Askim

◼ Ol yangpela pikinini bilong papamama Kristen i ken mekim wanem wok autim tok paslain long ol i kamap pablisa i no baptais yet?

Ol papamama Kristen i laik bai ol pikinini bilong ol i kamap strongpela wokboi bilong Jehova na givim bel tru long em. (1 Sml. 2:​18, 26; Luk 2:40) Ol pikinini bilong papamama Kristen, taim ol i liklik yet, gutpela sapos ol inap kamapim klia as bilong bilip bilong ol i stap long Baibel. Kirap long taim ol i liklik yet, sapos ol i go wantaim papamama bilong ol long autim tok, bai ol i kamap strong hariap long ol samting bilong spirit. Tasol bilong ol i ken amamas long autim tok, na kisim laik bilong kamap pablisa i no baptais, na mekim yet wok autim tok, bel i mas kirapim ol long autim tok. Olsem na papamama i mas skulim ol gut. (1 Tim. 4:6; 2 Tim. 2:15) Na sampela taim ol strongpela pablisa i ken helpim ol pikinini sapos papamama i orait long ol i mekim olsem.​—⁠Lukim buk Oganaisesen, pes 81, 82.

Taim ol gutpela pikinini i go wantaim papamama Kristen long ol haus na autim tok, ol i lain long pasin bilong autim tok. Paslain long ol i kamap pablisa i no baptais, ol yet i mas save gut long pasin bilong autim gut tok. Papamama Kristen i ken tingim wanem ol liklik tok pikinini inap kamapim taim ol i autim tok wantaim. Sapos pikinini i no kamap pablisa yet, em wanpela tasol i no ken i go long ol haus na autim tok o go wantaim narapela pikinini long autim tok. Papamama i ken helpim pikinini long redi long autim tok na larim em i mekim sampela samting, olsem kaunim wanpela skripsa, o tilim wanpela liklik nius o magasin, o soim piksa bilong wanpela buk samting long man bilong haus. Taim pikinini i wok long kamap bikpela, orait em i ken mekim sampela tok moa.

Sapos papamama i skulim gut pikinini long autim tok na pikinini i bihainim dispela tok bilong ol na bihainim gutpela pasin, orait long dispela rot pikinini inap pilim olsem wok autim tok em i bikpela samting. Ol pikinini i no pablisa yet, papamama i no ken lusim ol long bung bilong go autim tok na ting ol narapela bai lukautim ol, nogat. Ol papamama husat i tingim tru ol pikinini bilong ol, ol i save olsem em wok bilong ol yet long bosim pikinini​—em i no wok bilong narapela. Tasol ating sampela strongpela pablisa bai amamas long helpim ol pikinini insait long kongrigesen em ol i gat laik tru long mekim wok bilong Jehova long autim tok.

This is a repeat of article in km 12/92 and km 12/06 taken from km-E 10/92 “Question Box.”