Gutpela Ripot Bilong Autim Tok

Maski em taim bilong ren, i no longtaim i go pinis, ol brata long Lae i bin wokabaut i go antap long ol ples maunten bilong Finsafen, we rot i no gutpela tumas na ples i kol nogut tru. Ol brata i wokabaut inap sampela de bilong go mekim wanpela de kibung sekit long Lengbati, Morobe Provins. Em namba 1 taim wanpela kibung i kamap long dispela hap. Inap olsem 363 i bung na 6-pela i kisim baptais.