Yusim “Presen i Kam Long God”

Yumi olgeta i save amamas long yumi save strongim narapela narapela, em pasin i stap namel long yumi ol bratasista Kristen. Tasol i gat sampela samting moa i insait long pasin bilong strongim narapela narapela. Baibel i tok pasin bilong yumi long strongim bilip bilong narapela narapela em “presen i kam long God.” (Rom 1:​11, 12) Hau yumi inap yusim gut dispela presen?

Presen bilong mekim ol gutpela tok. Olsem, yumi ken bekim tok long miting, tasol yumi no laik stori tumas long laip bilong yumi yet, nogat. Yumi laik stori long skul yumi kisim long Jehova, tok bilong em long Baibel, na ol manmeri bilong em. Taim yumi toktok wantaim ol wanbilip, yumi ken stori long ol samting bilong strongim bilip bilong narapela narapela.

Strongim ol narapela long rot bilong ol disisen na ol pasin bilong yu. Olsem, sampela i wokim disisen long stap yet long fultaim sevis maski ol i karim ol hevi bilong ol yet. Na ol narapela i save go oltaim long ol miting i kamap namel long wik, maski ol i bisi long mekim wok mani, o ol i gat wanpela bikpela sik.

Olsem wanem? Yu save mekim ol tok bilong strongim bilip bilong ol bratasista bilong yu? Na yu larim ol tok ol i mekim i strongim yu?