Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Oktoba 25, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Septemba 6 i go inap long Oktoba 25, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Olsem wanem yumi ken mekim tok i helpim tru ol man taim yumi mekim wanpela tok long kongrigesen i stori long sampela samting bilong wok Kristen? [1, be p. 203 par. 2-3] Sapos yumi bilip tru olsem ol wanbilip i laikim tru Jehova na ol i laik mekim ol samting Jehova i laikim, orait tok yumi mekim bai kamapim dispela bilip bilong yumi. (2 Te. 3:4, 5; Fm. 21) Taim yumi mas givim sampela tok bilong stretim ol narapela, yumi ken mekim long gutpela pasin i helpim gut ol sapos yumi tokim ol gut long rot bilong abrusim pasin nogut, winim ol traim, na olsem wanem ol lo bilong Jehova i save lukautim yumi. (Sng. 119:9-11)
2. Pasin bilong kolim gen tok em i wanem samting? Bilong wanem dispela pasin i bikpela samting? [3, be p. 206 par. 1-4] Em pasin bilong kolim gen tok yumi laik bai odiens bilong yumi i ken holim gut long tingting bilong ol. God Jehova na Jisas Krais i stap gutpela piksa yumi ken bihainim long pasin bilong kolim gen tok. (Lo 6:5; 10:12; 11:13; Mk. 9:34-37; 10:35-45) Sapos ol man i harim tok yumi mekim i tingim tok bilong yumi, orait tok yumi mekim inap mekim sampela samting long bilip bilong ol o pasin bilong ol.
3. Olsem wanem yumi ken kamapim strong tim bilong ol tok bilong yumi? [6, be p. 210 par. 1-5, blok] Taim yumi wok long redim tok, kisim ol bikpela tok na ol narapela tok i save helpim yumi long kamapim gut tim bilong tok. Taim yumi mekim tok, sampela taim yumi ken kolim gen ol wan wan bikpela tok o tingting i stap long tim bilong tok.
4. Olsem wanem yumi inap makim ol bikpela tok long tok bilong yumi? [7, be p. 212 par. 1-4] Namba wan samting em yumi mas tingim save odiens bilong yumi i holim pinis long samting yumi laik stori long en. Namba tu samting em yumi mas klia gut olsem yumi laik bai tok bilong yumi i mas kirapim odiens long mekim wanem. Larim dispela tupela tingting i stiaim yumi long skelim gut ol tok yumi painim long ol buk na mekim wok long ol tok i stret long tok yumi laik mekim.
5. Bilong wanem yumi mas was gut na yumi no ken kamapim planti bikpela tok? [8, be p. 213 par. 2-4] Em i bikpela samting long givim sampela haptaim long ol man bilong ol i ken skelim ol wan wan bikpela tok bambai ol dispela tok i ken pas gut long tingting bilong ol. Sapos yumi bungim gut ol tingting yumi laik kamapim aninit long wan wan bikpela tok tasol na yumi kamapim ol dispela tok wan wan, bai i no hatwok long ol man i kisim na bai ol i no lusim tingting long en.
TOK NAMBA 1
6. Wanem ol samting i stap paslain long Bikpela Tait i mekim na ol man i no bilip olsem olgeta samting bai pinis? [1, w02 3/1 p. 5-6] Olgeta manmeri i stap paslain long Bikpela Tait ol i mekim wankain tok ples. (Stt. 11:1) Ol manmeri i stap planti handet yia olsem na ol i ken bungim ol save ol i kisim insait long ol dispela yia. Kein i wokim wanpela taun. (Stt. 4:17) Ol i wokim planti gutpela samting long han. (Stt. 4:21) Ol man i mekim kain kain wok, olsem na ol i wokim olkain samting. (Stt. 4:22) Dispela ol samting na pasin ol man i bihainim i mekim na i hatwok long ol man i bilipim tok Noa i autim “i go inap long taim bikpela tait i kamap na i pinisim olgeta dispela manmeri.” (Mt. 24:38, 39; 2 Pi. 2:5)
7. Bilong wanem ol man long taim bilong Jisas ol i bin kolim em “Tisa” na ol i no bin kolim em olsem “Man bilong oraitim sik”? (Lu. 3:12; 7:40) [2, w02 5/1 p. 4 par. 3; p. 6 par. 5] Jisas i oraitim ol manmeri i gat kain kain sik na ol man em skin bilong ol i bagarap, na dispela i kamapim klia olsem em i Mesaia. Na tu, dispela i kamapim as na yumi inap bilip tru long ol tok promis bilong Baibel olsem bihain ol man bai kamap orait. (Ais. 33:24) Tasol bikpela wok bilong Jisas em long skulim ol man long rot tru bilong pinisim ol hevi bilong ol man—em Kingdom Bilong God. (Lu. 4:43)
8. Olsem wanem Sindaun 11:24, 25 i kamapim klia olsem em i bikpela samting long mekim wok autim tok inap tru long mak bilong yumi? [3, w02 7/15 p. 30 par. 2-4] Man ‘i save amamas long givim samting bilong em long helpim ol arapela man’ long rot bilong autim tok na skulim ol man long Tok Bilong God, em yet i wok long kisim sampela save moa na em i laikim moa yet ol dispela tok. Tasol man i no mekim wok long save em i kisim pinis, em inap lusim samting em i holim. Olsem na, long rot bilong toktok wantaim ol man na skulim ol long tok bilong Baibel, yumi helpim ol na yumi yet tu wantaim.
