Sampela Hap Long Nupela Taim Baibel, Matyu-Revelesen—Hap 4
Long wanpela Wok Kingdom paslain long dispela, ol i bin stori liklik long Apendiks i stap long Nupela Taim Baibel. Orait nau yumi ken stori gut long en. Wanem ol samting i stap long Apendiks? Plis opim Baibel long pes 577 we i gat lista bilong ol tok i stap insait long Apendiks.
Long apendiks i gat ol narapela narapela samting. I gat 2-pela mep, kalenda bilong ol Juda long taim bilong Jisas, sat i stori long ol bikpela samting i kamap long laip bilong Jisas, na wanpela dikseneri i kamapim mining bilong sampela tok bilong Baibel. Apendiks 1 “Nem Bilong God Insait Long Ol Skripsa Grik” i kamapim as na yumi yusim nem bilong Jehova long Nupela Taim Baibel, na tu, i gat sampela piksa bilong ol olpela rait. Dispela Baibel i putim nem Jehova long hap stret bilong en long Ol Skripsa Holi.—Mat. 6:9; Rom 10:13.
Olsem wanem yumi inap mekim wok long Apendiks? I gat planti rot, tasol bai yumi stori long 2-pela samting.
Namba 1 samting, planti Baibel i tanim tok i stap long Matyu 24:3 olsem, “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” Planti lotu i save tok, ol aposel i askim Jisas long mak na bai ol i ken save em i laik “kam bek,” em wanpela mak i kamapim klia tru olsem klostu nau em bai kam bek. Ol i ting, taim em i “kam bek” long dispela taim stret em bai kisim ol Kristen i go long heven, na bihain long en em bai bagarapim dispela graun. Olsem wanem? Dispela tok em i tru? Opim Baibel bilong yu long Apendiks 5 “Krais i Kam i Stap (Parousia)” na ritim paragraf 2 na 3. Nau yumi kliagut long samting ol aposel i askim Jisas long en na kliagut long mining bilong bekim bilong Jisas.
Namba 2 samting, mekim wok long Apendiks 12, “Ol Mun Bilong Baibel.” Taim yu toktok wantaim wanpela man long de mama i karim Jisas, yu inap ritim Luk 2:8, em i tok: “Long dispela hap tu i gat ol wasman bilong sipsip ol i stap ausait na was long ol sipsip bilong ol long nait.” Bihain long dispela, opim Baibel bilong yu i go long Apendiks 12 (pes 597) na soim man bilong haus long wanem kain weda i stap long pinis bilong mun Disemba. (Lukim aninit long het tok Ol Mun, Lotu, namba 10, na ritim dispela hap. Na tu, soim mun Novemba/Disemba i stap long sat na ritim tok i stap long en.) So long pinis bilong mun Disemba long Israel, em taim bilong kol na ren na ol sipsip i save stap insait long haus. Olsem na mama i no karim Jisas long dispela taim.
Tru tumas, “tok bilong God i gat laip na i wok strong i stap.” (Hib. 4:12) Yumi gat gutpela wok tru long yusim tok bilong Baibel bilong helpim ol narapela bambai strong bilong en i ken stiaim wokabaut bilong ol.
This article is unique to PNG