Pisin Stok—Em Gutpela Pisin
Man bilong “Kirap!” em i stap long Spen em i raitim dispela stori
I GAT wanpela pisin stok i save kam long ol ples long Yurop long taim bilong san, na ol man i save laikim, long wanem, wokabaut bilong en long antap i gutpela, na em i save kam long ol ples em ol man i save sindaun long en, na em i save kaikai ol binatang i save bagarapim gaden bilong ol man.
Na narapela gutpela pasin bilong stok, em i save lukautim gut haus bilong en, na em i save kam bek long haus bilong en long olgeta yia, na em i no lusim poroman bilong en; taim man tupela meri i poroman pinis, tupela i save stap wantaim i go inap long ol i lapun pinis na ol i dai. Long tok Hibru ol i kolim dispela pisin olsem “man bilong stap gut long poroman bilong em” o “man bilong pasin sori,” long wanem, ol i save mekim pasin sori long poroman bilong ol.
Long 200 yia bipo long Holan gavman i tambuim ol man long mekim nogut long ol stok, na ol i tok, ol stok i kamap pren bilong ol man na ol i save kam wokabaut long biktaun Heik long hap ol i maketim pis. Na long Jemani ol i makim stok i olsem pisin bilong kantri Jemani. Long planti taun long Yurop ol man i save wokim bet antap long haus bilong ol na bai stok i ken kam na wokim haus bilong en antap long dispela bet na em i ken putim kiau bilong en na kamapim pikinini. Ol man i amamas long ol stok i kam long hap bilong ol!
I Gat Taim Bilong Ol i Kam, na i Gat Taim Bilong Ol i Go
Long taim bilong kol long Yurop, sampela stok bilong Yurop ol i save go long Wes Afrika na Saut Afrika. Ol i kirap lusim Yurop long Ogas. Ol i save kisim malolo long rot, long wanem, ol i no inap flai longwe tumas. Taim ol i laik wokabaut ol i save bung na ol i go. Ol stok bilong wanpela hap ol yet i bung wantaim, na ol stok bilong narapela hap ol tu i mekim olsem. Long Februeri o Mas ol i save kam bek gen long haus bilong ol long Yurop.
Long arere bilong wing bilong stok na i go long arere bilong narapela wing bilong en em inap 2 mita. Stok em i bikpela pisin. Ol i gat taim stret bilong kam long Yurop, na ol i gat taim stret bilong go long Afrika, olsem na ol man i save lukluk long ol. Ol i save kam i go long Palestain long Septemba na long Mas. Winim 2,500 yia bipo profet Jeremaia i bin toktok long dispela samting, na em i tok, stok “i save long taim bilong kam i stap long wanpela hap na long taim bilong lusim dispela hap gen.”—Jeremaia 8:7.
Raun bilong ol stok long i go na long i kam bek gen em inap olsem 16,000 kilomita, em longwe tru, na planti taim ol i no meknaisim tupela wing bilong ol—ol i trip tasol i go, olsem balus, long wanem, ol i save flai long ol hap i gat win i kirap long graun na i go antap, na dispela win i litimapim ol stok na karim i go; ol i opim tupela bikpela wing bilong ol, na win i subim ol i go.
Ol stok i no laik flai longwe antap long bikpela solwara, long wanem, i no gat dispela win i save go antap bilong litimapim ol; long mun Ogas planti tausen ol i save bung wantaim bilong brukim solwara Mediterenian, olsem na ol i mas brukim long hap i no longwe tumas—ol i kirap long Spen na ol i go pundaun long Afrika, em 14 kilomita tasol, na ol i hatwok inap 5-pela aua. Tasol taim ol i brukim Sahara, em bikpela ples wesan nating, ol i trip tasol i go na win i helpim ol, na maski i longwe, i no hatwok long ol.
Haus Bilong Ol i Narapela Kain
Stok i save wokim haus bilong en long ples klia, olsem antap long wanpela bikpela diwai, o pos i gat ol waia bilong pawa. Long bipo ol i wokim antap long diwai pain.—Buk Song 104:17.
