Lukautim Gut Ples Bilong Mekim Lotu

¹ Long olgeta hap bilong graun winim 105,000 kongrigesen bilong ol Witnes Bilong Jehova. Planti kongrigesen i stadi long Baibel na bung wantaim ol wanbilip Kristen long wanpela Haus Kingdom, em ples bilong mekim lotu i tru.

² Klinim Long Olgeta Taim: Wok bilong klinim Haus Kingdom em i wanpela bikpela hap bilong wok holi bilong yumi. Buk Oganaisesen pes 121 i tok: “Ol bratasista bilong kongrigesen i mas ting em i wanpela gutpela wok ol i ken mekim bilong lukautim Haus Kingdom long rot bilong givim mani na mekim wok bilong klinim na stretim haus. Ausait na insait bilong Haus Kingdom i mas litimapim oganaisesen bilong Jehova.” Long olgeta wik yumi save yusim Haus Kingdom inap planti taim liklik, olsem na i gat wok long klinim na stretim long olgeta taim. Ol bratasista bilong kongrigesen i yusim Haus Kingdom ol i save mekim dispela wok. Olsem ol i bin mekim long taim bilong ol man i bin raitim Baibel, ol wokman bilong Jehova long nau i mas givim bel long “stretim” ples bilong mekim lotu.​—⁠2 Sto. 34:⁠10.

³ Putim long notisbot sediul bilong klinim Haus Kingdom long olgeta wik. Olgeta wan wan grup bilong autim tok i mas senis senis long klinim Haus Kingdom, na bihainim wanpela lista i kolim ol wok bilong mekim. Olgeta husat inap, ol i mas insait long wok bilong klinim na stretim gut Haus Kingdom. Ol papamama i ken helpim ol pikinini na bai ol tu i insait long dispela wok, na long dispela rot ol i skulim ol pikinini long pilim tru dispela gutpela wok. Sapos tupela o tripela kongrigesen i save yusim wanpela Haus Kingdom, em i bikpela samting long ol i mas wok gut wantaim na bai planti i insait long dispela wok.

⁴ Putim long stuarum samting wanpela lista i kolim ol wok bilong mekim. Dispela lista i mas stori gut long ol wok bilong mekim long olgeta wik, olsem brumim plua, klinim ol windo na antap bilong ol tebol samting, rausim pipia long ol rabis bin, mopim plua, na klinim ol toilet. Sampela wok i bilong mekim wan wan taim, olsem polisim ol samting ol i wokim long diwai na klinim gut ol sia, keten, ol lait, na fen. Putim olgeta marasin bilong klinim haus long hap we ol pikinini i no inap kisim, na raitim gut nem long ol dispela marasin. Raitim tu sampela tok i stori long pasin bilong mekim wok long ol dispela marasin.

⁵ Seifti long Haus Kingdom em i bikpela samting. (Lo 22:⁠8) Long dispela as, blok long pes 7 i kamapim sampela samting em yumi mas sekim na bai ol bagarap i no ken kamap.

⁶ Stretim Ol Samting Long Haus Kingdom: Lain elda i gat wok long bosim wok bilong stretim ol samting long Haus Kingdom. Planti taim ol i save makim wanpela elda o kongrigesen seven long lukautim dispela wok. Dispela elda o kongrigesen seven bai stretim ol samting i kamap long Haus Kingdom long wan wan de, na em wok bilong em long lukim olsem Haus Kingdom i stap klin, ol samting i stap stret, na i no sot long ol saplai. Em bikpela samting long i no gat wanpela samting em inap bagarapim man i stap insait o ausait long Haus Kingdom. Sapos tupela o tripela kongrigesen i yusim wanpela Haus Kingdom, lain elda i save makim wanpela Komiti Bilong Lukautim Haus Kingdom long stretim ol samting bilong Haus Kingdom na hap insait long banis. Dispela komiti i stap aninit long wok bos bilong lain elda. Sapos tupela o tripela kongrigesen i yusim wanpela Haus Kingdom, orait wanpela elda o kongrigesen sevan, o Komiti Bilong Lukautim Haus Kingdom bai stretim wok bilong lukautim Haus Kingdom.​—⁠Lukim buk Oganaisesen, pes 121, paragraf 1 na 2.

⁷ Long olgeta yia, wanpela elda o kongrigesen sevan, o Komiti Bilong Lukautim Haus Kingdom bai sekim Haus Kingdom na mekim wok long fom Lista Bilong Sekim Ol Samting Bilong Haus Kingdom (CN-14-MP), em fom brens ofis i bin salim i kam. Ol elda i gat wok long stretim rot bilong stretim ol samting i bagarap. Ol inap singautim ol pablisa long insait long wok bilong stretim ol samting bilong Haus Kingdom. Olgeta i mas redi na hariap long stretim ol samting i bagarap maski em wanpela liklik samting tasol.

⁸ Yusim Gut Mani Bilong Kongrigesen: Sapos tupela o tripela kongrigesen i yusim Haus Kingdom, Komiti Bilong Lukautim Haus Kingdom i mas i gat wanpela sek akaun na long olgeta mun ol i mas givim ripot bilong ol akaun long ol wan wan lain elda na bai ol elda i ken save long mani i go we. Ol elda i gat wok long skelim gut mani na bai ol i yusim gut mani bilong kongrigesen.

