Ol Yangpela i Laik Save . . .
“Olsem Wanem na Mi No Inap Pinisim Ol Wok Mi Kirapim?”
“Sapos dispela wok i hatwok na mi no amamas long mekim, maski, mi les long mekim.”
“Televisen na ol poroman i save pulim mi na mi no save pinisim ol wok bilong mi.”
“Sampela taim mi gat planti samting tumas long mekim! ”
“Planti taim mi no save mekim hariap ol samting na taim i sot. Bihain mi no gat taim bilong mekim.”
“Mi save pinisim gut ol wok. Tasol papamama i no save amamas long en!”
OL DISPELA yangpela i kamapim klia pasin bilong planti yangpela. Olsem: Ol i no pinisim ol wok ol i bin kirapim. Tasol i no olsem olgeta yangpela i les tasol na ol i no laik mekim gut ol wok. Wanpela lain i bin askim sampela yangpela long tingting bilong ol, olsem: ‘Wanem kain wok i stret long ol yangpela i mas mekim insait long famili?’ Planti ol i tok, ol wok olsem klinim rum slip na stretim bet na rausim ol pipia.
Sampela wok i olsem bikpela wok na sampela taim yumi no save pinisim gut, na dispela inap mekim na papamama na ol tisa samting i bel hevi liklik. Olsem na gutpela sapos yu askim yu yet olsem: ‘Wanem samting i pasim mi na mi no pinisim ol wok mi bin kirapim?’ Taim yu skelim gut wanem as na yu no pinisim gut ol dispela wok, yu inap long stretim dispela hevi bilong yu.
Skelim Gut As Bilong Dispela Samting
Wanpela buk (I Hate School—How to Hang In and When to Drop Out) i stori long ol samting i pulim ol yangpela na ol i no pinisim homwok bilong ol. Buk i kamapim tok bilong sampela yangpela, ol i tok, ‘Taim mipela sindaun long mekim homwok, mipela i save kirap na painim kaikai na sapim pensil. Bihain mipela tingim wanpela pren mipela mas ring long em o lukim wanpela stori long televisen mipela i bin wet long lukim. I no longtaim na em taim bilong givim kaikai long pusi, olsem na inap long nau mipela i no mekim homwok liklik.’
Tupela meri i gat wok long skelim dispela samting, em Claudine G. Wirths na Mary Bowman-Kruhm, ol i tok ‘ol man i save tromoi bikpela hap taim long lukim televisen, bihain ol i hatwok long kaunim nius samting na stadi gut. Televisen i save pulim tingting bilong man na taim em pinis long lukim televisen, dispela i mekim olsem em i laik slip. Tru yu laik lukim wanpela piksa tasol, tasol yu sindaun inap planti aua na lukim ol narapela samting long televisen.’ Na dispela tupela savemeri ol i tok: Sampela sumatin, taim ol i liklik na ol i stap long komyuniti-skul, ol i no save mekim gut homwok bilong ol. Olsem na taim ol i go long hai-skul ol i no save sindaun gut na lainim ol strongpela samting i hatwok long kirapim tingting bilong ol long stadi long en.
Maski i gat wanem as na yu no inap pinisim wok bilong yu, yu save yu mas stretim dispela samting. Sapos yu gat strongpela tingting long pinisim ol wok yu bin kirapim, orait, yu mas bosim gut ol laik bilong skin na stretim pasin na sindaun bilong yu.
Skelim Gut Ol Wok Pastaim!
Sapos yu wanpela yangpela Kristen, yu gat planti wok long mekim. (1 Korin 15:58) Ating sampela taim yu tingting planti long ol dispela wok Kristen, na ol wok bilong skul na ol wok bilong haus na ol samting yu save laik long mekim. Tasol yumi mas tingim tu, i no gat wanpela man em i gat planti wok tru bilong mekim, winim Man i wokim yumi—Jehova. Na oltaim em i save pinisim gut ol wok bilong em. Tru em i gat bikpela strong na save, winim olgeta man, tasol em i “God i save mekim stret olgeta wok bilong en. Em i no save mekim ol samting i paul nabaut. Em i laik bai yumi stap wanbel na wok gut wantaim.” Olsem na taim yu “bihainim stret ol gutpela pasin” yu tu yu inap pinisim gut ol wok bilong yu.—1 Korin 14:33, 40.
Jisas i bin tok: “Sapos wanpela bilong yupela i laik wokim wanpela haus . . . orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat. Sapos em i no mekim olsem pastaim, na em i putim simen na bihain em i no inap pinisim dispela haus, orait olgeta man i lukim, ol bai i tok bilas long em. Ol bai i tok, ‘Dispela man i statim dispela haus, tasol em i no inap pinisim.’ ”—Luk 14:28-30.
Dispela stori i lainim yumi olsem taim yumi laik kirap mekim wanpela wok, yumi mas redi gut pastaim. Wanpela meri (Janet G. Woititz) i tok olsem: “Ol man i save pinisim gut ol wok bilong ol, ol i save redim gut ol samting bilong mekim wok long en pastaim na ol i kirapim wok.” Olsem na skelim gut hamas mani na taim bai yu lusim long mekim ol dispela wok yu laik mekim.
Sampela man i save wokim lista bilong ol samting ol i laik mekim, pastaim ol bikpela samting na bihain ol narapela samting. Taim ol i mekim pinis, orait ol i putim wanpela mak bilong soim olsem ol i mekim pinis dispela wok. Na sapos i gat sampela wok samting yu mas mekim hariap, orait, putim ol dispela wok i go pas long ol narapela wok em ol i no bikpela tumas.
