Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Oktoba 31, 2005. Wasman skul bai mekim riviu inap 30 minit long ol tok i bin kamap insait long skul long wik i kirap long Septemba 5 i go inap long Oktoba 31, 2005. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-7.]
PASIN BILONG TOKTOK
1. Olsem wanem yumi ken putim Tok Bilong God i go daun long bel bilong ol man? (Mt. 13:19) [1, be p. 258 par. 1-2, na blok] Yumi mas wok strong long putim tok i go daun long bel bilong ol man na dispela inap mekim na ol i go klostu long God. I gutpela long skelim wanem samting i stiaim pinis bel bilong ol. Yumi mas wok long strongim ol gutpela pasin, olsem pasin bilong laikim narapela na pret long God. Dispela i bikpela samting bilong helpim ol narapela long mekim Jehova i amamas.
2. Wanem samting inap helpim yumi long kisim save long tingting i stap long bel bilong man? Tasol yumi mas was gut long wanem samting? [2, be, p. 259 par. 2-3] Kain ol askim olsem: “Yu gat wanem tingting long . . . ? o Wanem samting i mekim na yu bilip olsem . . . ?” inap kirapim tingting bilong sumatin na helpim tisa long kisim save long tingting i stap long bel bilong sumatin. Taim tisa i givim ol askim, em i mas bihainim gutpela tingting na bai sumatin i no pilim olsem tisa i sutim planti askim long em. Gutpela tisa bai putim gut yau long tok bilong sumatin na bai em i ken save long tingting tru bilong sumatin, na olsem wanem em inap kamapim ol tok bilong Baibel em ol inap kirapim sumatin long mekim samting. (Snd. 16:23)
3. Taim yumi skulim ol man, bilong wanem em i bikpela samting long kamapim strong ol pasin bilong Jehova? [3, be p. 260 par. 1] Taim yumi kamapim strong ol pasin bilong Jehova olsem gutpela pasin, na pasin sori na marimari, dispela bai kirapim ol man long pilim tru long bel ol pasin bilong God na kirapim ol long laikim em tru. Taim yumi kirapim ol long tingim ol pasin bilong Jehova, dispela bai helpim ol long i go klostu long God na pas gut moa wantaim em. Taim yumi stori olsem wantaim ol, dispela bai kirapim ol long pilim tru dispela samting long bel, long wanem, God i wokim ol man i kamap olsem God yet. (Stt. 1:27)
4. Olsem wanem yumi ken helpim ol Baibel sumatin long luksave long ol samting ol i mas mekim? [5, be p. 260 par. 4-5] Yumi mas tokaut klia long ol olsem pasin ol i bihainim i bikpela samting. Pasin bilong ol inap mekim Man Bilong Wokim olgeta samting i bel hevi o amamas. (Sng. 78:40-42; Snd. 27:11) Yumi ken helpim ol Baibel sumatin long tingim ol blesing i save kamap taim man i bihainim ol lo bilong God, na long tingim pasin bilong bihainim tok i no wanpela hevi, nogat, em i wanpela rot bilong soim olsem yumi givim bel tru long Jehova. (Sng. 19:11; Ais. 48:17)
5. Yumi ken mekim wanem bilong helpim ol Baibel sumatin o ol man i harim tok bilong yumi long skelim tingting bilong bel i kirapim ol long mekim ol samting? [7, be p. 262 par. 1-2] Taim yumi skulim ol man, yumi mas kirapim ol Baibel sumatin o ol man i harim tok bilong yumi long askim ol yet olsem: ‘Wanem as na mi laik mekim olsem? As bilong samting mi laik mekim i bilong soim olsem mi tenkyu tru long ol samting Jehova i bin mekim bilong helpim mi? Tru, ating bai mi bihainim ol samting God i laik bai mi mekim, tasol mi gat wanem tingting long ol dispela samting?’ (Sng. 37:4) Yumi mas kirapim ol Baibel sumatin o ol man i harim tok bilong yumi long beten askim Jehova long givim strong na bilip long ol na bai ol i ken pret long em. (Sng. 86:11)
TOK NAMBA 1
6. Wanem insait bilong dispela tok “wok long painim” Jehova? Olsem wanem yumi ken soim olsem yumi mekim olsem? (Hi. 11:6) [1, w03 8/15 p. 25 par. 2; p. 26 par. 1-2; p. 27 par. 2] “Wok long painim” em i kain olsem pasin bilong wok strong tru na em inap makim tu pasin bilong “singaut planti” em dispela i stret wantaim laik bilong God. (Lu. 11:8; 1 Jo. 5:14) Yumi ken soim olsem yumi wok strong long painim Jehova long rot bilong givim bel olgeta long mekim kain kain wok tiokratik em yumi inap long mekim. Em ol wok olsem redim gut ol miting, wok strong long mekim gut moa wok bilong autim tok, na redi long insait long fultaim sevis.
