Mekim Baibel Stadi i Save Helpim Gut Man
1. Ol pablisa i save mekim ol Baibel stadi ol i gat wanem wok?
1 I no gat man inap lotuim God sapos Jehova i no “kirapim em long kam.” (Jon 6:44) Maski i olsem, ol pablisa husat i mekim ol Baibel stadi ol i mas mekim wok bilong ol long helpim ol man long go klostu long Papa bilong ol long heven. (Jems 4:8) Bilong mekim olsem ol i mas redi gut. Pasin bilong ritim wan wan paragraf na kamapim ol askim long buk, dispela tasol i no inap helpim Baibel sumatin long kisimgut insait bilong ol tok na kamap strong, nogat.
2. Wanem gutpela samting bai kamap taim yumi mekim gut Baibel stadi?
2 Bilong mekim Baibel stadi i helpim gut man, pablisa i mas helpim Baibel sumatin bilong em long (1) kliagut long Baibel i tok wanem long ol tok na ol bilip samting, (2) wanbel long ol tok bilong Baibel ol i lainim, na (3) ol i mas bihainim ol tok bilong Baibel long ol samting ol i mekim. (Jon 3:16; 17:3; Jems 2:26) Olsem na sampela mun inap lus taim yumi wok long helpim wanpela long bihainim ol dispela rot. Tasol wan wan bilong ol dispela rot i makim wan wan mak Baibel sumatin inapim long pas gut wantaim Jehova na dediket long em.
3. Bilong wanem ol gutpela tisa i save mekim ol askim bilong kirapim sumatin long wokim tingting?
3 Yu Save Long Tingting Bilong Baibel Sumatin?: Bilong save olsem Baibel sumatin i kisimgut ol tok em i lainim na bilip long en, yumi yet i no ken mekim planti tok tumas, yumi mas kirapim em long kamapim tingting bilong em. (Jems 1:19) Olsem wanem? Em i kliagut long ol tok Baibel i mekim long samting nau yupela i stori long en? Em inap stori long dispela samting long toktok bilong em yet? Em i gat wanem tingting long ol tok em i lainim? Em i bilip olsem ol tok bilong Baibel em i lainim ol i stret? (1 Tes. 2:13) Em i save olsem samting em i lainim i mas mekim sampela samting long pasin na sindaun bilong em? (Kol. 3:10) Bilong kisim bekim bilong ol kain askim olsem, yumi mas mekim ol askim we i kirapim em long kamapim tingting bilong em, na putim gut yau long em.—Mat. 16:13-16.
4. Yumi mas mekim wanem sapos sumatin i hatwok long kisimgut o bihainim ol tok bilong Baibel em i lainim?
4 Ol kain pasin na tingting kranki i save pas strong long bel bilong man na sampela yia o mun inap lus pastaim bambai man i ken rausim. (2 Kor. 10:5) Olsem wanem sapos sumatin i no bilip long ol samting em i lainim na i no bihainim? No ken givap kwik, larim sampela taim i mas lus pastaim bambai Tok Bilong God na holi spirit bilong em i ken wok gut long bel bilong sumatin. (1 Kor. 3:6, 7; Hib. 4:12) Sapos sumatin i hatwok long kisimgut o bihainim wanpela tok bilong Baibel, no ken subim em, planti taim i gutpela long yumi go long narapela stori. Taim yumi wok long skulim em long Baibel na yumi no les kwik, ating bihain dispela inap kirapim em long senisim pasin bilong em.