Sampela Hap Long Nupela Taim Baibel, Matyu-Revelesen—Hap 3
Indeks Bilong Ol Wed Bilong Baibel: Long baksait bilong Nupela Taim Baibel i gat wanpela hap ol i kolim “Indeks Bilong Ol Wed Bilong Baibel.” Long dispela hap bai yu painim lista bilong planti tausen bikpela wed bilong Baibel na ol hap tok i stap klostu long ol dispela wed. Long rot bilong wed indeks yumi inap painim ol skripsa bilong ol bikpela tok bilong Baibel, kain olsem “kirap bek” o “pe bilong baim bek,” na dispela i helpim yumi long stadi gut long Baibel. Sapos pablisa i mas toktok long ol kain bikpela tok olsem, em inap yusim ol hap tok i stap klostu long dispela wed long Indeks. Na tu, ol i putim long Indeks ol skripsa i kamapim nem bilong ol ples Baibel i kolim na ol man Baibel i stori long ol. Ol dispela samting i helpim olgeta Baibel sumatin husat i yusim dispela Baibel.
Taim yu toktok wantaim man long Baibel, na yu no inap tingim wanpela skripsa i stap we long Baibel, orait yu inap opim “Indeks Bilong Ol Wed Bilong Baibel” i stap long baksait bilong Baibel na kisim helpim.
Olsem, long wok autim tok yu inap bungim wanpela man husat i bilip long lo bilong de Sabat. Yu no inap tingim skripsa, tasol yu inap tingim ol hap tok bilong skripsa, olsem “strong long tingim ol de.” Yu makim wanpela bikpela wed olsem “tingim” na lukim dispela wed long “Indeks Bilong Ol Wed Bilong Baibel” (dispela wed i stap long pes 569). Taim yu lukim lista aninit long wed “tingim,” bai yu lukim “Ga 4:10 strong tumas long t. tru ol de.” Nau yu painim pinis skripsa yu bin tingting long en, em Galesia 4:10. Sampela taim yu no inap painim skripsa aninit long wanpela bikpela wed, olsem na yu mas tingim narapela bikpela wed.
Long olgeta hap tok we i gat leta long strongpela rait na fulstop bihain long en, dispela i makim olsem ol i sotim wed i stap long lista, olsem long paragraf antap, “t.” i makim wed tingim. Olsem na taim yu lukim leta long strongpela rait, yu mas ritim dispela leta olsem wed i stap long lista. Long eksampel antap, bai yu ritim dispela hap tok olsem “strong tumas long tingim tru ol de.”
Mipela i bilip olsem dispela hap “Indeks Bilong Ol Wed Bilong Baibel” i wanpela gutpela tul bilong helpim yu tru long wok autim tok bilong yu.
This article is unique to PNG