Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Jun 27, 2005. Wasman skul bai mekim riviu inap 30 minit long ol tok i bin kamap insait long skul long wik i kirap long Me 2 i go inap long Jun 27, 2005. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-7.]
PASIN BILONG TOKTOK
1. Bilong wanem pasin bilong mekim wok long ol tok piksa em i gutpela rot bilong skulim ol man? (Stt. 22:17; Sng. 1:3; Jem. 3:6) [1, be p. 240 par. 2-4, na blok] Ol tok piksa i save kamapim sampela piksa long tingting bilong man na i olsem em i lukim tru. Taim yumi mekim gutpela wok long ol tok piksa, ol man bai pilim tru long bel na dispela bai helpim ol long holim gut tok long tingting.
2. Yumi inap painim we ol gutpela stori i save skulim gut ol man? Tasol yumi mas was gut long wanem samting? [3, be p. 242 par. 1-2] Planti gutpela stori i stap insait long Baibel. Jisas i stori long “meri bilong Lot” na “taim bilong Noa.” (Lu. 17:32; Mt. 24:37-39) Taim yumi save gut long Baibel, bai yumi inap long mekim wok long ol stori i stap long Baibel. Sapos yumi laik kamapim stori bilong samting tru tru i bin kamap long taim bilong yumi, orait yumi mas skelim gut, tru tru em i bin kamap o nogat, na i mas i gat as na yumi kamapim dispela stori, na no ken kamapim ol stori i no helpim tok bilong yumi na i pulim nabaut tingting bilong odiens.
3. Taim yumi makim wanpela tok piksa long mekim, yumi mas tingim wanem samting na bai tok piksa bilong yumi i mekim gutpela wok? [5, be p. 244 par. 1-2] Ol tok piksa yumi kamapim i mas stret long odiens bilong yumi. Dispela i makim olsem yumi mas skelim ol samting i stap long hap bilong yumi na ol samting ol man i save mekim long olgeta de na pasin bilong ples. (Mk. 2:22; 4:2-9; Jo. 10:1-5)
4. Bilong wanem yumi mas yusim ol piksa samting taim yumi mekim wok tisa? Olsem wanem Jehova i bin mekim olsem? [7, be p. 247 par. 1-2, na blok] Ol piksa samting inap helpim odiens long putim gut tingting long tok. Ol piksa samting i save helpim man long save gut long samting yu stori long en na em inap tingim longpela taim, winim tok yumi mekim. Jehova i bin mekim wok long ol samting man inap lukim olsem ol sta, haus bilong wokim sospen graun, wanpela bus rop, na haus lotu sel. (Stt. 15:5; Jer. 18:1-6; Jna. 4:6-11; Hi. 9:9, 23, 24)
5. Olsem wanem yumi ken mekim wok long ol piksa samting long taim yumi autim tok? [9, be p. 248 par. 1–p. 249 par. 2] Yumi ken soim ol piksa i stap long ol buk samting bilong yumi, ol mep, ol sat i makim ol yia ol bikpela samting i bin kamap, na raitim ol namba em ol buk bilong yumi i kamapim, na askim man bilong haus long stori long samting em i lukim. (Amo. 7:7, 8; 8:1, 2) Yumi inap yusim ol vidio bilong yumi tu long skulim ol man long ol bikpela tok i tru.
TOK NAMBA 1
6. Baibel i kamapim wanem stiatok long ol pikinini i mas kisim skul? [1, w03 3/15 p. 12 par. 2; p. 14 par. 4] Jisas i save long rit rait, long wanem, taim em i gat 12-pela krismas em i toktok gut wantaim ol man i gat bikpela save long tempel. (Lu. 2:42, 46, 47) Waspapa bilong em, Josep i bin lainim em tu long mekim wanpela wok. God i givim wok long ol papamama long mekim bikpela long ol pikinini bilong ol na “stretim gut ol . . . na skulim ol long tok bilong Bikpela,” na helpim ol long ‘laikim gutpela tingting.’ (Ef. 6:4; Snd. 12:1)
7. Olsem wanem Jehova i soim olsem em i tingim Devit taim em i yangpela? Olsem wanem Devit i soim olsem em i tingim Jehova? [2, w03 4/15 p. 29 par. 4; p. 30 par. 3] Jehova i makim Devit, laspela pikinini man bilong Jesi long kamap king bilong Israel, long wanem, Jehova i save olsem em inap long mekim dispela wok. (1 Sml. 16:7) Na oltaim Devit i save tingim pasin bilong em long pas gut wantaim Jehova na em i save lukluk long Jehova bilong stiaim em. (Sng. 25:4, 5)
8. Bilong wanem Jehova i amamas long ofa bilong Abel? Dispela i strongim yumi olsem wanem? (Stt. 4:4) [3, w03 5/1 p. 28 par. 4–p. 29 par. 1] Ating yumi ting olsem ofa Abel i givim i olsem liklik samting tasol, tasol em i kisim sampela namba wan pikinini sipsip bilong em na mekim ofa. Dispela i makim nambawan samting em inap givim olsem ofa. Ating Abel i bin tingting gut pastaim long wanem kain ofa em bai givim, long wanem, dispela i kamapim klia bilip bilong em. (Hi. 11:4) Dispela i helpim yumi long save olsem Jehova i save tingim pasin bilong yumi long ‘givim biknem long em olsem ofa’ taim yumi bilip na givim bel tru long litimapim nem bilong em. (Hi. 13:15)
9. Dispela tok “stretim” long Sindaun 3:11 i makim wanem samting na bilong wanem i gutpela yumi no ken sakim? [6, w03 10/1 p. 20 par. 2-4] Dispela skripsa i no stori long samting ol man i mekim bilong stretim narapela, nogat; skripsa i stori long samting “Bikpela i mekim” em ol stiatok bilong God i as bilong en. Dispela kain pasin bilong stretim inap makim kain kain samting—stiaim, givim save, skulim, stretim, na strafe tu. Taim Jehova i stretim yumi, yumi no ken sakim, long wanem, pasin bilong laikim na helpim man i as na Jehova i stretim yumi. (Hi. 12:11)
10. Olsem 1 Timoti 6:6-8 i tok, wanem samting i helpim Pol long i stap amamas na belgut? [8, w03 6/1 p. 9 par. 1-2; p. 10 par. 1] Em i save ting olsem sapos em i gat ol samting bilong skin em i mas kisim, orait dispela em inap long em. Maski yumi gat wanem kain sindaun, yumi mas bilip na wet long Jehova na mekim wok bilong em. Pasin bilong i stap isi bai mekim na yumi stap belgut na putim wok bilong God i stap namba wan samting maski yumi gat planti samting bilong skin o nogat.