⁹ Bikpela Wok Bilong Stretim: Sampela taim i gat sampela wok i hatwok tumas o bikpela tumas long ol volantia bilong ol kongrigesen i ken mekim. Olsem ol waitanis i bagarapim diwai, wara i kam insait long rup, paip o toilet samting i bagarap. Taim ol elda i kisim save long dispela samting​—⁠ol i yet i painimaut o Komiti Bilong Lukautim Haus Kingdom i tokim ol​—⁠na ol i luksave olsem i gat bikpela wok bilong stretim o senisim ol samting bilong Haus Kingdom, orait ol elda i mas toktok wantaim Dipatmen Bilong Wokim Haus Kingdom long brens ofis bilong kisim tingting long samting ol i mas mekim.

¹⁰ Yumi amamas tru long yumi inap bung wantaim long Haus Kingdom! Oltaim yumi mas tingim tru ol miting na no ken ting olsem ol i samting nating tasol, nogat. Yumi olgeta inap helpim ol miting long kamap gut na strongim ol narapela taim yumi givim bel long lukautim gut Haus Kingdom. Dispela i save litimapim lotu i tru na i givim biknem long Jehova. Yumi mas tingting strong long lukautim gut dispela ples bilong mekim lotu.

[Askim Bilong Stadi]

1. Haus Kingdom i gat wanem wok bilong en?

2. Bilong wanem em i bikpela samting long Haus Kingdom i mas i stap klin na stret?

3. Olsem wanem ol i save stretim wok bilong klinim Haus Kingdom? Husat inap insait long dispela gutpela wok?

4. Kongrigesen i mas mekim wanem na bai ol bratasista i ken save long ol samting ol i mas mekim taim ol i klinim Haus Kingdom?

5. Bilong wanem seifti em i bikpela samting? Yumi mas sekim wanem ol samting? (Lukim blok long pes 7)

6. Ol i save mekim wanem bilong stretim wok bilong lukautim Haus Kingdom?

7. (a) Long olgeta yia, ol i save mekim wanem na bai ol samting long Haus Kingdom i stap gut? (b) I gat wanem ol samting yumi mas sekim? (Lukim blok long pes 7)

8. Komiti i save mekim wanem na bai ol i yusim gut mani bilong kongrigesen?

9. Long wanem taim ol elda i mas salim tok long brens long wok bilong stretim o senisim ol samting bilong Haus Kingdom?

10. Olsem wanem yumi inap kamapim klia olsem yumi amamas long i go long ol miting long Haus Kingdom?

[Blok long pes 7]

Ol Samting Bilong Tingim

◻ Sapos Haus Kingdom i gat ol fire extinguisher, ol i mas stap long ples klia na sekim ol gut long olgeta yia.

◻ Sapos Haus Kingdom i gat ol narapela dua o ol step, orait ol samting i no ken pasim ol na i mas i gat lait bambai ol man inap i go i kam long en. Sapos i gat handel bilong ol step, orait dispela i mas stap strong.

◻ Ol stuarum, ples bilong putim ol litresa na magasin na toilet i mas i stap stret na klin, na i no gat ol pipia, ol samting bilong kirapim paia, o sampela samting bilong ol bratasista.

◻ Oltaim yupela i mas sekim na klinim rup na ol gata.

◻ Ol liklik rot bilong wokabaut na ples bilong putim ka i no ken i gat ol samting inap mekim man i pundaun. Sapos i gat pawa, orait i gutpela long putim lait long ol dispela hap long taim i gat miting long nait.

◻ Oltaim yupela i mas sekim na stretim gut ol waia bilong pawa, ol swits bilong fen, na ol narapela samting i wok long pawa.

◻ Sapos long kapa o banis bilong Haus Kingdom i gat hul na wara i kam insait, stretim kwik dispela na bai ol plang samting i no ken sting na bagarap.

◻ Long olgeta taim sekim gut ol timba na pos samting olsem ol waitanis i stap o nogat, nogut ol i bagarapim ol pos samting.

◻ Taim i no gat man i stap long Haus Kingdom, mekim ol samting na bai ol samting long Haus Kingdom i ken stap gut. No ken lusim mani i stap long Haus Kingdom. Bilong lukautim gut ol samting bilong saun i gat bikpela pe, long pinis bilong olgeta miting, karim i go na putim long wanpela hap we ol stilman i no inap kisim.

[Blok long pes 7]

Lukautim Gut Haus Kingdom na Ol Samting Bilong En

◻ Ausait: Rup, ol wol ausait, peint, ol windo, na sain-bot bilong Haus Kingdom i stap gut?

◻ Graun: Ples insait long banis i stap gut? Banis, na ol liklik rot bilong wokabaut, na ples bilong putim ka i stap gut?

◻ Insait: Ol sia o fom, ol tep na swits bilong lait samting, ol wol na dua ol i bin peintim, ol kabot bilong putim litresa, ol rum bilong mekim miting, ol i stap gut? Ol keten i klin na i stap gut?

◻ Ol masin: Ol lait, ol samting bilong saun, na ol fen, ol i wok gut?

◻ Toilet: Ol i stap klin na i wok gut?

This is a partial repeat of the article in the km 8/03 taken from the km-E 8/03 “Let Us Keep Our Place of Worship in Good Repair”.