7. Wanem ol dispela “gutpela tok”? Olsem wanem ol elda i ken soim olsem ol i tingim ol dispela gutpela tok? (2 Ti. 1:13, 14) [3, w03 1/1 p. 29 par. 2–p. 30 par. 1] Long 1 Timoti 6:3, Pol i tok ol dispela “gutpela tok” em ol “stretpela tok bilong Jisas.” Ol tok Jisas i mekim i stret wantaim ‘olgeta tok i stap long buk bilong God em spirit bilong God yet i bin kamapim na i gutpela samting tru bilong skulim yumi,’ olsem na “gutpela tok” i makim olgeta tok i stap long Baibel. (2 Ti. 3:16, 17) Ol elda i mas kamapim tok bilong Baibel tasol taim ol i skulim ol man insait long kongrigesen na ol i no ken kamapim tingting bilong ol man o bilong ol yet. (2 Ti. 4:2) Dispela tok i stret tu long taim yumi autim tok long ol man. (2 Ti. 4:5)
8. Wanem sampela samting i soim olsem wanpela buk bilong Baibel em i hap tru bilong Baibel? [4, bsi05 Stadi Namba 4 p. 3 par. 5-6] Ol samting i soim olsem wanpela buk bilong Baibel i hap tru bilong en i olsem: Em i mas stori long ol samting Jehova i bin mekim long graun, ol tok bilong buk i mas kirapim ol man long lotuim Jehova, na rispektim nem bilong em na ol wok bilong em na ol samting em i tingting pinis long mekim long graun. Na buk i mas kamapim klia olsem spirit bilong God i as bilong ol tok bilong en. Buk i no ken pulim ol man long bihainim bilip giaman o long lotuim wanpela man o animal; ol tok bilong buk i mas kirapim ol man long laikim God na mekim wok bilong em.
9. Bilong wanem dispela lista ol i kolim Liklik Hap Rait Bilong Muratori bilong yia 170 samting, i bikpela samting bilong kamapim klia olsem Ol Skripsa Grik ol i hap tru bilong Baibel? [6, bsi05 Stadi Namba 4 p. 8 par. 19] Dispela lista long tok Latin i tok Gutnius Luk i raitim i namba 3 Gutnius na dispela i makim olsem pastaim em i bin stori long Matyu na Mak. Em i tok tu olsem buk Jon i raitim “em i namba 4 Gutnius.” Dispela lista i stori tu long ol pas aposel Pol i raitim i go long ol kongrigesen na long ol wan wan man. Ol narapela buk bilong Baibel em ol man i bilip olsem ol i hap tru bilong Baibel i stap long dispela lista tu.
10. Insait long Baibel yet i gat wanem ol tok i soim olsem i orait long tanim tok bilong en long ol narapela tok ples? Ol olpela Baibel ol i bin tanim long narapela narapela tok ples i helpim yumi long save long wanem samting? [8, bsi05 Stadi Namba 5 p. 14 par. 9] Wanpela tok God i mekim long lain Israel i olsem, “ol manmeri bilong ol arapela kantri, yupela i mas litimapim nem bilong ol manmeri bilong God” na tok profet bilong Jisas olsem ol bai autim gutnius bilong Kingdom long olgeta hap bilong graun i kamapim klia olsem i stret long tanim tok bilong Baibel long ol narapela narapela tok ples. (Lo 32:43; Mt. 24:14) Ol olpela Baibel long ol narapela narapela tok ples i helpim yumi long save olsem ol tok bilong Ol Skripsa Hibru long nau i wankain olsem ol i bin raitim long pastaim.
