Sampela Hap Long Nupela Taim Baibel, Matyu-Revelesen—Hap 1
Baibel New World Translation of the Holy Scriptures em i gutpela tul bilong helpim lain bilong Jehova long kamap strong long ol samting bilong lotu na helpim ol long autim gutnius long ol man. Yumi amamas olsem nau yumi gat dispela Baibel long Tok Pisin, em Nupela Taim Baibel, Matyu-Revelesen. Olsem wanem yumi inap mekim wok long en bilong strongim bilip bilong yumi? Na olsem wanem yumi ken yusim bilong helpim gut ol man yumi stadi wantaim ol na ol man i laik long harim tok em yumi bungim ol long autim tok? Orait nau yumi ken skelim sampela hap bilong Nupela Taim Baibel.
Ol Mep: Jisas i bin wokabaut inap hamas kilomita bilong mekim wok autim tok? Ol taun na ol ples em ol Gutnius i stori long en ol i stap we? Pol i raun long wanem ol hap bilong mekim wok misineri? Em i wokabaut long lek na raun long sip inap hamas kilomita? Sapos yumi save long ol dispela samting, em bai helpim yumi long tingim na pilim tru stori bilong Jisas long wok autim tok na wok misineri bilong Pol. Nupela Taim Baibel i gat tupela mep i soim ol ples long taim bilong Jisas em Baibel i stori long en. Namba wan mep em “Ol Ples Long Taim Bilong Jisas,” em i stap long kirap bilong Baibel. Narapela mep em “Palestain Long Taim Jisas i Mekim Wok Autim Tok,” em i stap long pes 609. Bilong bihainim Ol Raun Bilong Pol, lukim tupela laspela pes bilong Baibel. I gat ol narapela narapela kala i makim ol wan wan misineri raun bilong em i go long ol narapela narapela ples.
Ol Het Tok i Stap Antap long Pes: Ol het tok i stap antap long klostu olgeta pes bilong Nupela Taim Baibel. Ol dispela het tok i stori long ol tok i stap long dispela pes, na ol i bilong helpim ol pablisa bilong Kingdom long painim hariap ol tok bilong bekim askim bilong man. Olsem: Ating wanpela man i askim long as na yumi no save kisim blut. Yumi save olsem skripsa i toktok long blut i stap long Buk Aposel. (Tokim odiens long opim long Buk Aposel na wetim ol i opim Baibel.) Yumi ken opim i go long namel bilong Buk Aposel na skelim ol het tok antap long pes, na long pes 257 bai yu lukim het tok “Disisen: Sakim pasin pamuk, blut.” Dispela tok em i namba wan hap bilong het tok long dispela pes na i makim olsem ves i stori long blut i stap long hapsait long han kais bilong pes 257. Lukim, em i stap long ves 20. Sapos dispela tok i stap long laspela hap bilong het tok, dispela i makim olsem ves i stori long dispela tok i stap long hapsait long han sut bilong dispela pes.
Ol Futnot: Narapela samting bilong Nupela Taim Baibel, Matyu-Revelesen em ol futnot. Ol futnot i kamapim sampela tok moa bilong helpim man i ritim Baibel long kliagut long wanpela tok. Ol i putim tu ol narapela rot bilong tanim wanpela hap tok, na tu, ol i kamapim mining bilong sampela tok na ol tok i stiaim yumi i go long apendiks we ol i eksplenim gut mining bilong sampela tok em Baibel i yusim. Olsem: Ritim Aposel 2:1 na futnot wantaim. Yumi lainim wanem samting? (Brata i lukautim dispela hap i ken kamapim bekim o askim odiens long stori long dispela.)
Long 1 Korin 13:8, yu inap lukim wanpela eksampel bilong narapela rot bilong tanim wanpela ves na dispela i kamapim sampela mining moa bilong dispela ves. (Ritim skripsa.) “Pasin laikim i no inap pinis,” dispela i makim olsem oltaim pasin laikim i save win na i no gat wanpela samting inap daunim.
Ol futnot i helpim yumi tu long kisim sampela save moa long ol stori bilong Baibel. Skelim tupela futnot i stap long Aposel 17:18. (Plis ritim dispela ves na tupela futnot.) Save yumi kisim long futnot i helpim yumi long kliagut long wanem kain ol lain em Pol i autim tok long ol. O lukim 1 Korin 9:9. (Plis ritim skripsa na futnot.) Dispela futnot i givim sampela save long yumi long wanem kain wok ol i mekim na i helpim yumi long kliagut long as na Pol i mekim wok long dispela tok piksa.
Ol futnot i gutpela helpim tu long taim yumi autim tok. Taim pablisa i toktok wantaim wanpela man long “hel,” em i ken tokim man long lukim Matyu 10:28 long Baibel bilong em yet. Dispela ves i tok: “Yupela i mas pret long God tasol. Em inap bagarapim spirit na bodi tu long hel.” Orait nau pablisa i ken ritim seim skripsa long Nupela Taim Baibel. Ves i tok: “Yupela i mas pret long man husat inap bagarapim laip na bodi wantaim long Gehena.” Nau pablisa i lukim futnot long dispela tok “Gehena.” Futnot i tok: “ ‘Gehena.’ Ples ausait long Jerusalem we ol i save kukim pipia. Lukim Apd 9.” Apendiks 9 i eksplenim gut mining bilong tok Grik em ol i tanim olsem Gehena. (Opim long apendiks na ritim par. 2, 4, na 5.) Dispela save bai helpim man i gat gutpela bel long save long wanem tok stret em Baibel i mekim long hel.
Plis, wok yet long kisim save gut long ol hap bilong Nupela Taim Baibel. Mekim wok long en taim yu mekim stadi bilong yu yet na long taim yu autim tok, na bai dispela i strongim yu yet, ol Baibel sumatin bilong yu, na ol man yu autim tok long ol.
This article is unique to PNG