Long Yurop, inap sampela handet yia ol stok i bin wokim haus bilong ol antap long haus bilong ol man o long haus lotu o antap long paip smok bilong ol haus. Stok man na stok meri wantaim i save wokim haus bilong tupela, na sapos yu lukim dispela haus bai yu ting em i mas pundaun, tasol nogat; maski bikpela win i laik kapsaitim, haus i strong. Na taim ol i kam bek long haus bilong ol long olgeta yia ol i gat liklik wok tasol long stretim.
Ol i save kam bek long taim kol i pinis, na stok man wantaim meri bilong en tupela wantaim i stretim haus bilong ol, olsem putim sampela liklik stik na gras samting. Na taim ol i mekim olsem inap sampela yia, haus i kamap bikpela na em i go antap inap 2 mita, na braitpela bilong en i winim 1 mita na em i hevi tumas, na bihain em i pundaun.
Taim ol pikinini stok i go bikpela na ol i laik wokim haus bilong ol yet, ol i laik wokim klostu long papamama bilong ol. Olsem na sampela olpela haus bilong ol man em i gat planti haus bilong stok i stap antap long en, na ol i bilong tupela tumbuna stok tasol.
Long Nau Hevi i Painim Ol Stok
Ol man long Yurop i amamas long ol stok i kam i stap wantaim ol, tasol nau hevi i bungim ol stok. Long bipo i gat 500 haus bilong stok i stap long Swiselan, tasol nau wan wan tasol i stap. Na i olsem tasol long Swiden na Holan na Denmak na Jemani. Ol stok i laik pinis long ol dispela kantri. Long Spen i gat planti liklik i stap, tasol i no planti olsem long 10-pela yia bipo. Ol man i tok, i gat 20,000 i go inap 40,000 stok tasol i stap long Yurop. Wanem samting i painim dispela gutpela pisin ol man i save laikim tru?
Ol man i bagarapim ol hap em stok i save go i stap long en. Na long Afrika ol man i kilim ol stok na ol i kaikai, na dispela samting i mekim nogut ol dispela man yet, long wanem, stok i save kaikai ol grasopa, na ol grasopa i save bagarapim gaden bilong ol dispela man. Na long Yurop ol man i putim marasin nogut long ol samting bilong kilim binatang, na dispela i nogutim kiau bilong stok na i no gat planti pikinini i kamap. Na ol hap bilong painim kaikai long en i sot na ol waia bilong pawa i kilim i dai planti stok, na ol man tu ol i save sutim ol long gan.
Sampela ol man i traim mekim sampela samting na bai ol stok i no ken pinis, tasol olgeta kantri wantaim i mas wanbel long mekim olsem, na i hatwok long kirapim ol long mekim olsem. Ol man i save laikim ol samting God i bin wokim ol i no laik bai dispela gutpela pisin i pinis. Long taim kol i pinis ol i laik bai ol i ken lukluk antap na lukim dispela gutpela bikpela pisin i flai i kam.
[Blok long pes 28]
Pisin Stok na Pikinini
Inap planti handet yia ol i bin giamanim ol pikinini na ol i tok, taim mama i kisim nupela pikinini, em wanpela pisin ol i kolim stok i karim i kam na givim long mama. Na long nau tu, taim mama i karim pikinini ol i salim kat long papamama em i gat piksa bilong stok i karim pikinini i kam. Dispela stori i bin kirap olsem wanem?
Ol i kisim dispela bilip long tupela stori nating bilong ol tumbuna. Wanpela em olsem: Bipo ol man i lukim ol stok ol i save go olgeta long wankain taim long olgeta yia, na ol man i ting ol i go long Isip na ol i tanim i kamap man, na bihain ol i tanim na i kamap pisin gen na i kam bek long Yurop, na dispela i as na ol i save kam long haus bilong ol man.
Na narapela stori nating ol i kisim dispela bilip long en i olsem: Long san ol stok i save painim kaikai long ples tais, na ol man i tok, tewel bilong ol nupela pikinini i stap long dispela hap; na papamama stok i save tingim na lukautim gut pikinini bilong ol; orait, ol man i lukim ol dispela samting, na nau ol i tok, stok i save kisim pikinini i kam long meri i gat bel.
[Piksa Kredit Lain long pes 27]
Godo-Foto
[Piksa Kredit Lain long pes 28]
Godo-Foto