Pas i Kam Long Gavening Bodi
Yes Ol Wanbilip Witnes Bilong Jehova:
Mipela i amamas tru long raitim pas long yupela ol gutpela wokboi bilong Jehova, nau namba bilong yupela i winim 7 milion. Taim yu bungim wanpela wanbilip long narapela kantri, wantu bai yu laikim em. (Jon 13:34, 35) Taim yu ritim Yearbook, ol gutpela stori long bilip na pasin bilong ol bratasista long stap gut long God long planti kantri, bai kirapim yu long pilim dispela pasin laikim i narakain tru.
Ol ripot i kam long olgeta hap i soim olsem planti bilong yupela i save mekim Famili Lotu long olgeta wik. Yupela husat i gat ol liklik pikinini i bin yusim kain kain gutpela rot bilong kirapim tingting bilong ol pikinini na helpim ol long putim yau long ol tok yupela i mekim. (Efe. 6:4) Ol marit i pas gut moa wantaim taim ol i stadi wantaim long Baibel na strongim narapela narapela. (Efe. 5:28-33) Tru tumas, olgeta wan wan na ol famili i wok long kisim helpim long dispela rot bilong stadi gut long Tok Bilong God.—Jos. 1:8, 9.
Mipela i pilim hevi bilong yupela husat i kisim ol bikpela hevi long ol disasta i kamap i no longtaim i go pinis. Mipela i laik tok tenkyu long planti bilong yupela husat i no surik long helpim ol rilif wok long taim bilong ol dispela disasta. (Apo. 11:28-30; Gal. 6:9, 10) Na tu, long olgeta kongrigesen i gat ol bratasista husat i luksave long ol brata husat i sot na ol i givim helpim. Olsem Dorkas long bipo, yupela i “save mekim planti samting bilong helpim ol arapela.” (Apo. 9:36) Yupela i ken save olsem Jehova i lukim gutpela pasin bilong yupela na em bai praisim yupela.—Mat. 6:3, 4.
Long sampela kantri, i gat ol lain husat i paulim ol lo bilong daunim raits bilong yupela, ol i laik ‘putim lo i tok orait long ol manmeri i mekim nogut’ long yupela. (Sng. 94:20-22) Yupela i save olsem Jisas i bin tok profet long pasin birua bai kamap, olsem na yupela i strongim bel na karim hevi bilong dispela, na lukluk i go long Jehova olsem ples hait bilong yupela. (Jon 15:19, 20) Yupela i ken bilip olsem oltaim mipela i save tingim yupela long beten bilong mipela, taim yupela i “bekim tok long olgeta man i askim yupela long ol samting yupela i bilip na wet long en.”—1 Pita 3:13-15.
Mipela i laik tok amamas long yupela olgeta husat i stap klin long pasin bilong yupela inap planti yia pinis, maski Satan i wok strong long kirapim ol man long mekim olkain pasin pamuk na i yusim kain kain rot bilong mekim olsem. Nau long dispela taim we pasin bilong ol manmeri i wok long i go nogut olgeta, yupela i “wok yet long kisim strong long Bikpela na kisim strong long bikpela pawa bilong en.” (Efe. 6:10) Yupela i “pasim olgeta klos pait i kam long God,” na yupela i sanap strong na sakim “ol pasin trik bilong Satan.” (Efe. 6:11, 12) Tingim, taim yupela i sanap strong, Jehova i yusim dispela pasin bilong yupela long bekim tok long Satan!—Snd. 27:11.
Mipela i amamas long kisim save olsem long 2011, inap 19,374,737 manmeri i bin bung long Memorial bilong tingim dai bilong Bikpela. Wanpela samting i mekim na bikpela lain olsem i bin bung, em yupela planti i bin bihainim singaut bilong mekim wok painia haptaim long las Epril. Planti milion manmeri inap harim ol Witnes i wanbel na litimapim nem bilong Jehova! (Rom 10:18) Sapos yupela i bin insait long lain 2,657,377 husat i bin mekim wok painia haptaim long dispela mun, o yupela i bin wok strong long mekim bikpela wok moa, orait pasin bilong yupela olgeta long amamas na givim bel long wok i givim bikpela amamas tru long mipela.—Sng. 110:3; Kol. 3:23.
Long las yia, inap 263,131 bratasista i bin kisim baptais bilong makim olsem ol i dediket long Jehova. Mipela i tok tenkyu long Jehova long dispela samting, na mipela i tenkyu long yupela olgeta i joinim mipela long singautim ol narapela tu, olsem: “‘Yu kam!” Na ol man i harim dispela tok, ol tu i mas tok: “Yu kam!” Na man nek bilong en i drai em i mas i kam. Olgeta man i gat laik long kisim wara bilong laip, ol i ken kisim fri.” (Rev. 22:17) Long ol kibung distrik bilong 2011, yumi bin skelim ol narapela narapela samting bilong Kingdom Bilong God, olsem na yumi pilim tru na tokaut olsem, “Kingdom Bilong God i Mas i Kam!” Tok bilong Jisas olsem “mi bai kam kwiktaim” i kirapim yumi long mekim wankain tok olsem aposel Jon: “Amen! Bikpela Jisas, yu kam.”—Rev. 22:20.
Taim yupela i was i stap na wetim dispela gutpela samting bai kamap, yupela i ken save olsem mipela i laikim tru yupela olgeta wan wan brata na sista husat i kamapim klia pasin bilong yupela long laikim tru Jehova ‘long ol samting yupela i mekim na long pasin i tru’!—1 Jon 3:18.
Ol brata bilong yupela,
Gavening Bodi Bilong Ol Witnes Bilong Jehova