BAIBEL RITIM BILONG WIK
11. Olsem wanem? Tok bilong 2 King 13:21 i helpim dispela bilip olsem ol bun bilong ol santu i holi? Dispela ves i stori long wanpela mirakel i kamap long bun bilong wanpela profet bilong God. Long dispela taim mirakel i kamap, Elisa i dai pinis na em i “no inap mekim wok o tingting,” olsem na dispela mirakel i kamap long strong bilong God Jehova na em i mekim dispela mirakel long rot bilong holi spirit, o strong bilong em. (Sav. 9:5, 10) Na tu, Baibel i no stori liklik olsem ol man i bin adorim ol bun bilong Elisa. [1, w05 8/1 “Tok Bilong Jehova i Gat Laip—Sampela Bikpela Tok Bilong Buk Namba 2 King”]
12. Olsem wanem? Tru tru Hesekia i bin wokim kontrak wantaim kantri Isip? (2 Kin. 18:19-21, 25) Nogat. Tok dispela ofisa bilong ami bilong Asiria i mekim i no tru, na tok em i mekim olsem “Bikpela yet i bin tokim [em] long kam bagarapim” Juda, dispela tu i no tru. Gutpela King Hesekia i bilip strong olsem Jehova bai helpim em. [2, w05 8/1 “Tok Bilong Jehova i Gat Laip—Sampela Bikpela Tok Bilong Buk Namba 2 King”]
13. Tru, ol stori bilong Asiria i no kolim stret olsem Jehova i daunim Senakerip, tasol ol samting ol dispela stori i kamapim i givim wanem tingting long yu? (2 Kin. 19:35, 36) Ol stori bilong Senakerip ol i bin raitim long ol strongpela graun olsem brik, i tok: “Dispela Judaman, Hesekia, em i no bin daun long mi. Mi bin pait wantaim 46 strongpela taun bilong em, ol banis ol soldia i ken hait insait long en na planti liklik ples i stap klostu long ol, na mi daunim (ol) . . . Mi kalabusim em long Jerusalem, long haus king bilong em, na em i stap olsem pisin insait long banis.” Senakerip i tok, Hesekia i pret long ol bilaspasin na biknem bilong Senakerip. Tasol Senakerip i no tok em i kisim Hesekia o daunim Jerusalem olsem em i tok em i bin mekim long ol “strongpela taun” na ol “liklik ples.” Dispela tok bilong em i kamapim klia olsem tok Baibel i mekim long bagarap i bin painim ol soldia bilong Senakerip i bin kamap tru. [3, w88 10/1 p. 31 par. 2]
14. Husat i papa bilong Sealtiel? (1 Sto. 3:16-18) Namba 1 Stori 3:17 na Matyu 1:12 i kamapim olsem Jekonia (King Jehoiakin) em i papa tru bilong Sealtiel. Tasol Luk i tok, “Sealtiel em i pikinini bilong Neri.” (Lu. 3:27) Ating Neri i givim pikinini meri bilong em long Sealtiel bilong em i ken maritim em. Ol Hibru i save kolim man bilong pikinini meri bilong ol olsem pikinini bilong ol, olsem na long lista bilong tumbuna bilong ol, Luk inap tok olsem Sealtiel em i pikinini bilong Neri. Na Luk i tok tu olsem Josep em i pikinini bilong Heli, tasol Heli em i papa bilong meri bilong Josep, em Maria. (Lu. 3:23) [5, w92 7/15 p. 5]
15. Long taim bilong King Sol, olsem wanem lain Ruben, lain Gat, na hap lain bilong Manase i stap gutpela piksa bilong ol wokman bilong God long nau? (1 Sto. 5:18-22) Ol i tingim tok promis Jehova i bin mekim long tumbuna bilong ol Abraham, na ol i pait strong i go abrusim Gileat na kisim ol graun. (Stt. 15:18) Maski dispela i mekim na ol i mas pait wantaim lain Hagar, ol dispela lain Israel i orait long mekim olsem. Ol inap olsem 44,760. Tasol long taim ol i pait, ol i kisim 100,000 birua olsem kalabusman. Dispela i no lain ami olgeta bilong lain Hagar, long wanem, Baibel i tok olsem “planti birua i bin dai.” Yumi inap save olsem lain Ruben, lain Gat, na hap lain bilong Manase i no inap winim ol birua long strong bilong ol yet, nogat. Ol i askim God Jehova long helpim ol. [6]