Pas i Kam Long Gavening Bodi
Yes Ol Arapela Wokboi:
Mipela i amamas tru long raitim pas long yupela long kirap bilong dispela nupela yia! Klostu long pinis bilong 2014, em bai olsem 100 yia bilong King bilong yumi, Jisas Krais, i bin kirap mekim wok bos namel long ol birua.—Sng. 110:1, 2.
Long kirap bilong dispela sevis yia, long annual miting bilong Watch Tower Bible and Tract Society of Pennsylvania, komiti bilong tanim Baibel New World Translation i tokaut long nupela Baibel New World Translation long tok Inglis em ol i bin mekim sampela senis long en. Em i gutpela Baibel tru em olgeta man inap kisim. Jehova i bin givim wok long ol man em i makim long holi spirit long kamapim fes Baibel New World Translation. (Rom 8:15, 16) Ating yu wanbel olsem dispela i mekim na dispela Baibel i nambawan gutpela Baibel tru.
Inap planti yia, Komiti Bilong Raitim Tok bilong Gavening Bodi i putim wok bilong tanim tok bilong Baibel i stap nambawan bikpela samting. Long nau, Baibel New World Translation olgeta o sampela hap bilong en i stap long 121 tokples. Mipela i laik kirapim yupela long soim Jehova olsem yupela i amamas tru long Baibel yupela i holim. Ritim na tingim tingim long bel ol tok bilong en long olgeta de. Long dispela rot, bai yu go klostu tru long Man i as bilong ol tok bilong en, em God Jehova.—Jems 4:8.
Taim yumi harim stori bilong ol hevi i save painim ol gutpela bratasista bilong yumi, yumi save pilim tru hevi bilong ol. Yumi save, ating sampela taim i hatwok long ol i stap amamas. Olsem: Long Esia, bikpela senis tru i kamap long wanpela famili taim mama bilong ol i kamap paralais wantu tasol. Ol dokta i no inap stretim sik bilong em. Sori tru, nau man bilong em i mas lukautim em long olgeta de long san na nait. Pikinini man na 2-pela pikinini meri bilong ol i stap gutpela piksa olsem Kristen long pasin bilong lukautim na helpim papamama bilong ol. Dispela famili na yupela olgeta husat i bin sanap strong na karim kain kain hevi, yupela inap pilim kain amamas i save kamap long pasin bilong sanap strong long ol hevi i traim bilip bilong yupela. (Jems 1:2-4) Jehova i tokim yumi, ol Kristen em i bin makim na ol arapela sipsip, olsem yumi bai amamas long sanap strong yet na karim ol hevi, long wanem, God bai blesim yumi na givim yumi presen em laip i stap oltaim!—Jems 1:12.
Las yia, inap 19,241,252 i bin kam long Memorial. Yumi amamas long lukim planti man tru i givim ona long Jehova na Jisas Krais taim ol i kam long nambawan bikpela miting bilong ol manmeri bilong God i save kamap long olgeta yia! Long taim bilong Memorial, taim planti milion i mekim wok olsem painia haptaim long mun Mas na Epril, ol i givim biknem tru long Jehova. Dispela i kirapim tru yumi! Na ating yupela i bin amamas long save olsem ol bratasista i mekim wok painia haptaim long taim wasman sekit i kam lukim kongrigesen, ol inap insait long miting olgeta bilong ol painia em wasman sekit i mekim, maski sapos visit bilong em i no kamap long Mas o Epril. Ol bratasista husat i pas gut wantaim God ol i pilim olsem em i bikpela samting long wok strong long autim tok na mekim ol wok bilong kongrigesen. Taim yumi bisi long mekim ol wok bilong God, dispela i helpim yumi long sanap strong na yumi no slek, na i pasim ol traim bilong Satan long pundaunim bilip bilong yumi.—1 Kor. 15:58.
Yumi amamas tru long save olsem long sevis yia i go pinis, inap 277,344 i bin kisim baptais na nau ol i wokabaut wantaim lain brata bilong olgeta hap long rot bilong kisim laip oltaim! (Mat. 7:13, 14) Yumi mas sapotim ol dispela nupela bratasista long “sanap strong long bilip.” (Kol. 2:7) Wok yet long strongim narapela narapela long sanap strong i go inap long pinis. (Mat. 24:13) Yupela i mas “mekim gut bel bilong ol man i bel hevi, na helpim ol man i no gat strong, na yupela i mas kamapim pasin bilong i no les kwik long olgeta man.” (1 Tes. 5:14) Na yumi wan wan i mas “beten oltaim,” na tok: “Kingdom bilong yu i mas i kam.”—1 Tes. 5:17; Mat. 6:10.
I gutpela long ritim dispela Yearbook, na tingim olsem mipela i laikim yupela olgeta husat i laikim Jehova!
Ol brata bilong yupela,
Gavening Bodi Bilong Ol Witnes Bilong Jehova