.

Mipela ol brata bilong yupela,

P.N.G. Brens Ofis

This article is unique to PNG.