Retpela Pisin i Mekim Gutpela Singsing
Olsem wanem? Krai bilong wanpela pisin i bin kirapim yu long wanpela moningtaim? Long Not Amerika i gat wanpela pisin ol i kolim kadinal, em i save kirap singsing long bikmoning tru. Pisin kadinal man i save mekim wanpela strongpela krai bilong makim hap graun bilong em yet long painim kaikai. Em i man bilong mekim save singsing! Wanpela buk (The International Wildlife Encyclopedia) i tok, wanpela kadinal man i bin mekim 28 singsing i narapela narapela kain.
Dispela gutpela pisin hia, longpela bilong en i olsem 20 sentimita, na em i gat retpela gras, na i gat hap blakpela kala long ai na pes na aninit long maus bilong en. Na kadinal meri em i gat braunpela gras, na gras i no lait olsem bilong kadinal man, tasol em tu i save singsing gut.
Sapos wanpela taim yu inap harim singsing bilong dispela pisin kadinal, yu ken tenkyu long God, em i Man bilong wokim yu, long wanem, save na gutpela tingting bilong em i bikpela tru na em i bin wokim dispela gutpela pisin. Em i bin givim ol pisin long yumi, ol i save singsing na ol i gat gutpela kala na i mekim bel bilong yumi i amamas.—Buk Song 148:7-10.