Olsem Wanem? Famili Bilong Yu i Wok Long Redi Long Abrusim Bagarap?
1 Ol tok profet bilong Baibel i wok long kamap tru long nau, ol i kamapim klia olsem taim bilong pinis bilong ol pasin nogut bilong dispela graun i kam klostu pinis. Yumi stap nau long taim bilong planti hevi tru wankain olsem long taim bilong ol lain paslain long Bikpela Tait. (Mt. 24:37-39) Noa i abrusim bagarap bilong dispela taim bipo, long wanem, “wokabaut bilong en i stret long ai bilong God.” (Stt. 6:9) Ating Noa i bin skulim famili bilong em long ol samting Jehova i laikim, long wanem, ol tu i abrusim bagarap long taim bilong Bikpela Tait. Long wanem rot yumi ken bihainim pasin bilong Noa na famili olgeta i ken wok long redi long abrusim bagarap taim pasin nogut bilong dispela graun i pinis?
2 Man Bilong Tokaut Long Stretpela Pasin: Inap 40 i go 50 yia samting Noa i wok strong long autim tok olsem “man bilong tokaut long stretpela pasin.” (2 Pi. 2:5) Ol man i stap klostu long Noa, maski ol ensel i bin tanim i kamap man i stiaim ol o nogat, ating ol i tok bilas long wok bilong em long autim tok. Taim yumi autim tok, planti man i no laik harim tok na ol i tok bilas long yumi, na dispela i soim olsem pinis bilong pasin nogut bilong nau i klostu. (2 Pi. 3:3, 4) Tasol long nau planti manmeri i harim tok yumi autim na ol i “kam” lotuim Jehova, i no olsem ol man long taim bilong Noa. (Ais. 2:2) Sapos yumi wok strong long autim tok na yumi no les kwik ‘God bai i kisim bek yumi yet na ol manmeri i save harim tok bilong yumi.’ (1 Ti. 4:16) Long rot bilong toktok na pasin bilong ol, em i bikpela samting long ol papamama i skulim ol pikinini bilong ol olsem taim i sot pinis bilong mekim wok autim tok!—2 Ti. 4:2.
3 Em i “Mekim Olgeta Samting Olsem God i Tokim Em”: Bilong Noa na famili bilong em i ken abrusim bagarap ol i mas bihainim olgeta tok bilong Jehova. (Stt. 6:22) Long nau em i bikpela samting long yumi mas “harim tok” i kam long Baibel na wokboi i gat gutpela tingting. (Jem. 3:17) Sampela pikinini long wanpela famili nau ol i bikpela pinis, ol i tingim pasin bilong papa bilong ol long bihainim tok i kam long oganaisesen bilong Jehova long skulim famili bilong em. Em i mekim Baibel stadi wantaim famili long olgeta wik na em i kisim famili i go autim tok long olgeta wiken olsem oganaisesen i makim. Long olgeta wan wan wik em i makim wanpela bilong ol pikinini long wok wantaim em long autim tok. Pasin bilong em long “mekim olgeta samting olsem God i tokim em” i strongim tru ol pikinini na taim olgeta 6-pela pikinini i kamap bikpela, ol i kamap gutpela wokman bilong Jehova.
4 Pinis bilong dispela graun bai kam wantu tasol. (Lu. 12:40) Sapos yumi bihainim pasin bilong Noa na bilip tru olsem God bai kisim bek yumi, yumi yet na famili bilong yumi bai redi i stap!—Hi. 11:7.