Ripot Bilong Autim Tok

Long mun Disemba las yia: yumi bin mekim namba 1 Rijinel Kibung long Manus Ailan. Olgeta i amamas tru, na planti i ron long bot o long PM inap planti aua long kam. Sampela i bungim mani inap olsem K1,040.00 bilong haiarim bot. Planti i kam long kibung, em namba 1 taim bilong ol long go long wanpela kibung, long wanem, pastaim ol kibung i save kamap long narapela hap o pe bilong sip samting i antap tumas, na planti i no inap go long ol kibung. Inap olsem 38 pablisa long ailan, tasol ol manmeri i kam kibung em inap olsem 206. Planti man i kam long kibung em ol man i laik harim tok na ol Baibel stadi na ol famili bilong ol. Aiwara i pulap long ai bilong ol brata taim ol i tenkyu long Jehova na Brens Ofis long stretim rot bilong kamapim kibung long hap.