Pas i Kam Long Brens

Yes Ol Pablisa Bilong Kingdom:

Mipela i amamas long lukim ol wok i go bikpela long Papua Niugini, long sevis yia bilong 2007! Long Wok Kingdom bilong Ogas 2007, mipela i bin toksave long namba bilong ol pablisa i go antap. Na nau sampela ripot mipela i kisim pinis i soim olsem namba bilong ol manmeri i kam long Memorial i go antap winim 23,000! Tru tumas, long Papua Niugini, planti manmeri tru i laik harim tok, olsem ol “kaikai i redi pinis” bilong kisim.​—⁠Jo. 4:⁠35.

Wok bilong skruim brens i ron gut na i stret long taim olsem mipela i makim. Klostu nau bai ol i pinisim wok bilong wokim Haus Kingdom. Ol brata i redim pinis ol ples wok i stap aninit long Haus Kingdom, na nau dipatmen bilong stretim na lukautim ol samting bilong Betel i yusim ol dispela ples wok. Kampani i wokim nupela haus Betel ol i sanapim pinis olgeta bun bilong haus, na klostu bai ol brata em ol i volantia long wok, ol bai kam na kirapim ol wok long insait bilong haus. Ol ensinia na ol inspekta ol i bin kam skelim dispela wok na ol i tok em i gutpela tru. Na tu, ol brata i penim gut olpela haus Betel na i luk nais tru, na dispela i pulim tru ai bilong ol man i stap klostu.

Long sevis yia i go pinis, wok bilong wokim ol Haus Kingdom tu i ron gut tasol. Ol i bin wokim nupela Haus Kingdom long Misima, ol i bin stretim Haus Kingdom long Kiunga, na long Kundiawa ol i wokim Haus Kingdom na haus misineri long nupela hap. Lain brata bilong wokim ol Haus Kingdom nau ol i wok long sanapim wanpela bikpela Haus Kingdom bilong Madang Kongrigesen, long wanem, namba bilong ol man i kam long ol miting i go bikpela long dispela hap.

Long olgeta hap bilong kantri, yumi bin tilim klostu olsem 115,000 Kingdom Nius Namba 37, “Pinis Bilong Lotu Giaman i Kam Klostu Tru!” Bikpela astingting bilong kain wok olsem em bilong helpim ol manmeri i gat gutpela bel long kisim save long ol tok bilong Baibel. (Mt. 28:​19, 20) Taim yu autim tok, kisim nem bilong olgeta man i laik harim tok, na tingting long kirapim Baibel stadi taim yu mekim gobek.

Mipela i amamas long wok wantaim yupela long mekim dispela bikpela wok, na mipela i salim pasin laikim Kristen bilong mipela i go long yupela.

Ol brata bilong yupela,

Brens Ofis Bilong Papua Niugini

This article is unique to PNG.