‘Yu Mas Aninit Long Papamama Bilong Yu’
DISPELA tok i kamap long bipo tru, winim planti handet yia paslain long taim bilong Krais. Moses i kisim dispela lo antap long maunten na han bilong God yet i bin raitim long ol hap ston. God i makim Moses bilong helpim lain Israel long lusim kalabus long Isip, na ol i kalapim solwara Retsi na bihain ol i kem arere long as bilong maunten Sainai. Moses em i go stap antap long maunten Sainai wantaim Jehova inap 40 de na 40 nait pinis na bihain em i kam daun wantaim tupela hap ston i gat tenpela lo long en.—Kisim Bek 34:1, 27, 28.
Long wanpela bilong dispela tupela ston i gat lo namba 5 i stap long en. Nau dispela lo i stap long Baibel long Kisim Bek sapta 20 na ves 12. Dispela lo i tok olsem: “Yupela i mas aninit long papamama bilong yupela na bihainim tok bilong ol. Sapos yupela i mekim olsem, bai yupela i no inap i dai kwik. Nogat. Bai yupela i ken i stap longtaim long dispela graun mi God, Bikpela bilong yupela mi laik givim yupela.” Aposel Pol i tok, “dispela lo i namba wan lo em i gat promis i stap wantaim, em promis i tok olsem, ‘Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.’ ”—Efesus 6:1-3.
Taim God i givim tenpela lo long Moses bikpela paia na smok i kirap na tu graun i guria wantaim. Dispela i makim olsem ol dispela lo em ol bikpela lo, na lo namba 5, yu mas aninit long papamama bilong yu em tu i bikpela lo. Yu mas mekim wanem bilong litimapim nem bilong papamama? Tru yu mas aninit long tupela na yu mas bihainim tok bilong ol, tasol narapela tu, yu mas tingim gut ol na helpim ol long ol samting bilong skin ol i sot long en.
Sampela handet yia bihain long taim Moses i kisim lo, Jisas i strongim dispela lo taim em i sutim tok long ol saveman bilong lo na ol Farisi long ol i save bihainim pasin bilong ol tumbuna. Long Matyu 15:3-6, Jisas em i tok: “God i tok, ‘Yu mas aninit long papamama bilong yu na bihainim tok bilong ol,’ na ‘Man i mekim tok nogut long papa o mama bilong en, em i mas i dai.’ Tasol yupela i save tok olsem, ‘Sapos wanpela man i gat mani samting bilong helpim papa o mama bilong en, tasol em i tokim tupela, ‘Mi makim pinis dispela bilong givim long God,’ orait dispela man i no mas tingting long papa na mekim gut long em.’ Long dispela pasin yupela i save daunim tok bilong God na litimapim pasin yupela i bin kisim long ol tumbuna.”
Jisas yet i save bihainim tok bilong papamama bilong em na em i daun long ol. (Luk 2:51) Sampela yia bihain, taim em i laik dai na i hangamap long diwai, em i stretim rot bambai narapela i ken lukautim mama na dispela i soim olsem em i daun long mama bilong em.—Jon 19:25-27.
Aposel Pol i save tok bilong God i tok, em wok bilong ol pikinini na ol tumbuna pikinini bilong lukautim lapun papamama sapos tupela yet i no inap long mekim. Em i tok yumi ken helpim ol long olgeta samting bilong skin tu, em i wanpela rot bilong yumi daun long ol. Baibel i tok: “Sapos man bilong wanpela meri em i dai pinis, na meri i stap wanpis tru, orait yu mas mekim gutpela pasin long em. Tasol sapos dispela meri i gat ol pikinini bilong em yet o ol tumbuna pikinini, orait yu mas helpim ol long save gut olsem, namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.” (1 Timoti 5:3, 4) Taim yu liklik pikinini yet papamama bilong yu i bin lukautim gut yu, olsem na nau ol i lapun pinis na em taim bilong yu long lukautim ol na helpim ol long ol samting bilong skin ol i sot long en.