Sampela Hap Long Nupela Taim Baibel, Matyu-Revelesen—Hap 2
Ol Tok Bilong Baibel Bilong Toktok Long En: Long Nupela Taim Baibel i gat wanpela hap we inap helpim yumi long wok autim tok. Kirap long pes 618 i gat hap “Ol Tok Bilong Baibel Bilong Toktok Long En.” Long dispela hap i gat 44 bikpela tok bilong Baibel, na dispela lista i kirap long leta A na i bihainim alfabet. Olsem wanem yumi inap mekim wok long dispela hap?
Sapos man bilong haus i kamapim wanpela tok na yu no inap tingim wanpela skripsa bilong bekim dispela tok, orait yu inap opim i go long baksait bilong Baibel na painim het tok i stret long samting man bilong haus i toktok long en. O sapos yu bin kamapim pinis 1-pela o 2-pela skripsa long man bilong haus, tasol ating yu mas kamapim sampela skripsa moa, orait yu inap lukim het tok i stret na painim sampela moa skripsa.
Olsem: Taim yu toktok wantaim man bilong haus, em i askim yu long as na ol Witnes Bilong Jehova i no laik kisim blut. Yu tingim Aposel 15:28, 29 na yu ritim, tasol yu luksave olsem man bilong haus i no bilip tumas. Bilong painim hariap sampela skripsa moa long dispela samting, yu inap lukim het tok “Blut” long hap “Ol Tok Bilong Baibel Bilong Toktok Long En.” Long dispela hap bai yu painim ol skripsa i soim olsem dispela em i wanpela lo bilong Jehova kirap long taim bilong Noa na i kam. Na tu, bai yu painim narapela bikpela poin bilong toktok long en, olsem “B. Maski blut inap seivim laip, no ken brukim lo bilong God,” na ol skripsa i sapotim dispela poin. Long dispela rot bai yu inap autim gut tok.
Yumi tenkyu long Jehova long em i bin givim yumi dispela gutpela Baibel long rot bilong “gutpela wokboi i gat savetingting.” (Mat. 24:45) Gutpela sapos yumi yusim dispela Baibel na ol gutpela samting bilong en long helpim olgeta manmeri em “bel bilong ol i gutpela long kisim laip oltaim” bambai ol i ken kamap bilipman.—Apo. 13:48.
This article is unique to PNG