Yu Save Long Dispela?
Hau ol pris long tempel bilong Jerusalem i rausim blut bilong ol animal em ol i kilim na mekim ofa long alta?
LONG olgeta yia, ol pris long Israel bilong bipo i save ofaim planti tausen animal olsem sakrifais antap long alta bilong tempel. Josifas em wanpela saveman bilong Juda na em i save raitim stori bilong ol samting i kamap long bipo, em i tok olsem long taim bilong Pasova ol i save kilim moa long 250,000 sipsip long mekim ofa, olsem na planti blut i save kapsait long alta. (Wkp. 1:10, 11; Nam. 28:16, 19) Hau ol i rausim olgeta dispela blut?
Ol saveman bilong painim ol samting bilong bipo, ol i digim graun na painimaut olsem i gat wanpela baret insait long tempel bilong Herot, em tempel ol i bin yusim i go inap long em i bagarap long 70 C.E. I luk olsem ol i yusim dispela baret long rausim blut bilong ol animal em ol i ofaim antap long pletfom bilong tempel.
Yumi ken skelim tupela samting long dispela baret:
Ol hul i stap aninit long alta: Wanpela stori bilong ol hul bilong rausim ol wara samting long alta i stap long buk Misna, em wanpela olpela buk i gat ol lo na ol kastam bilong ol Juda long en na ol i bin raitim bihain long yia 200 C.E. Buk i tok: “Long saut-wes kona i gat tupela hul . . . long dispela hap, blut em ol i kapsaitim long hap wes na hap saut long as bilong tempel i save ron i go daun long dispela baret na bung wantaim wara i ron i go daun long Kidron.”
Ol saveman bilong painim ol samting bilong bipo i wanbel long tok em dispela olpela buk i mekim olsem i gat “ol hul” klostu long ol alta bilong bipo. Wanpela buk (The Cambridge History of Judaism) i stori tu olsem ol saveman i bin painim “ol baret” klostu long tempel. Buk i tok: “Ating ol i yusim ol dispela baret long rausim ol wara em ol i miks wantaim blut bilong ol animal em ol i kilim bilong mekim ofa long Pletfom Bilong Tempel.”
I gat planti wara: Ol pris i nidim bikpela wara saplai long ol i ken klinim gut as bilong alta na dispela baret i ken stap klin. Bilong mekim dispela bikpela wok, ol pris i save kisim bikpela wara saplai i kam insait long taun. Ol i kisim wara long rot bilong ol kenel long ol bikpela baret na ol dispela wara i ron i go insait long ol hulwara na ol pul i stap klostu long tempel. Saientis Joseph Patrich i tok: “Long dispela taim bipo, i no gat wanpela tempel i gat dispela kain gutpela wei bilong kisim wara, wasim na klinim ol samting, na rausim ol doti wara.”