Kisim Helpim Long Rot Bilong Stadi Long Buk Go Klostu Long Jehova
1 Long wik bilong Mas 21, 2011, bai yumi stadi gen long buk Go Klostu Long Jehova long Baibel Stadi Bilong Kongrigesen. Olsem wanem dispela stadi inap helpim yumi? Yumi mas redim gut pastaim. Bai yumi stadi long 1-pela sapta insait long 4-pela wik, sediul i no makim planti paragraf tumas long olgeta wan wan wik. Dispela bai larim bikpela haptaim bilong yu ken kamapim tingting i stap long bel bilong yu long ol tok yu bin stadi long en na tingim tingim gut. Na tu, sediul i no makim planti tumas paragraf bilong mekim long taim bilong riviu long pinis bilong sapta bambai i gat taim bilong mekim wok long wanpela gutpela samting bilong dispela buk.
2 Kirap long sapta 2, i gat wanpela blok i stap long pinis bilong olgeta wan wan sapta ol i kolim, “Ol Askim Bilong Skelim Long Bel.” Bihain long yupela i skelim pinis laspela paragraf long sapta, brata i lukautim stadi bai askim odiens long stori long dispela blok. Em bai kirapim odiens long kamapim tingting bilong ol, na bai ol i ken stori long ol gutpela tingting ol i bin kisim taim ol i bin tingim tingim long bel ol skripsa. (Snd. 20:5) Na tu, brata i lukautim stadi i ken kamapim ol narapela askim olsem: “Dispela tok i lainim yu long wanem pasin bilong Jehova? Em i mekim wanem long laip bilong yu? Olsem wanem yu ken mekim wok long en bilong helpim ol narapela?” Em i laik kirapim olgeta long givim bel long bekim tok, na em i no laik traim save bilong ol bratasista long ol samting i no bikpela samting.
3 Buk Go Klostu Long Jehova i narapela kain buk. Tru, ol narapela buk em “gutpela wokboi i gat savetingting” i kamapim i litimapim nem bilong Jehova, tasol dispela buk i stori tasol long ol pasin bilong Jehova. (Mat. 24:45-47) Em wanpela gutpela samting yumi wetim! Taim yumi kisim save long pasin bilong Jehova, dispela bai helpim gut yumi. Dispela stadi inap helpim yumi long i go klostu moa long Papa bilong yumi long heven, na bai yumi ken mekim gut wok bilong yumi long helpim ol narapela long mekim olsem tu.—Jems 4:8.
This is a partial repeat of article km 9/04