Askim

◼ I gat wanem ol samting tasol inap i stap long notisbot bilong kongrigesen?

Notisbot long Haus Kingdom i bilong putim ol toksave bilong kongrigesen long en. Ol i no ken putim nating wanpela toksave o narapela samting long en; wasman siaman i mas orait pastaim.

Sampela samting ol i save putim long notisbot long olgeta taim, em olsem: Ol sediul bilong Miting Bilong Wok, na sediul bilong Skul Tiokratik Bilong Autim Tok, na lista bilong ol pablik tok, na lista bilong ol brata ol bai mekim wok siaman long Pablik Miting na ol brata ol bai ritim Wastaua, na lista bilong ol Buk Stadi Bilong Kongrigesen, olsem nem bilong ol bratasista i go long narapela narapela grup na ol i save mekim stadi we, na ol i ken putim toksave long wanem taim wasman sekit bai kam na sampela narapela toksave bilong dispela taim, na toksave bilong ol kibung, na lista bilong klinim Haus Kingdom. Na sampela taim brens ofis i save tokim ol elda long putim sampela pas samting long notisbot. Na sapos i gat narapela samting, orait ol elda i ken skelim, i gutpela ol i putim long notisbot o nogat.

Sapos wanpela marit bai kamap long Haus Kingdom ol i ken tokaut long dispela marit long wanpela miting, tasol ol i no ken putim toksave bilong en long notisbot. Na ol i no ken putim ol toksave bilong bung o pati sampela brata i putim bilong amamas, long wanem, dispela i no samting bilong wok bilong kongrigesen.

Notisbot i mas i stap klin na gutpela. Em mas bikpela inap long ol i ken putim ol dispela lista na toksave samting long en. Ol i mas rausim ol toksave i olpela pinis. Sapos i gat tupela kongrigesen i save bung long wanpela Haus Kingdom, ol i mas i gat notisbot bilong ol yet wan wan, o ol i mas makim hap bilong narapela kongrigesen na hap bilong narapela kongrigesen. Gutpela sapos wasman siaman o wanpela brata em wasman siaman i makim, i ken sekim notisbot long sampela taim na luksave olsem olgeta toksave, lista, na sediul i stap gut na ol i bilong nau.

This is a repeat of article in km 2/89 taken from km-E 1/89 “Question Box.”