Pas i Kam Long Gavening Bodi
Yes Ol Wanwok Witnes Bilong Jehova:
Yumi wanpela lain i gat gutpela samting tru, yumi holim nem bilong King Bilong Heven na Graun, em Jehova! Dispela nem i save stap oltaim, em i no inap pinis, na i no gat narapela nem i wankain long en. Jehova i bin givim yumi dispela nem bilong em long holim, na moa yet kirap long yia 1931, ol man i save kolim yumi long dispela nem i winim olgeta arapela nem. (Ais. 43:10, NW ) Yumi amamas tru long kolim yumi yet olsem Ol Witnes Bilong Jehova.
Satan i wok strong tru long pinisim nem bilong God. Em i stiaim ol lain man na ol i sakim nem bilong Jehova. Bikpela Babilon, em olgeta lotu giaman, i heitim nem bilong God na ol i rausim dispela nem long planti Baibel. Tasol Jisas i litimapim nem bilong Papa bilong em, na em i putim i stap namba wan long dispela beten em i lainim ol disaipel bilong em long en. Em i tok: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Mt. 6:9) Bihain, taim em i beten long Papa bilong em, em i tok: “Mi autim pinis nem bilong yu long ol man yu bin givim mi long dispela graun.” (Jo. 17:6) Yumi laik bihainim gutpela pasin bilong Jisas, na yumi tingting strong moa long tokaut long nem bilong Jehova long olgeta hap bilong graun.
Yiateks bilong 2009, Autim Gut Tru Dispela Gutnius, i kirapim yumi long inapim tru wok autim tok bilong yumi. (Ap. 20:24) Yumi save olsem Jehova i bin blesim tru wok bilong yumi long las sevis yia. Yumi mekim bikpela wok bilong autim tok long olgeta hap bilong graun na dispela i bin givim glori na ona long nem bilong Jehova. Namba bilong ol pablisa i go antap inap 7,313,173, na ol i bungim nek wantaim long autim tok na lainim ol man i gat gutpela bel em ol i painim rot bilong stretim ol hevi i wok long painim ol long olgeta de. Inap olsem 18,168,323 manmeri i bung long Memorial bilong tingim indai bilong Krais, na dispela i soim olsem planti milion man moa bai singaut long nem bilong Jehova paslain long pinis bilong pasin nogut bilong nau.
I go inap long taim Jehova i makim, yumi bai givim bel yet long autim gutnius bilong Kingdom, na yumi bai traim olgeta kain rot long autim tok long ol man long teritori bilong yumi. (Mt. 24:14; Mk. 13:10) Maski yumi autim tok long ol haus, long ol strit, long rot bilong pas o telefon, na long kain kain taim na ples, yumi mas wok strong yet long tokim planti manmeri long nem bilong Jehova na ol samting em i tingting pinis long kamapim.
I gat as tru na yumi ken bilip olsem klostu nau Jehova bai mekim ol samting bilong litimapim nem bilong em. (Ese. 36:23) Taim i klostu nau bilong Jehova long daunim tru ol man i bagarapim nem bilong em. Dispela bai wanpela gutpela de tru bilong olgeta wokboi bilong Jehova i stap gut long em, em ol man husat i bin kamapim klia nem bilong Jehova na stap gut long wok bos bilong em!
Jehova i laikim tru ol manmeri bilong em, na yumi lukim klia dispela samting long ol “Was i Stap!” Kibung Distrik na Kibung Intenesenel long planti hap bilong graun long 2009. Dispela ol kibung i bikpela samting long wok bilong oganaisesen bilong God, ol i kirapim yumi long tingim gut olsem yumi mas was i stap long de bilong Jehova.—Mk. 13:37; 1 Te. 5:1, 2, 4.
Tru tumas, Jehova i mekim gut long yumi; em i mekim yumi i stap amamas tru. Em i mekim yumi slip long ol gutpela gras na em i bringim yumi i go long ol liklik wara na yumi dring na malolo.—Sng. 23:1, 2; 100:2, 5.
Yupela ken save tru olsem Jehova bai wok yet long blesim yupela taim yupela i insait tru long mekim wok bilong Kingdom long ol mun i kam!
Mipela i salim bikpela pasin laikim Kristen i go long yupela ol brata bilong mipela,
Ol brata bilong yupela,
Gavening Bodi Bilong Ol Witnes Bilong Jehova