Pas i Kam Long Brens

Yes Ol Pablisa Bilong Kingdom:

Long dispela yia, bikpela lain i bin kam gen long Memorial i kamap long Mas 24. Inap 18,609 manmeri i bin kam, tasol mipela i no kisim yet sampela ripot long ol liklik grup i stap longwe. Yumi save mekim 3,000 Baibel stadi long olgeta mun, na dispela i soim olsem lain bilong yumi long Papua Niugini inap i go bikpela moa.

Insait long planti yia ol brata i bin wok long painim hap graun na stretim ol samting na nau i gat nupela Haus Kingdom long Badili na Bulolo. Ol dispela Haus Kingdom i save helpim ol brata long ol dispela hap na i litimapim nem bilong Jehova.

Inap sampela yia nau, ol i bin redim ol samting bilong skruim brens i go bikpela. Klostu nau ol bai kirap stretim graun bilong ol i ken sanapim ol nupela haus. Ol bai wokim tupela bikpela haus na rausim sampela olpela haus. Ol i tingting long wokim ol nupela ofis bilong Dipatmen Bilong Tanim Tok na stretim na wokim i go bikpela sampela narapela dipatmen na ples slip.

Mipela i wok long stretim rot na bai famili Betel i gat ples slip long taim bilong konstraksen. Na mipela bai stretim rot na bai i gat ol ofis em lain bilong tanim tok i ken mekim wok long en inap long taim ol i wokim pinis ol nupela ofis bilong ol.

Long taim bilong konstraksen, bai mipela i wok yet long salim ol buk samting em yupela i mas i gat bilong mekim wok autim tok na ol miting. Olsem na mipela i laik kirapim yupela olgeta long wok strong yet long autim tok. Brens ofis bai wok yet long helpim yupela. Taim yupela i wok yet long “mekim wok bilong Bikpela,” Jehova bai blesim wok yupela i mekim.​—⁠1 Ko. 15:⁠58.

Olgeta dispela wok mipela i mekim i helpim wok bilong Kingdom na mipela i bilip tru Jehova bai helpim dispela wok. Na mipela i laik tok tenkyu long mani yupela i givim olsem kontribiusen bilong helpim dispela wok. (Snd. 3:​9, 10) Yumi ken bilip olsem Jehova bai blesim ol wok yumi mekim bilong “litimapim nem bilong em.”​—⁠Ef. 1:⁠12.

Mipela ol brata bilong yupela,

P.N.G. Brens Ofis

This article is unique to PNG.