Ol Samting Bilong Kibung Distrik Yumi Mas Tingim
◼ Ol Taim: Program bai kirap long 8:20 a.m. long olgeta tripela de bilong kibung. HARIM: Program bai kirap hariap, i no long wankain taim olsem long ol yia i go pinis. Taim ol i toksave long musik bai kirap, yumi olgeta i mas sindaun long sia bilong yumi na bai program i ken kirap long pasin i stret. Program bai pinis long 3:55 p.m. long Friday, 2:50 p.m. long Sarere na 2:50 p.m. long Sande. HARIM: Long ol 2-pela de kibung, program bai kirap long 8:20 a.m. long tupela de wantaim. Program bai pinis long 4:15 p.m. long Sarere, na long 3:20 p.m. long Sande.
◼ Ples Bilong Putim Ka: Long olgeta ples em kibung bai kamap long en, bai i gat ples bilong putim ka. Ol brata i gat ka i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti, olsem na bihainim gut tok bilong ol atendan.
◼ Ples Sindaun: Yu ken kisim sia bilong ol lain i kam wantaim yu long ka o lain i stap long haus bilong yu, na bilong lain yu stadi long Baibel wantaim ol.—1 Ko. 13:5.
◼ Belo Kaikai: I gutpela yu bringim kaikai na bai yu no lusim ples kibung long belo bilong go kisim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski na ol glas kontena i go long ples kibung.
◼ Ol Kontribiusen: Yumi ken soim amamas bilong yumi long bikpela wok ol i mekim bilong redim kibung, long rot bilong givim kontribiusen long Haus Kingdom bilong yumi o long ples kibung bilong helpim ol wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap i kamap insait long ples kibung, toksave hariap long atendan, na em bai toksave long Dipatmen Bilong Fest Eid na bai ol lain long dispela dipatmen i ken helpim man i kisim bagarap.
◼ Ples Slip: (1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip. (2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum. (3) Sapos yu mas rausim nem bilong kisim ples slip, orait kwiktaim toksave long Dipatmen Bilong Rum Slip. (4) No ken kukim kaikai long ol rum i gat tambu long mekim olsem. (5) Sapos yu stap wantaim ol brata long haus bilong ol, tingim gut ol samting bilong ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem. Taim yu stap long haus bilong ol brata, em i gutpela pasin long helpim ol long baim kaikai bilong haus, kukim kaikai, na mekim narapela wok bilong haus. (6) Kamapim ol pasin em spirit bilong God i save kamapim taim yu kamap long ples kibung bilong stretim ples slip bilong yu, na taim yu stap long ples slip, na long taim yu laik lusim ples slip bihain long kibung.
◼ Wok Volantia: Bai yumi kisim bikpela amamas moa long kibung sapos yumi volantia long helpim ol wok bilong kibung. (Ap. 20:35) Ol lain husat i laik volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim gut wok taim ol i wok aninit long lukaut bilong papa o mama o narapela bikpela man em papamama i orait long em.