Em i hatwok long bosim gut taim bilong yu na mekim gutpela wok long en, tasol yu mas mekim. Yu ken makim liklik hap taim tasol long mekim ol wok ol i no bikpela samting, olsem lukim televisen. Tasol was gut, nogut yu no makim hap taim bilong malolo na kisim gutpela slip. Dispela buk (I Hate School) i tok, ‘planti yangpela, sapos ol i kisim 4-pela o 5-pela aua malolo tasol long nait, ol i hatwok tru long tingting gut long ol samting ol i mas lain long en, long wanem ai i laik slip na skin i les.’ Sapos nau yu lain long bosim gut taim bilong yu na mekim gutpela wok long en, dispela bai helpim yu long bihain tu.
Wok Long Painim Rot Bilong Helpim Ol Narapela
Tasol sampela yangpela i tok, maski ol i makim gut taim na stretim gut ol samting long sindaun bilong ol, tasol sapos dispela wok em i no gutpela tumas long mekim, em nau ol i les. Olsem na yu mas bihainim tok bilong 1 Korin 10:24 i tok: “Yumi no ken ting long helpim yumi yet. Nogat. Yumi mas ting long helpim ol arapela.” Ating i gat sampela wok bilong haus i bikpela wok na i hatwok long mekim. Tasol taim yu mekim gut ol dispela wok bilong helpim ol narapela em yu save laikim ol tru, bai yu kisim bikpela amamas na bai yu givim bel long mekim gut dispela wok. Olsem na sapos long bihain yu les long mekim ol wok, pastaim yu ken tingim ol dispela wok bai helpim husat, na dispela inap helpim yu long mekim gut.
Sampela taim maski ol dispela wok i no gutpela tumas, em inap helpim yu yet. Olsem wanem? Yu inap tingim ol wok yu no save pinisim gut, olsem wasim ol plet samting na klinim rum slip bilong yu? Askim yu yet, ‘Ol dispela plet samting i bilong husat? Yu save mekim wok long en tu o nogat? Dispela rum slip i bilong yu na haus tu i bilong yu. Sapos yu amamas long mekim ol dispela wok na yu mekim gut, dispela bai helpim i stap bilong yu long nau na long bihain tu. Wanpela buk (Simply Organized!) i stori long ol papamama na i tok, ‘Sapos yumi no skulim ol pikinini bilong yumi nau bilong lukautim gut ol wok long haus samting, orait bihain taim ol i lusim famili bilong ol, bai ol i no gat save long mekim gut wanpela wok.’
Toktok Gut Wantaim!
Olsem wanem sapos yu wok strong long pinisim gut wanpela wok bilong yu, tasol papamama i tok yu no pinisim gut dispela wok? Planti taim dispela samting i kamap, long wanem ol i no toktok gut wantaim. I olsem: Ol i tokim yu long kisim pipia i go ausait. Orait dispela i no bikpela wok tumas. Tasol yu mas askim ol na save gut long ol samting yu bai mekim. Olsem: Bai yu mekim olsem wanem, na long wanem taim, na bai yu kisim i go putim we? Bihain yu mas wasim na klinim dram pipia, o nogat?
Pasin bilong toktok gut wantaim inap helpim papamama bambai ol i ken save gut long ol tingting bilong yu. Taim ol i hapim ol wok na givim long yu na ol narapela, yu ting em i gutpela na i stret, o olsem wanem? Yu save bel hevi taim yu no inap winim ol mak papamama i laik bai yu mas winim? Sapos olsem, orait, makim taim i stret na toktok gut wantaim papamama long tingting bilong yu.
Sampela papamama i save singautim ol pikinini long helpim ol taim ol i laik makim ol wok bilong givim long ol pikinini. Buk bilong Jeffrey Rubin na Carol Rubin (When Families Fight) i tok, taim papamama i makim wok bilong wanpela wanpela pikinini, gutpela sapos ol i toktok gut wantaim pastaim long ol dispela wok, na tu, larim ol pikinini yet i makim wanem wok ol inap mekim. Sapos yu pilim dispela tingting i gutpela, orait yu ken kamapim long papamama.
Ol saveman i tok, yu mas sindaun gut wantaim papamama na ‘makim taim stret bilong mekim ol homwok bilong yu. I gat taim long olgeta de o apinun samting em tingting bilong yumi i wok gut. Olsem na toksave long ol narapela, wanem taim yu laik mekim ol homwok samting na ol i mas lusim yu long dispela taim. Na sapos yu no lusim nating dispela hap taim long lukim televisen o long stori nabaut wantaim narapela, ol bai save yu strong long bihainim tok bilong yu.’ Taim yu stori gut wantaim papamama long dispela samting na yu no sutim tok long narapela, ating yu inap stretim ol dispela samting na ol narapela tu i ken wanbel wantaim yu long en.
Bikpela samting yu mas tingim, em yu laik amamasim bel bilong Man bilong wokim yumi, em God Jehova, na bai yu inap kisim amamas na gutpela nem. Baibel i tok: “Olgeta samting yupela i mekim, yupela i mas wok strong na mekim.” (Kolosi 3:23, 24) Taim yu bihainim ol dispela gutpela tok, yu inap kisim gutpela nem olsem yu man bilong pinisim gut olgeta wok yu save kirapim!
[Piksa long pes 24]
Taim yu kirapim wanpela wok, yu mas pinisim dispela wok