Husat i Laik Kamap Maniman Tru?
ATING olgeta man i laik kamap maniman tru. Na planti i ting rot bilong kamap maniman hariap em long rot bilong laki-tiket bilong winmoni.
Planti man i laikim laki-tiket na long pilai laki, olsem na gavman i tingim dispela samting. Na gavman i save winmoni i gutpela rot bilong gavman yet i ken kisim bikpela mani. Olsem na planti gavman olsem gavman long Mosko i go inap long Madrit na gavman long Manila i go inap long Meksiko Siti, olgeta i kirapim pilai winmoni bilong Gavman. Sampela taim winmani bilong ol dispela laki-tiket bilong gavman i go antap olsem wan handet milion kina.
Wan wan man i save insait long pilai bilong winmoni i kamap maniman. Insait long 25 yia wanpela man bilong Inglan i bin baim laki-tiket bilong winmoni bilong kikbal. Wanpela taim em i baim tiket long 50 toea na em i winim klostu wan milion 500 tausen kina. Wanpela meri long Nu Yok i baim laki-tiket bilong winmoni bilong Provins Florida na em i winim 55 milion kina.
Tasol wan wan man tasol i winim bikpela mani olsem. Planti nau i olsem wanpela man Spen. Inap 30 yia em i bin baim laki-tiket long olgeta wik. Maski em i no bin kisim bikpela winmani, em i strong yet long baim laki-tiket. Em i tok: ‘Mi ting bai mi win.’ Na wanpela man long Montreol i bin tromoi pe bilong wanpela wik long laki-tiket bilong winmoni bilong Kanada, na em i kamapim tingting bilong planti man olsem: ‘Man nating inap driman olsem bihain em bai win na kisim gutpela sindaun.’ Tasol dispela man long Montreol em i no win.
Long olgeta hap graun ol man i laik baim laki-tiket, tasol i gat narapela kain pilai laki na nau planti man i laikim—em ol masin bilong pilai laki. Man i pilai long masin bilong pilai laki, wantu em inap kisim winmani, na sampela taim dispela winmani i bikpela mani. Bipo dispela ol masin bilong pilai laki i bin stap long ol haus laki tasol, tasol nau nogat. Planti liklik na bikpela haus kaikai, na klap, na haus pasindia, olgeta i gat dispela masin. Na yu inap save ol i stap, long wanem, yu inap harim pairap bilong musik, na i gat ol lait i kirap i dai kirap i dai.
Wanpela lapun meri wanpis i stap long biktaun Nu Yok, nem bilong em Fransis, tupela o 3-pela taim long olgeta wik em i save kalap long bas na em i go long biktaun Atlantik long Nu Jesi. Em i mas ran 2 na hap aua long bas. Taim em i kamap long biktaun Atlantik em i go insait long wanpela haus laki. Em i pilai laki long ol masin inap 6-pela aua samting na bihain em i go bek long haus. Dispela meri i tok: ‘Sapos dispela biktaun Atlantik wantaim ol masin laki bilong en i no i stap, mi no save bai mi mekim wanem. Dispela ol samting em rot bilong mi ken kisim amamas.’
Long sampela man pilai laki i no bilong amamas tasol, em rot bilong lusim tingting long ol narapela wok ol i mas mekim, o ol i laik traim traim long kisim bikpela mani. Long dispela ol kain man pilai laki i bikpela samting long i stap bilong ol.
Wanpela man Spen, nem bilong em Lusiano i tok: ‘Mi man bilong pilai laki long wanem, mi laik traim, bai mi win o nogat, na mi amamas long mekim olsem. Mi no inap tok olsem pasin mi mekim i stret, tasol mi bin bel hevi na long dispela as mi kirap pilai bingo. Bihain mi wok long painim sampela pilai laki moa. Taim mani i pulap long poket bilong trasis na yu redi long pilai, olaman, skin i amamas tru.’ Wanpela man bipo em bos bilong wanpela kampani tasol ol i rausim em long wok na nau em i pilai laki olgeta taim, olsem na ol i askim em, em i bin ting long lusim pilai laki o nogat? Em i bekim tok olsem: ‘Lusim? Mi no inap tru ya! Dispela tasol em rot bilong mi long painim mani.’
Maski i gat wanem as na man i pilai laki, yumi no ken ting ol man i pilai laki i liklik lain, nogat; planti i save mekim kain kain pilai laki. Long Amerika long olgeta 4-pela 4-pela bikpela manmeri, 3-pela i save pilai laki. I wankain long kantri Spen, planti man i save pilai laki olgeta taim. Wok bisnis long pilai laki i bikpela bisnis tru. Mani bilong wan wan bikpela kampani tasol long olgeta hap graun i winim mani em wok bisnis bilong winmoni i kamapim long 39 kantri.
Olsem na yumi save pilai laki i gat bikpela strong na i save pulim tru ol man. Tasol yu ting pilai laki em wanpela pilai nating o em inap kamapim sampela bikpela hevi em pastaim yumi no save em bai kamap? Wanpela savetok bilong bipo em i tokaut olsem: “Man i wok strong tumas long kamap maniman kwiktaim, Bikpela bai i no inap larim em i go nating. Nogat. Bai em i mekim save long em.”—Sindaun 28:20.