9. Pasin bikhet long Iden i kamapim wanem bikpela tok? Dispela pasin bikhet i kamapim wanem samting? (Stt. 3:1-6) [5, w02 10/1 p. 5 par. 6; p. 6 par. 2-3] Dispela bikpela tok olsem Jehova i no bosim gut ol man. Olsem wanem? I stret God i tokim ol man olsem ol i mas bihainim olgeta tok bilong em? Ol man bai stap gutpela sapos ol i bosim wokabaut bilong ol yet? Pasin bilong bikhet long wok bos bilong Jehova i mekim na ol man i kalabus long sin na dai, dispela i kamap klia long ol pait, pasin i no stret, pasin bilong daunim ol man, na pen na hevi, em ol dispela samting i bin painim ol man long bipo yet na i kam inap nau.
10. Olsem wanem yumi inap save long yia stret ol i bin kirapim gen lotu bilong Jehova long Jerusalem? [6, bsi04 Stadi Namba 3 par. 5] Sairus i kamap king bihain long em i daunim Babilon long yia 539 B.C.E. Long namba wan yia em i stap king (kirap long Nisan 538 B.C.E. i go Nisan 537 B.C.E.), Sairus i putim tok bilong larim ol Juda i go bek long Jerusalem. (Esr. 1:1-3) Long “namba 7 mun,” ol Juda i sindaun pinis long ol taun bilong ol. (Esr. 3:1) Dispela i stret, long wanem, bikpela haptaim i mas lus bilong ol Juda i ken redim ol samting na wokabaut. Olsem na yumi ken save, ol i kirapim gen lotu bilong Jehova long Jerusalem long pinis bilong mun Septemba o kirap bilong mun Oktoba long yia 537 B.C.E.
BAIBEL RITIM BILONG WIK
11. Jehova i bin tokim Balam long i go wantaim ol man bilong Balak, tasol bilong wanem Em i belhat long Balam i go wantaim ol? (Nam. 22:20-22) Jehova i tokim Balam olsem em i no ken mekim tok bilong bagarapim ol Israel, tasol dispela profet i mangal long kisim mani long king bilong Moap em Balak olsem na em i go. (2 Pi. 2:15; Ju. 11) Olsem na God i belhat long Balam. Olsem Kein, Balam i strong long bihainim laik bilong em yet na em i sakim laik bilong God. (Stt. 4:6-8) [1, w84-E 4/15 p. 30 par. 2; w04 8/1 p. 27 par. 2]
12. I stret man bilong wanpela meri Kristen i tambuim em long bihainim tok promis meri i bin mekim? (Nam. 30:6-8) Nogat, long wanem, ol disaipel Kristen i no aninit moa long Lo. Long ol tok promis ol man i mekim long nau, Jehova i save tingim dispela olsem em samting bilong wan wan yet, na wanpela man marit Kristen i no gat namba bilong tambuim meri bilong em long bihainim tok promis em i mekim. Tasol meri marit i no ken mekim wanpela tok promis i pait wantaim Tok Bilong God o i pasim em long bihainim tok bilong Baibel long ol samting em i mas mekim long man bilong em. (Sav. 5:2-6) [3, w84-E 4/15 p. 30 par. 4; w04 8/1 p. 27 par. 3]
13. Long nau ol “taun bilong hait” i makim wanem samting? (Nam. 35:6) [4, w95 11/15 p. 17 par. 8] Ol i no wanpela ples tru long graun. Ol i makim samting God i bin putim bilong lukautim yumi na bai yumi no ken brukim lo bilong em long blut na yumi mas i dai. (Stt. 9:6)
14. I stret yumi ting tok i stap long Lo 6:6-9 olsem ‘raitim lo bilong God long pepa na pasim ol long han na long pes’ i tok long samting ol i mas mekim tru tru? Nogat, dispela em i tok piksa tasol. (Kis. 13:9; Snd. 7:2, 3) Ol Israel i mas tingim lo bilong God long olgeta taim. Ol i mas holimpas Lo long bel bilong ol, skulim ol pikinini bilong ol long en, na kamapim long pasin bilong ol (olsem han i makim) na bihainim. Ol Israel i mas kamapim long ples klia olsem ol i lain bilong bihainim ol Lo Bilong Jehova, i olsem ol i pasim long pes bilong ol bambai ol man i ken lukim. [6, w84-E 7/15 p. 24 par. 1; w04 9/15 p. 26 par. 5]
15. Wanem mining bilong dispela tok “klos bilong yupela i no bruk”? (Lo 8:4) Klos bilong ol i no bagarap—ol i stap olsem nupela. Na lek bilong ol i no solap insait long dispela 40 yia ol i raun long ples wesan nating. Dispela ol samting em i mirakel wankain olsem mana em olgeta taim ol i save kisim. [7, w84-E 7/15 p. 24 par. 2; w04 9/15 p. 26 par. 1]