BAIBEL RITIM BILONG WIK
11. Pasin bilong Jonatan na Devit long narapela i laikim tru narapela na ol i stap wanbel na pas tru i olsem piksa na i makim wanem samting? (2 Sml. 1:26) [1, w89 6/1 p. 23 par. 13] Pasin bilong Jonatan na Devit long narapela i laikim tru narapela na stap wanbel na pas tru wantaim i wankain olsem “ol arapela sipsip” i pas gut wantaim hap lain sipsip em God i bin makim ol na ol i stap yet long graun, na ol i kamap “wanpela lain sipsip tasol” aninit long “wanpela wasman,” em Jisas. (Jo. 10:16)
12. Yumi inap lainim wanem samting long namba wan taim Devit i traim long kisim bokis kontrak i go long Jerusalem? (2 Sml. 6:2-9) (1) Pasin bilong sakim tok bilong God i save kamapim hevi. (2) Maski man i stap pren bilong Jehova, taim hevi i kamap, em inap mekim sampela pasin kranki. (3) Oltaim yumi mas putim hevi bilong yumi long han bilong Jehova na no ken sutim tok long em long ol hevi i painim yumi, em yumi yet i bin sakim tok bilong em na ol dispela hevi i painim yumi. [2, w05 5/15 “Tok Bilong Jehova i Gat Laip—Sampela Bikpela Tok Bilong Buk Namba 2 Samuel”; w96 4/1 p. 28 par. 5–p. 29 par. 1]
13. Lo 24:16 na Esekiel 18:20 i tok olsem pikinini man i no ken i dai long rong papa i mekim, olsem na taim Devit na Batseba i mekim sin, bilong wanem pikinini man bilong ol i mas i dai? (2 Sml. 12:14; 22:31) Sapos ol man i mekim kot, tupela papamama na pikinini man i stap long bel bilong mama bai i dai. (Lo 22:22) Taim pikinini man tasol i dai, dispela i helpim Devit long luksave olsem Jehova i no amamas long rong em i bin mekim. Na tu, yumi no save pikinini i gat sik o nogat. Tasol yumi ken bilip tru olsem samting Jehova i bin mekim i stret. [3, w05 5/15 “Askim”; w86-E 3/15 p. 31]
14. Olsem wanem yumi inap save tok Siba i mekim long Mefiboset em i tok giaman? (2 Sml. 16:1-4) Tingting bilong mekim kain samting olsem i no stret wantaim pasin bilong Mefiboset, em i gat pasin daun na em i save pilim tru gutpela pasin ol narapela i mekim long em. Na em i save gut long pasin bilong papa bilong em, Jonatan, long stap gut long Devit. Maski Jonatan em i pikinini bilong King Sol, long pasin daun em i save olsem Devit em i man Jehova i makim bilong stap king long Israel. (1 Sml. 20:12-17) Jonatan i gutpela pren bilong Devit, olsem na em i no skulim pikinini man bilong em long tingting long kisim wok king. [5, w02 2/15 p. 15 sta.]
15. Olsem wanem pasin Mefiboset i mekim taim Siba i tok giaman, dispela i stap olsem gutpela piksa long yumi? (2 Sml. 19:24-30) Taim ol samting i kamapim klia olsem Siba i bin bagarapim gutnem bilong Mefiboset, Devit i stretim dispela hevi liklik. Tasol Mefiboset i no tok olsem samting Devit i mekim i no stret. Em i tingting long ol gutpela samting, na em i amamas long king tru bilong Israel i kam bek pinis na em i no bin kisim bagarap. Mefiboset i stap olsem gutpela piksa tru long pasin bilong karim hevi bilong skin i bagarap, na long narapela i bagarapim gutnem bilong em, na long samting i no kamap olsem em i laikim. [6, w02 2/15 p. 15 par. 12]